ପୂର୍ବତଟ ରେଳପଥ ପରିସୀମା ମଧ୍ୟରୁ ଛାଡ଼ୁଥିବା ଆଉ ୩ଟି ଟ୍ରେନରେ ଏଲ୍ଏଚ୍ବି କୋଚ୍
ଭୁବନେଶ୍ବର : ପୂର୍ବତଟ ରେଳପଥ ପରିସୀମା ମଧ୍ୟରୁ ଛାଡ଼ୁଥିବା ଆଉ ୩ଟି ଟ୍ରେନ୍ରେ ରାଜଧାନୀ ଏକ୍ସପ୍ରେସ ଭଳି କୋଚ୍ ଉପଲବ୍ଧ କରାଇବାକୁ ନିଷ୍ପତ୍ତି ନିଆଯାଇଛି। ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ଓଡ଼ିଶା ଗସ୍ତ ସମୟରେ ଭୁବନେଶ୍ୱର-କେଏସଆର ବେଙ୍ଗାଲୁରୁ ପ୍ରଶାନ୍ତି ସ୍ପେସାଲରେ ରାଜଧାନୀ କୋଚ ଭଳି ଯାତ୍ରା ସୁବିଧାକୁ ସବୁଜ ପତାକା ଦେଖାଇ ଶୁଭାରମ୍ଭ କରିଥିଲେ। ଆହୁରି ଦୁଇଟି ଟ୍ରେନରେ ଏହି ସୁବିଧା ଯୋଗାଇବାକୁ ମଧ୍ୟ ଘୋଷଣା କରିଥିଲେ। ଏବେ ଭୁବନେଶ୍ୱର-ନୂଆଦିଲ୍ଲୀ-ଭୁବନେଶ୍ୱର ଦୂରନ୍ତ ଏକ୍ସପ୍ରେସ, ଭୁବନେଶ୍ୱର-ଆନନ୍ଦ ବିହାର(ଦିଲ୍ଲୀ)-ଭୁବନେଶ୍ୱର ସୁପରଫାଷ୍ଟ ଏକ୍ସପ୍ରେସ(ଭାୟା ଅନୁଗୁଳ ଓ ରାଉରକେଲା)ରେ ମଧ୍ୟ ଆଧୁନିକ ଏଲ୍ଏଚ୍ବି କୋଚ୍ ଉପଲବ୍ଧ ହୋଇଛି। ଏହି କୋଚ୍ଗୁଡ଼ିକରେ ଅଗ୍ନି ନିରାପତ୍ତା, କମ୍ ରକ୍ଷଣାବେକ୍ଷଣ, ଅଧିକ ଯାତ୍ରୀ ପରିବହନ କ୍ଷମତା, ଅଧିକ ସୁରକ୍ଷିତ ଓ ଆରାମଦାୟକ ଯାତ୍ରାର ସୁବିଧା ରହିଛି।
Sambad is now on WhatsApp
Join and get latest news updates delivered to you via WhatsApp
ଏଥିସହ ପୂର୍ବତଟ ରେଳପଥ ପରିସୀମାରୁ ଛାଡ଼ୁଥିବା ଆଉ କିଛି ଟ୍ରେନ୍ରେ ମଧ୍ୟ ଏହି ସୁବିଧା ଯୋଗାଇ ଦିଆଯିବ। ଉକ୍ତ ଟ୍ରେନ୍ଗୁଡ଼ିକ ହେଲା, ବିଶାଖାପାଟଣା-ଚେନ୍ନାଇ-ବିଶାଖାପାଟଣା ଏକ୍ସପ୍ରେସ୍(୨୨୮୬୯/୨୨୮୭୦) ବିଶାଖାପାଟଣାରୁ ଜୁଲାଇ ୧୧ରୁ ଓ ଚେନ୍ନାଇରୁ ଜୁଲାଇ ୧୨ରୁ, ବିଶାଖାପାଟଣା-ସାଇ ନଗର ଶିରିଡ଼ି-ବିଶାଖାପାଟଣା ଏକ୍ସପ୍ରେସ(୧୮୫୦୩/୧୮୫୦୪)ରେ ବିଶାଖାପାଟଣାରୁ ଜୁଲାଇ ୭ରୁ ଓ ସାଇନଗର ଶିରିଡ଼ିରୁ ଜୁଲାଇ ୮ରୁ। ଏହାବ୍ୟତୀତ, ପୂର୍ବତଟ ରେଳପଥ ପରିସୀମା ମଧ୍ୟ ଦେଇ ଚଳାଚଳ କରୁଥିବା ଦୁଇଟି ଗୁରୁତ୍ୱପୂର୍ଣ୍ଣ ଟ୍ରେନ୍ ଯଥା ହାଓଡ଼ା-ଚେନ୍ନାଇ-ହାଓଡ଼ା ମେଲ(୧୨୮୩୯/୧୨୮୪୦) ଓ ହାଓଡ଼ା-ଚେନ୍ନାଇ-ହାଓଡ଼ା କରମଣ୍ଡଳ ଏକ୍ସପ୍ରେସ(୧୨୮୪୧/୧୨୮୪୨)ରେ ମଧ୍ୟ ଏହି ସୁବିଧା ଗତ ୫ତାରିଖରୁ ଉପଲବ୍ଧ ହୋଇଛି। ଏବେ ସୁଦ୍ଧା ୪୯ଟି ଟ୍ରେନ୍ରେ ରାଜଧାନୀ ଏକ୍ସପ୍ରେସ ପରି କୋଚ୍ ଉପଲବ୍ଧ କରାଯାଇଛି।