ମହିଳାଙ୍କୁ ହତ୍ୟା ମାମଲା: ହତ୍ୟାକାରୀ ସନ୍ତୋଷ ପଲେଇକୁ ଆଜୀବନ କାରାଦଣ୍ଡ
ଖୋର୍ଦ୍ଧା: ସବିତା ଜେନା ହତ୍ୟା ମାମଲାରେ ଦୀର୍ଘ ୮ ବର୍ଷ ପରେ ନ୍ୟାୟ ମିଳିଛି । ଖୋର୍ଦ୍ଧା ଅତିରିକ୍ତ ଜିଲ୍ଲା ଦୌରା ଜଜ୍ ମାମଲାର ବିଚାର କରି ଅଭିଯୁକ୍ତ ସନ୍ତୋଷ ପଲେଇକୁ ଦୋଷୀ ସାବ୍ୟସ୍ତ କରିବା ସହ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସୂଚନାନୁସାରେ, ୨୦୧୪ ସେପ୍ଟମ୍ବର ୧୪ ତାରିଖରେ ନିରାକାରପୁର ଥାନା ଅଧୀନ ବୋଳଂଘରା ଗାଁର ଭଗବାନ ଜେନାଙ୍କ ପତ୍ନୀ ସବିତା ଜେନା କେଉଁ ଆଡ଼େ ନିଖୋଜ ହୋଇଯାଇଥିଲେ । ସେହି ମାସ ୨୭ ତାରିଖରେ ପୁଲିସ କାଶୀପୁର ଠାରୁ ବଡ଼ପୋଖରିଆ ରାସ୍ତାର ବାସୁଦେଇପୁର ପୋଖରୀ ନିକଟ କାଜୁ ଜଙ୍ଗଲ ଭିତରେ ଥିବା ଏକ ପରିତ୍ୟକ୍ତ ଘରୁ ଏକ ମହିଳାଙ୍କ ଉଲଗ୍ନ ଓ ଗଳିତ ମୃତଦେହ ଜବତ କରିଥିଲା । ମୃତଦେହର ସ୍ଥିତିକୁ ଦେଖି ପୁଲିସ ପ୍ରାଥମିକ ଅନୁସନ୍ଧାନରେ ଧର୍ଷଣ ପରେ ହତ୍ୟା କରିଥିବା ସନେ୍ଦହ କରିଥିଲା । ମହିଳାଙ୍କ ପରିଚୟ ସ୍ପଷ୍ଟ ହୋଇନଥିବାରୁ ପୁଲିସ ପ୍ରଥମେ ୬/୨୦୧୪ରେ ଏକ ଅପ୍ରାକୃତିକ ମୃତ୍ୟୁ ମାମଲା ରୁଜୁ କରିଥିଲା । କିନ୍ତୁ ୨୧ ତାରିଖରେ ସବିତାଙ୍କ ପତି ଭଗବାନ ଜେନା ମୃତଦେହକୁ ଚିହ୍ନଟ କରିଥିଲେ । ଏହାପରେ ଭଗବାନଙ୍କ ଲିଖିତ ଅଭିଯୋଗ ଅନୁସାରେ ପୁଲିସ ୧୪୧/୨୦୧୪ରେ ଦଫା ୩୬୩, ୩୭୬ ଓ ୩୦୨ରେ ମାମଲା ରୁଜୁ କରି ଅନୁସନ୍ଧାନ ଆରମ୍ଭ କରିଥିଲା । ଅନୁସନ୍ଧାନରେ ବୋଳଂଘରା ଗାଁର ସନ୍ତୋଷ ପଲେଇ ନାମକ ଜଣେ ଯୁବକ ବ୍ୟାଙ୍କ ଋଣ କରାଇଦେବାର ପ୍ରତିଶ୍ରୁତି ଦେଇ ତାଙ୍କୁ ଡାକିଥିଲା, ଏହାପରେ ସବିତାଙ୍କୁ ଧର୍ଷଣ ପରେ ହତ୍ୟା କରିଥିବା ଜଣାପଡ଼ିଥିଲା ।
ଏହି ମାମଲାର ବିଚାର କରି ପ୍ରଥମ ଅତିରିକ୍ତ ଜିଲ୍ଲା ଦୌରାଜଜ୍ ସମର ବିଳାସ ବେହେରା ସନ୍ତୋଷ ପଲେଇକୁ ଦୋଷୀ ସାବ୍ୟସ୍ତ କରିଥିଲେ । ଆଜି ସନ୍ତୋଷକୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି ବୋଲି ସରକାରୀ ଓକିଲ ରଜନୀକାନ୍ତ ପଟ୍ଟନାୟକ ସୂଚନା ଦେଇଛନ୍ତି ।