ବ୍ୟାଙ୍କରୁ ଆଣିନଥାନ୍ତୁ ପଛେ ଆପଣଙ୍କ ଉପରେ ଅଛି ୨୨ ହଜାର ଟଙ୍କାର ଋଣ

ଭୁବନେଶ୍ୱର: ଆପଣ କାହା ପାଖରୁ ହାତ ଉଧାରୀ ବା ବ୍ୟାଙ୍କରୁ ଋଣ ଆଣିନଥାନ୍ତୁ ପଛେ ଆପଣଙ୍କ ମୁଣ୍ଡ ଉପରେ ୨୨ହଜାର ୪୨ ଟଙ୍କାର ଋଣ ଅଛି | କଥାଟି ଶୁଣି ଆଶ୍ଚର୍ଯ୍ୟ ହୋଇଗଲେ କି? ତେବେ ଏକଥା ଏକଦମ ସତ | କାରଣ ଓଡ଼ିଶା ସରକାର ୨୦ ବର୍ଷରେ (୨୦୦୧-୦୨)ରୁ (୨୦୨୨-୨୩) ଭିତରେ ଦେଢ଼ ଲକ୍ଷ କୋଟି (୧,୫୦,୧୩୬.୦୦) ଋଣ ଉଠାଇଥିବା ବେଳେ ଏବାବଦରେ ସୁଧ ଦେଇଛନ୍ତି ୭୯,୨୬୧ କୋଟି ଟଙ୍କା।

ତେବେ ସୁଧ ପରିମାଣ ମୂଳଧନର ପ୍ରାୟ ୫୩ ପ୍ରତିଶତ ହୋଇଥିବାବେଳେ ମୁଣ୍ଡ ପିଛା ଋଣ ୨୨ ହଜାର ୪୨ ଟଙ୍କା ରହିଛି | ଆଜି ବିଧାନସଭାରେ ବିଧାୟକ ଅରବିନ୍ଦ ଢ଼ାଲି ପ୍ରଶ୍ନ କରିଥିଲେ ଯେ ରାଜ୍ୟ ସରକାର ୨୦ ବର୍ଷ ଭିତରେ କେତେ ଟଙ୍କା ଋଣ ଆଣିଛନ୍ତି ଓ ସୁଧ ବାବଦକୁ କେତେ ଟଙ୍କା ଦେଇଛନ୍ତି | ଏହାର ଉତ୍ତର ରଖି ଅର୍ଥମନ୍ତ୍ରୀ ନିରଞ୍ଜନ ପୂଜାରୀ କହିଛନ୍ତି ଯେ ରାଜ୍ୟ ସରକାର ସମୁଦାୟ ୨୦ ବର୍ଷ ଭିତରେ ଦେଢ଼ ଲକ୍ଷ କୋଟି ଟଙ୍କା ଋଣ ଆଣିଥିବାବେଳେ ସୁଧ ବାବଦକୁ ୭୯,୨୬୧ କୋଟି ଟଙ୍କା ଦେଇଛନ୍ତି |

ତେବେ ମନ୍ତ୍ରୀ କହିଛନ୍ତି ଯେ ଆର୍ଥିକ ବର୍ଷ ୨୦୨୨-୨୩ରେ ରାଜ୍ୟ ସରକାର ଖୋଲା ବଜାରରୁ ୨୨୫୯ କୋଟି ଟଙ୍କା ଋଣ ଆଣିବାକୁ ବଜେଟରେ ଆକଳନ କରିଛନ୍ତି | କିନ୍ତୁ ଗତବର୍ଷ ଖଣି ସୂତ୍ରରୁ ବଜେଟ ଆକଳନ ତୁଳନାରେ ଯଥେଷ୍ଟ ଅଧିକ ରାଜସ୍ବ ମିଳିଥିବାରୁ ଖୋଲା ବଜାରରୁ ଋଣ ଅଣାଯାଇନାହିଁ |