ବିଦେଶୀ ମଦ ଦୋକାନ ବନ୍ଦ କରିବା ସହ ମିଥ୍ୟା ମାମଲା ପ୍ରତ୍ୟାହାର ଦାବିରେ ବିକ୍ଷୋଭ
ରୁପ୍ରା: କଳହାଣ୍ଡି ଜିଲ୍ଲା ନର୍ଲା ଥାନା ଅଧିନ ଛତିକୁଡ଼ାସ୍ଥିତ ଠିପି ବନ୍ଦ୍ ବିଦେଶୀ ମଦ ଦୋକାନ ବନ୍ଦ୍ କରିବାସହ ଶାନ୍ତପୁର ସରପଞ୍ଚଙ୍କ ନାମରେ ରୁଜୁ ହୋଇଥିବା ମିଥ୍ୟା ମାମଲା ପ୍ରତ୍ୟାହାର ଦାବିରେ ଆଜି ଏକ ବିଶାଳ ବିକ୍ଷୋଭ ଶୋଭାଯାତ୍ରା, ଗଣଧାରଣା ଓ ଦାବିପତ୍ର ପ୍ରଦାନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି।
Sambad is now on WhatsApp
Join and get latest news updates delivered to you via WhatsApp
ନର୍ଲା ବ୍ଲକ ଅଧ୍ୟକ୍ଷା ମନୋରମା ମହାନ୍ତିଙ୍କ ନେତୃତ୍ୱରେ ଛତିକୁଡା ଛକ ଠାରେ ରବିବାର ସକାଳେ ବିକ୍ଷୋଭ ଶୋଭାଯାତ୍ରା ଆୟୋଯିତ ହୋଇଥିଲା। ବିକ୍ଷୋଭକାରୀମାନେ ଛତିକୁଡାସ୍ଥିତ ବିଦେଶୀ ମଦ ଦୋକାନ ସମ୍ମୁଖରେ ଧାରଣାରେ ବସିବାସହ ବିଭିନ୍ନ ନାରାବାଜି କରିଥିଲେ। ପରେ ନର୍ଲା ଥାନାକୁ ଆସି ଦାବିପତ୍ର ପ୍ରଦାନ କରିଥିବା ଜଣାପଡିଛି।
ଏଠାରେ ପ୍ରକାଶଯୋଗ୍ୟ ଯେ ଛତିକୁଡା ବିଦେଶୀ ମଦ ଦୋକାନ ମାଳିକ ଶାନ୍ତପୁର ସରପଞ୍ଚ ଟିକେରାମ ସାହୁଙ୍କ ନାମରେ ଏକ ସଙ୍ଗିନ ମାମଲା ନର୍ଲା ଥାନାରେ ରୁଜ୍ଜୁ କରିଛନ୍ତି। ବିଦେଶୀ ମଦ ଦୋକାନ ମାଳିକଙ୍କ ଅଭିଯୋଗ ଅନୁଯାୟୀ, ସରପଞ୍ଚ ଶ୍ରୀ ସାହୁ ଓ କିଛି ଲୋକ ଗୁରୁବାର ରାତି ପ୍ରାୟ ୧୧ଟା ସମୟରେ ମଦ କିଣିବା ବାହାନାରେ ବିଦେଶୀ ମଦଦୋକାନକୁ ଯାଇ ଭଙ୍ଗା ରୁଜା କରିବା ସହ ଦୋକାନ ଡ୍ରରେ ଥିବା ୧ ଲକ୍ଷ ୭୫ ହଜାର ନଗଦ ଟଙ୍କା ନେଇ ଯିବା ସହ ଲକ୍ଷାଧିକ ଟଙ୍କାର ସାମଗ୍ରୀ ଓ ମଦ ବୋତଲ୍ ନଷ୍ଟ କରିଛନ୍ତି। ଏହାସହ ଦୋକାନରେ ଥିବା କର୍ମଚାରୀଙ୍କ ଉପରେ ଆକ୍ରମଣ ମଧ୍ୟ କରିଛନ୍ତି।
ତେବେ ଏହି ଅଭିଯୋଗ ସଂପୂର୍ଣ୍ଣ ମିଥ୍ୟା ବୋଲି କହିଛନ୍ତି ବିକ୍ଷୋଭକାରୀ। ଆଜିର ଏହି ବିକ୍ଷୋଭ ଶୋଭାଯାତ୍ରା, ଧାରଣା ଓ ଦାବିପତ୍ର ପ୍ରଦାନ ସମୟରେ ନର୍ଲା ବ୍ଲକ ଅଧ୍ୟକ୍ଷା ମନୋରମା ମହାନ୍ତି, ଉପାଧ୍ୟକ୍ଷ ଦୁର୍ଗା ପ୍ରସାଦ ମହାନ୍ତି, ସମିତିସଭ୍ୟ ଗୋବିନ୍ଦ ତାଣ୍ଡି, ଗାୟତ୍ରୀ ରଣା, ଟୁକୁ ସାହୁ, ପୁରନ୍ଦର ମାଝୀ, ମାଧବ ନାଏକ, ତହସିଲ ସାହୁ, ସେବାକାରୀ କିନ୍ନର ସଂଘ ସଭାପତି କାମିନୀ କିନ୍ନର, ପାୟଲ କିନ୍ନରଙ୍କ ସମେତ ଅନେକେ ର୍ନିବାଚିତ ଲୋକପ୍ରତିନିଧି ଏବଂ ପ୍ରାୟ ୨୦୦ ଜନସାଧାରଣ ସାମିଲ ହୋଇଥିଲେ।