ସଇରାତରେ ଖୁମ୍ବ ପୋତିବାରେ ଦୁର୍ନୀତି ଘଟଣା : ଯାଜପୁର ଜିଲ୍ଲାପାଳଙ୍କ ଉପରେ ଲୋକାୟୁକ୍ତ କ୍ଷୁବ୍ଧ
ଭୁବନେଶ୍ବର : ଯାଜପୁର ଜିଲ୍ଲା ଧର୍ମଶାଳା ତହସିଲରେ ସଇରାତରେ ଖୁମ୍ବ ପୋତିବାରେ ବ୍ୟାପକ ଦୁର୍ନୀତି ଅଭିଯୋଗ ଘଟଣାରେ ଯାଜପୁର ଜିଲ୍ଲାପାଳଙ୍କଠାରୁ ରିପୋର୍ଟ ନ ପାଇ ଅତ୍ୟନ୍ତ କ୍ଷୁବ୍ଧ ହୋଇଛନ୍ତି ଲୋକାୟୁକ୍ତ। ଯାଜପୁର ଜିଲ୍ଲାପାଳଙ୍କ ଏଭଳି ଆଚରଣକୁ ଲୋକାୟୁକ୍ତ ଗ୍ରହଣ କରିପାରି ନାହାନ୍ତି। ଆସନ୍ତା ଶୁଣାଣିରେ ଏ ସଂପର୍କିତ ରିପୋର୍ଟ ଦାଖଲ ନ କଲେ ଏହାକୁ ଗୁରୁତ୍ବର ସହ ନିଆଯିବ ବୋଲି ଚେତାବନୀ ଦେଇଛନ୍ତି। ଏହାସହ ଧର୍ମଶାଳା ତହସିଲଦାର ଏ ନେଇ ଦେଇଥିବା ରିପୋର୍ଟକୁ ଅସ୍ପଷ୍ଟ ବୋଲି କହିବାକୁ ପଛାଇ ନାହାନ୍ତି ଲୋକାୟୁକ୍ତ।
Sambad is now on WhatsApp
Join and get latest news updates delivered to you via WhatsApp
ଯାଜପୁର ଜିଲ୍ଲାର ଧର୍ମଶାଳା ତହସିଲରେ ସଇରାତରେ ସୀମା ନିର୍ଧାରଣ ପାଇଁ ଖୁମ୍ବ ପୋତା ଯାଇଥିବା ରାଜସ୍ବ ମନ୍ତ୍ରୀ ବିଧାନସଭାରେ ସୂଚନା ଦେଇଥିଲେ। ତେବେ ସୂଚନାଧିକାର କର୍ମୀ ସର୍ବେଶ୍ବର ବେହୁରା ଏ ସଂପର୍କରେ ସୂଚନାଧିକାର ଆଇନରେ ତଥ୍ୟ ମାଗିଥିଲେ। ଖୁମ୍ବ ପୋତିବା ପାଇଁ ୧.୮ଲକ୍ଷ ଟଙ୍କା ଖର୍ଚ ହୋଇଥିବା କୁହାଯାଇଥିଲା। ହେଲେ ସ୍ଥାନୀୟ ଅଞ୍ଚଳରେ ଏଭଳି ଖୁମ୍ବ ଶ୍ରୀ ବେହୁରା ଦେଖିବାକୁ ପାଇ ନ ଥିଲେ। ପରବର୍ତୀ ସମୟରେ ସେ ଲୋକାୟୁକ୍ତଙ୍କ ନିକଟରେ ଅଭିଯୋଗ କରିଥିଲେ। ଲୋକାୟୁକ୍ତ ଏ ସଂପର୍କିତ ରିପୋର୍ଟ ଜିଲ୍ଲାପାଳଙ୍କଠାରୁ ମାଗିଥିଲେ। ନୋଟିସ୍ ଜାରି ହେବା ସତ୍ବେ ମଧ୍ୟ ଜିଲ୍ଲାପାଳଙ୍କ ପକ୍ଷରୁ କୌଣସି ରିପୋର୍ଟ ଦାଖଲ ହୋଇ ନ ଥିଲା। ଯାହାକୁ ନେଇ ଲୋକାୟୁକ୍ତ ଅତ୍ୟନ୍ତ କ୍ଷୁବ୍ଧ ହୋଇଛନ୍ତି। ଏ ସଂକ୍ରାନ୍ତୀୟ ରିପୋର୍ଟ ଦାଖଲ କରିବା ଲାଗି ତାଙ୍କୁ ପୁନର୍ବାର ସୁଯୋଗ ଦେବା ସହିତ ରିପୋର୍ଟ ନ ଦେଲେ ଏହାକୁ ଗୁରୁତ୍ବର ସହିତ ବିଚାର କରାଯିବ ବୋଲି କହିଛନ୍ତି।