ମାର୍ଶାଘାଇ : ଦମ୍ପତିଙ୍କୁ ଆକ୍ରମଣ କରି ସୁନାଗହଣା ଓ ଲକ୍ଷାଧିକ ଟଙ୍କା ଲୁଟି ନେଲେ ଡକାୟତ, ଉଭୟଙ୍କୁ ଗୁରୁତର ଅବସ୍ଥାରେ କଟକର ବଡ଼ ମେଡିକାଲରେ ଭର୍ତ୍ତି 

ମାର୍ଶାଘାଇ : କେନ୍ଦ୍ରାପଡ଼ା ଜିଲ୍ଲାର ମାର୍ଶାଘାଇ ଥାନା ଅଞ୍ଚଳରେ ଘଟିଛି ଏକ ଅଭାବନୀୟ ଘଟଣା। ଏଠାରେ ଡକାୟତମାନେ ଏକ ଦମ୍ପତିଙ୍କୁ ଆକ୍ରମଣ କରି ସୁନାଗହଣା ଓ ଲକ୍ଷାଧିକ ଟଙ୍କା ଲୁଟି ନେଇଥିବା ଜଣାଯାଇଛି । ଗୁରୁତର ଅବସ୍ଥାରେ ଦମ୍ପତିଙ୍କୁ କଟକ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଥିବାର ସୂଚନା ମିଳିଛି ।

ପ୍ରାପ୍ତ ସୂଚନା ଅନୁଯାୟୀ, ମାର୍ଶାଘାଇ ଥାନା କୁସୁନପୁର ଗାଁରେ ଗତକାଲି ବିଳମ୍ବିତ ରାତିରେ ଏକ ଡକାୟତ ଦଳ କାହ୍ନୁ ଚରଣ ନାୟକ ଓ ତାଙ୍କ ପଡ଼ୋଶୀଙ୍କ ଘରେ ପଶିଥିଲେ। ସେମାନେ ଗହଣା ଓ ଅଳଙ୍କାର ଲୁଟୁଥିବା ବେଳେ ଏହାକୁ ବିରୋଧ କରିଥିଲେ କାହ୍ନୁ ଚରଣ ନାୟକ(୫୫)।  ଏଥିରେ ଉତକ୍ଷିପ୍ତ ହୋଇ ଡକାୟତମାନେ କାହ୍ନୁ ଚରଣ ଓ ତାଙ୍କ ପତ୍ନୀଙ୍କୁ ଭୁଜାଲିରେ ଆକ୍ରମଣ କରି ଗହଣା ଓ ଲକ୍ଷାଧିକ ଟଙ୍କା ଲୁଟିନେଇ ଫେରାର୍ ହୋଇଥିଲେ। କାହ୍ନୁ ଚରଣ ଓ ତାଙ୍କ ପତ୍ନୀଙ୍କୁ ପଡ଼ୋଶୀମାନେ ଉଦ୍ଧାର କରି ପ୍ରଥମେ ମାର୍ଶାଘାଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା ହେଲେ ଏହାପରେ ଉଭୟଙ୍କୁ କଟକର ଏସସିବିକୁ ସ୍ଥାନାନ୍ତରିତ କରାଯାଇଥିବା ଜଣାଯାଇଛି। ଖବର ପାଇ ସକାଳେ ମାର୍ଶାଘାଇ ଥାନା ପୁଲିସ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।