ନୂଆଦିଲ୍ଲୀ: ଜଗନ୍ନାଥଙ୍କ ନବକଳେବର ଗୀତାର ବାଣୀକୁ ମନେପକାଇଦେଇଥାଏ | ଯେଭଳି ବସ୍ତ୍ର ପୁରୁଣା ହେବା ମାତ୍ରେ ଆମେ ଏହାକୁ ବଦଳାଇ ନୂତନ ବସ୍ତ୍ର ଧାରଣା କରିଥାଉ ଠିକ ସେହିଭଳି ଆତ୍ମା ମଧ୍ୟ ନୂଆ ଶରୀର ଧାରଣ କରିଥାଏ | ଈଶ୍ୱର ଅମର କିନ୍ତୁ ତାଙ୍କ ଶରୀରର ନବକଳେବର ହୋଇଥାଏ, ସାଧାରଣ ଲୋକଙ୍କୁ ଶ୍ରୀଜଗନ୍ନାଥ ସଂସ୍କୃତିର ଏହି ପରମ୍ପରା ଗୀତାର ବାଣୀକୁ ମନେପକାଇ ଦେଇଥାଏ | କିଛି ଏଭଳି କଥା କହିଛନ୍ତି ପୂର୍ବତନ ମୁଖ୍ୟ ଶାସନ ସଚିବ ତଥା ଜଗନ୍ନାଥ ସଂସ୍କୃତି ଗବେଷକ ସୁବାସ ପାଣି | ଜାତୀୟ ଗଣମାଧ୍ୟମ ଆଜତକ ପକ୍ଷରୁ ଆୟୋଜିତ ସାହିତ୍ୟ ଆଜତକ କାର୍ଯ୍ୟକ୍ରମରେ ଆଜି ‘ଜୟ ଜଗନ୍ନାଥ’ ଶୀର୍ଷକ ଆଲୋଚନାଚକ୍ରରେ ନିଜର ବକ୍ତବ୍ୟ ରଖିଛନ୍ତି ସୁବାସ ପାଣି |
Sambad is now on WhatsApp
Join and get latest news updates delivered to you via WhatsApp
ଏହି କାର୍ଯ୍ୟକ୍ରମରେ ସଂସ୍କୃତି ଗବେଷକ ତଥା ଲେଖକ ଡ.ଅସିତ ମହାନ୍ତିଙ୍କ ସହ ସାହିତ୍ୟ ଏକାଡେମୀ ପୁରସ୍କାର ପ୍ରାପ୍ତ ଲେଖିକା ପାରମିତା ଶତପଥୀ ମହାପ୍ରଭୁ ଜଗନ୍ନାଥଙ୍କ ସମ୍ପର୍କିତ ବିଭିନ୍ନ ପରମ୍ପରା ବାବଦରେ କହିଥିଲେ | ରସଗୋଲା ଓଡ଼ିଶାର ବୋଲି ପ୍ରମାଣ ଦେଇ ଓଡ଼ିଆଙ୍କ ମନକୁ ମିଠା କରିଦେଇଥିବା ଗବେଷକ ଅସିତ ମହାନ୍ତି କହିଥିଲେ ଯେ ଜଗନ୍ନାଥ ଏମିତି ଜଣେ ଭଗବାନ, ଯାହାଙ୍କୁ ସମସ୍ତେ ମାନିଥାନ୍ତି | ଜଗନ୍ନାଥଙ୍କୁ ଶିବଭକ୍ତମାନେ ଶିବ ବୋଲି ମାନିବା ସହ ବୌଦ୍ଧ ଧର୍ମର ଲୋକ ବୁଦ୍ଧ ବୋଲି ଗ୍ରହଣ କରିଥାଆନ୍ତି। ଯିଏ ସମସ୍ତଙ୍କ ବାଂଞ୍ଛିତ ଫଳ ପ୍ରଦାନ କରିଥାନ୍ତି ସେ ଜଗନ୍ନାଥ ବୋଲି ଅସିତ ମହାନ୍ତି କହିଥିଲେ |
ସେହିପରି ପାରମିତା ଶତପଥୀ କହିଥିଲେ ଯେ ଜଗନ୍ନାଥ ପ୍ରତିଟି ଓଡ଼ିଆଙ୍କ ଆରାଧ୍ୟ ଦେବତା ହୋଇଥିବା ବେଳେ ତାଙ୍କ ରହସ୍ୟ କେହି ସାଧାରଣ ଲୋକ କେବେ ମାପିପାରିବେ ନାହିଁ | ଜଗନ୍ନାଥ ସମୁଦ୍ର ଭଳି ପରିବ୍ୟାପ୍ତ ହୋଇଥିବାବେଳେ ଈଶ୍ୱର ଏକ ବିଶ୍ୱାସ ଉପରେ ଆଧାରିତ, ଯାହାଙ୍କ ଉପରେ କ’ଣ ବା କହିହେବ |