ସଂକଟରେ ପ୍ରଭୁ ଜଗନ୍ନାଥଙ୍କ ରଥର ସୋଲଫୁଲ ସେବା
ଆର୍ଥିକ ସହାୟତା ପାଇଁ ଅନୁରୋଧ
ଖୋର୍ଦ୍ଧା: ଶ୍ରୀକ୍ଷେତ୍ର ସହ ଖୋର୍ଦ୍ଧା ଅଙ୍ଗାଙ୍ଗୀ ଭାବେ ଜଡ଼ିତ । ଶ୍ରୀମନ୍ଦିରର ପରମ୍ପରା ଓ ସେବା ସହ ଖୋର୍ଦ୍ଧାରୁ ବସ୍ତ୍ର, ଫୁଲ ଆଦି ସେବା କାହିଁ କେତେ ବର୍ଷରୁ ନିୟମିତ ଭାବେ ଚାଲିଆସୁଛି । ଏପରିସ୍ଥଳେ ଗୁଣ୍ଡିଚା ରଥଯାତ୍ରା ସମୟରେ ରଥରେ ଲାଗୁଥିବା ସୋଲଫୁଲ ସେବା ଆଜି କାରିଗରଙ୍କ ଆର୍ଥିକ ସଂକଟରୁ ବନ୍ଦ ହେବା ଆଶଙ୍କା ସୃଷ୍ଟି ହୋଇଛି । ଏନେଇ ସୋଲଫୁଲ କାରିଗର ପରିବାର ପକ୍ଷରୁ ଜିଲ୍ଲାପାଳଙ୍କୁ ଆବଶ୍ୟକ ସହାୟତା ପ୍ରଦାନ କରିବାକୁ ଅନୁରୋଧ କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଗୁରୁଜଙ୍ଗ ଭୋଇ ସାହିର ବୀର କିଶୋର ନାୟକଙ୍କ ପରିବାର ଅନେକ ଦଶନ୍ଧୀ ଧରି ନିଜର ପ୍ରଚେଷ୍ଟାରେ ରଥଯାତ୍ରା ବେଳେ ରଥରେ ଲାଗୁଥିବା ସୋଲଫୁଲ ପ୍ରସ୍ତୁତ କରି ଦେଇଥାନ୍ତି । ଏଥିପାଇଁ ସେମାନଙ୍କ ପରିବାର ନିସ୍ୱାର୍ଥପର ଭାବେ ନିଜର ସଂଚିତ ଅର୍ଥରୁ ନିମାପଡ଼ା, କାକଟପୁର, ଅସ୍ତରଙ୍ଗ, କୋଣାର୍କ, ବାଙ୍କୀ, କଣାସ ଆଦି ସ୍ଥାନରୁ ପ୍ରାକୃତିକ ସୋଲ ସଂଗ୍ରହ କରି ଭଳିକି ଭଳି ଫୁଲ ପ୍ରସ୍ତୁତ କରିଥାନ୍ତି । କିନ୍ତୁ ବର୍ତମାନ କରୋନା ସଂକ୍ରମଣ ଜନିତ ଆର୍ଥିକ ସମସ୍ୟା ଓ ପରିବାର ସଦସ୍ୟଙ୍କ ସ୍ୱାସ୍ଥ୍ୟଗତ ସମସ୍ୟାରୁ ଏନେଇ ଆବଶ୍ୟକ ଅର୍ଥ ଯୋଗାଣ କରିପାରୁନାହାନ୍ତି ।
ଅନ୍ୟମାନଙ୍କୁ ଏଥିପାଇଁ ନିୟୋଜିତ କରି ସୋଲଫୁଲ ପ୍ରସ୍ତୁତ କରିବାକୁ ଚେଷ୍ଟା କରିଛନ୍ତି, କିନ୍ତୁ ସେମାନଙ୍କୁ ପାରିଶ୍ରମିକ ଦେଇପାରୁନାହାନ୍ତି । ଏଥିପାଇଁ ଶ୍ରୀମନ୍ଦିର ପ୍ରଶାସନ ମଧ୍ୟ କୌଣସି ଆର୍ଥିକ ସହାୟତା ପ୍ରଦାନ କରୁନାହିଁ । ଏନେଇ ବୀର କିଶୋର ନାୟକ କହିଛନ୍ତି ଯେ ସୋଲଫୁଲ ପ୍ରସ୍ତୁତ କରିବାକୁ ପ୍ରାୟ ୩୦ହଜାର ଟଙ୍କା ଖର୍ଚ୍ଚ ହୁଏ । ତାଙ୍କର ଓପନ ହାର୍ଟ ଅସ୍ତ୍ରୋପଚାର ହୋଇଛି । ଫଳରେ ସୋଲ ଫୁଲ ପ୍ରସ୍ତୁତ କରିବାକୁ ସେ ଆବଶ୍ୟକ ସମୟ ଓ ଅର୍ଥ ଯୋଗାଡ଼ କରିପାରୁନାହାନ୍ତି । ଏଣୁ ପ୍ରଶାସନ ପକ୍ଷରୁ ଏହି ମହତ କାର୍ଯ୍ୟରେ ସହାୟତା ମିଳିଲେ ଏହି ପରଂପରା ଆଗକୁ ବଢ଼ିବ, ନଚେତ ବନ୍ଦ ହେବାର ସମ୍ଭାବନା ରହିଛି ବୋଲି କୋହଭରା ହୃଦୟରେ କହିଛନ୍ତି ।
ସ୍ଥାନୀୟ ବିଧାୟକଙ୍କୁ ଏନେଇ ଜଣାଇବା ପରେ ସେ ଜିଲ୍ଲାପାଳଙ୍କୁ ଭେଟିବାକୁ ପରାମର୍ଶ ଦେଇଥିଲେ । ଏଣୁ ଆଜି ସେ ଜିଲ୍ଲାପାଳଙ୍କୁ ସାକ୍ଷାତ କରି ଏନେଇ ସେ ଅବଗତ କରାଇଛନ୍ତି ବୋଲି ଶ୍ରୀ ନାୟକ କହିଛନ୍ତି ।