ଲୋୟର ଇନ୍ଦ୍ର ଜଳ ପ୍ରକଳ୍ପ ଯୋଗୁ ବିସ୍ଥାପନ ପ୍ରସଙ୍ଗ: ସନ୍ଧିବାହାଲି ଗାଁରେ ପହଞ୍ଚିଲା ପ୍ରଶାସନ
ଆଜି ବାସଚ୍ୟୁତ ହେବେ ୨୫ ପରିବାର
କୋମନା: ଚଳିତ ବର୍ଷ ନୂଆପଡ଼ା ଜିଲ୍ଲା ତିଖାଲି ଲୋୟର ଇନ୍ଦ୍ର ଜଳ ପ୍ରକଳ୍ପରେ ଆବଶ୍ୟକ ମୁତାବକ ପାଣି ରଖିବାକୁ ପଦକ୍ଷେପ ନିଆଯାଉଛି। ଏନେଇ ପ୍ରକଳ୍ପକୁ ଲାଗି ରହିଥିବା କୋମନା ବ୍ଲକ ସନ୍ଧିବାହାଲି ଗାଁର ୨୫ଟି ଘର ଭଙ୍ଗା ଯିବା ନେଇ ପ୍ରଶାସନ ପକ୍ଷରୁ ସୂଚନା ଦିଆଯାଇଛି। ହେଲେ କାହା ଘର ଭଙ୍ଗାଯିବ କିମ୍ବା କେଉଁ ଘର ଭଙ୍ଗା ଯିବ ସେ ନେଇ ପ୍ରଶାସନ ପକ୍ଷରୁ କୌଣସି ସୂଚନା ଦିଆଯାଇ ନଥିବାରୁ ଗାଁରେ ଅସନ୍ତୋଷ ଦେଖାଦେଇଥିଲା। ମଙ୍ଗଳବାର ଗ୍ରାମ୍ୟ କମିଟି ଓ ବିସ୍ଥାପିତ ସମିତି ସଦସ୍ୟ ବିଭାଗୀୟ ଅଧିକାରୀଙ୍କ ସହ ଆଲୋଚନା କରିଥିଲେ। ସଂପୃକ୍ତ ଅଧିକାରୀ ଅନ୍ୟ ପଦାଧିକାରୀଙ୍କ ସହ ବୁଧବାର ଗାଁକୁ ଆସି ବିଷଦ୍ ଭାବେ ଆଲୋଚନା କରିବାକୁ ପ୍ରତିଶ୍ରୁତି ଦେଇଥିଲେ।
Sambad is now on WhatsApp
Join and get latest news updates delivered to you via WhatsApp
ସେହି କ୍ରମରେ ବୁଧବାର ପ୍ରଶାସନ ପକ୍ଷରୁ ଏକ ତଦନ୍ତକାରୀ ଦଳ ସନ୍ଧିବାହାଲି ଗାଁରେ ପହଞ୍ଚି ଆବଶ୍ୟକ ତଦନ୍ତ କରିଥିବା ଜଣାପଡ଼ିଛି। ବିସ୍ଥାପିତ ନିୟମ ଅନୁସାରେ ଗାଁର ଯୋଗ୍ୟ ହିତାଧିକାରୀଙ୍କ ମଧ୍ୟରେ ୯୪ ଜଣଙ୍କୁ ସହାୟତା ରାଶି ମିଳିନଥିବା, ୧୦ଜଣ ଭୂମିହୀନ ପୂର୍ବପୁରୁଷରୁ ସରକାରୀ ଜମିରେ ଘରକରି ରହିଆସୁଥିବା, ଅନ୍ୟତ୍ର ଘର ଥିବା ବେଳେ ୩୨ଜଣଙ୍କ ଚାଷ ଜମି ଗାଁରେ ରହିଥିବା, ଚାଷଜମି ହରାଉଥିବା ୧୬ ଜଣ ମୋଟ ୧୫୨ଜଣଙ୍କ ଠାରୁ ପ୍ରମାଣପତ୍ର ସଂଗ୍ରହକରି ତଦନ୍ତକାରୀ ଦଳ ଫେରି ଯାଇଛନ୍ତି। ଏହା ପରେ ସନ୍ଧିବାହାଲି ଗାଁରେ ଶାନ୍ତ ପରିବେଶ ଦେଖାଦେଇଛି। ୨ ତାରିଖ ଗୁରୁବାର ପ୍ରଶାସନ ତରଫରୁ ହେବାକୁଥିବା ଘରଭଙ୍ଗା କାର୍ଯ୍ୟରେ ଗାଁଲୋକେ ସହଯୋଗ କରିବା ପାଇଁ ମତପ୍ରକାଶ କରିଥିଲେ। ଏନେଇ ଏଲ୍ଇଓ ତରଣୀସେନ ସୁନାଙ୍କୁ ପଚାରିବାରୁ ବିଭାଗୀୟ ତରଫରୁ ସନ୍ଧିବାହାଲି ଗାଁକୁ ଏକ ତଦନ୍ତକାରୀ ଦଳ ଯାଇ ତଦନ୍ତ କରି ପ୍ରମାଣପତ୍ର ନେଇ ଆସିଛନ୍ତି। ତାହାକୁ ତଦନ୍ତ କରାଯାଇ ଦିନେ ଦୁଇ ଦିନ ଭିତରେ ଜିଲ୍ଲାପାଳଙ୍କ ପାଖକୁ ପଠାଇ ଦିଆଯିବ। ଏହା ପରେ ଜିଲ୍ଲାପାଳ ଆବଶ୍ୟକ ନିଷ୍ପତ୍ତି ନେବେ ବୋଲି ପ୍ରକାଶ କରିଛନ୍ତି।