ଅଗଷ୍ଟ ୩୧ ଯାଏଁ କଣ୍ଟେନମେଣ୍ଟ ଜୋନରେ ଲାଗୁ ହେବ ଲକଡାଉନ; ଶିକ୍ଷାନୁଷ୍ଠାନ, ଧର୍ମାନୁଷ୍ଠାନ, ସିନେମା ହଲ ଓ ସୁଇମିଂ ପୁଲ ବନ୍ଦ ରହିବ
ଭୁବନେଶ୍ୱର: ଆଜି ରାଜ୍ୟ ସରକାର ଅଗଷ୍ଟ ମାସ ଲାଗି ଗାଇଡଲାଇନ୍ ଜାରି କରିଛନ୍ତି। ସମଗ୍ର ରାଜ୍ୟରେ କଟକଣା କୋହଳ ହୋଇଥିବା ବେଳେ କେବଳ କଣ୍ଟେନମେଣ୍ଟ ଜୋନରେ ସଂପୂର୍ଣ୍ଣ ଭାବେ ଲକଡାଉନ ଜାରି ରହିବ ବୋଲି ଘୋଷଣା କରାଯାଇଛି । ଯେଉଁ ଅଞ୍ଚଳରେ କରୋନା ଆକ୍ରାନ୍ତ ଚିହ୍ନଟ ହେବେ ସେହି ଅଞ୍ଚଳକୁ କଣ୍ଟେନମେଣ୍ଟ ଜୋନ ଘୋଷଣା ହେବ। କିନ୍ତୁ କଣ୍ଟେନମେଣ୍ଟ ଜୋନ ବାହାରେ କଟକଣା କୋହଳ କରାଯିବା ସହ ନିର୍ଦ୍ଦିଷ୍ଟ କଟକଣା ବଳବତ୍ତର ରହିବ । ଅଗଷ୍ଟ ୧ ତାରିଖଠାରୁ ୩୧ ତାରିଖ ଯାଏଁ ଗାଇଡଲାଇ ଜାରି କରିବା ଅବସରରେ ସ୍ୱତନ୍ତ୍ର ରିଲିଫ କମିସନର ପ୍ରଦୀପ କୁମାର ଜେନା ସାମ୍ବାଦିକ ସମ୍ମିଳନୀରେ ଆଜି ଏହି ସୂଚନା ଦେଇଛନ୍ତି । ସେ କହିଛନ୍ତି ଯେ, କଣ୍ଟେନମେଣ୍ଟ ଜୋନରୁ ପ୍ରବେଶ-ପ୍ରସ୍ଥାନ ଉପରେ ପୂରା କଟକଣା ରହିବ। ଏଠାରେ ରହୁଥିବା ଲୋକଙ୍କୁ ଅତ୍ୟାବଶ୍ୟକ ସାମଗ୍ରୀ ପ୍ରଶାସନ ପକ୍ଷରୁ ଯୋଗାଇ ଦିଆଯିବ ।
Sambad is now on WhatsApp
Join and get latest news updates delivered to you via WhatsApp
ଶ୍ରୀ ଜେନା କହିଛନ୍ତି, ଆସନ୍ତାକାଲି ଠାରୁ ଅଗଷ୍ଟ ୩୧ ତାରିଖ ଯାଏଁ ଧାର୍ମାନୁଷ୍ଠାନରେ ନୀତି ଚାଲିବ କିନ୍ତୁ ସାଧାରଣ ଲୋକଙ୍କ ପ୍ରବେଶକୁ ଅନୁମତି ଦିଆଯିବ ନାହିଁ । ସେହିଭଳି ଅନ୍ତର୍ଜାତୀୟ ବିମାନ ମଧ୍ୟ ଚଳାଚଳ କରିବ ନାହିଁ । ସାମାଜିକ କାର୍ଯ୍ୟକ୍ରମ, ରାଜନୈତିକ ସଭା, ଖେଳକୁଦ, ମନୋରଂଜନ କାର୍ଯ୍ୟକ୍ରମ ବନ୍ଦ ରହିବ । ସିନେମା ହଲ ଓ ସୁଇମିଂ ପୁଲ ବନ୍ଦ ରହିବ ।ସେହିପରି ଅଗଷ୍ଟ ୩୧ ଯାଏଁ ସ୍କୁଲ ଓ କଲେଜ ଏବଂ କୋଚିଂ ସେଣ୍ଟରଗୁଡ଼ିକ ବନ୍ଦ ରହିବ । କିନ୍ତୁ ଶିକ୍ଷାନୁଷ୍ଠାନରେ ପରୀକ୍ଷା କରାଯିବା ସହ ଖାତା ଦେଖାଯାଇପାରିବ । ତେବେ ଅଗଷ୍ଟ ୫ ତାରିଖ ଠାରୁ ଯୋଗ ପ୍ରଶିକ୍ଷଣ କେନ୍ଦ୍ର ଖୋଲା କରାଯାଇପାରିବ । ଜିମ ଗୁଡ଼ିକ ଖୋଲିବା ପାଇଁ ମଧ୍ୟ ଅନୁମତି ମିଳିବ । ତେବେ ଏଥିଲାଗି ଏସଓପି ଜାରି କରାଯିବ।
ଅନ୍ୟ ପକ୍ଷରେ ରାତି ୯ଟାରୁ ସକାଳ ୫ଟା ଯାଏଁ ରାତ୍ରିକାଳିନ କର୍ଫ୍ୟୁ ଜାରି ରହିବ ଓ ଦିନବେଳା ପୂର୍ବ ପରି ସମସ୍ତ ବ୍ୟାବସାୟିକ ଅନୁଷ୍ଠାନ, ସରକାରୀ-ବେସରକାରୀ ଅଫିସ, ଶିଳ୍ପ ଅନୁଷ୍ଠାନ ଖୋଲା ରହିବ। କିନ୍ତୁ ସେଠାରେ ସାମାଜିକ ଦୂରତ୍ବକୁ କଡ଼ାକଡ଼ି ଲାଗୁ କରାଯିବ । ତେବେ ରାତିରେ ଜରୁରୀକାଳୀନ ସେବା ପାଇଁ ଅନୁମତି ମିଳିବ । ଅର୍ଥାତ ସ୍ୱାସ୍ଥ୍ୟ ଜନିତ ଯାତାୟତ ପାଇଁ ଯାତାୟତ କରିବାରେ କୌଣସି ଅସୁବିଧା ନାହିଁ । ଅତ୍ୟାବଶ୍ୟକ ସେବାରେ ନିୟୋଜିତ କର୍ମଚାରୀମାନେ ମଧ୍ୟ ଯାତାୟତ କରିପାରିବେ । ପ୍ରିଣ୍ଟ ଓ ଇଲେକଟ୍ରୋନିକ ଗଣମାଧ୍ୟମର ପ୍ରତିନିଧିମାନେ ଅଫିସ ଯାଇପାରିବେ । ଅଗଷ୍ଟ ୧ ଓ ୨ ତାରିଖରେ ସଟଡାଉନ ସାମାନ୍ୟ କୋହଳ କରି ଦିଆଯାଇଛି । ଏହି ୨ ଦିନ ଦିନ ୧ଟାରୁ ରାତି ୯ଟା ଯାଏଁ ସଟଡାଉନ ରହିବ । ଅର୍ଥାତ ଦିନ ଗୋଟିଏ ଯାଏଁ ସବୁ ଖୋଲା ରହିବ ।
ଶ୍ରୀ ଜେନା କହିଛନ୍ତି, ଗଂଜାମ, ଖୋର୍ଦ୍ଧା, ଗଜପତି, କଟକ ଓ ରାଉରକେଲା ମହାନଗର ନିଗମରେ ସପ୍ତାହନ୍ତ ସଟଡାଉନ କଟକଣା ରହିବ । ଶିଳ୍ପ ଓ କାରଖାନା ଓ ନିର୍ମାଣ କାମ ପୂର୍ବଭଳି ଚାଲୁ ରହିବ । ଜାତୀୟ ରାଜପଥ କଡ଼ ଢାବାରୁ ଖାଦ୍ୟ ପୁଡ଼ିଆ ନେଇହେବ । ସଟଡାଉନରେ ପୂର୍ବର କଟକଣା ଜାରି ରହିବ ।
ସେହିଭଳି ରାଜ୍ୟ ବାହାରୁ ଆସିଥିବା ବ୍ୟକ୍ତି ୩ ଦିନରୁ ଅଧିକ ସମୟ ରହିଲେ କ୍ୱାରେଣ୍ଟାଇନରେ ରହିବେ । ନିୟମ ନ ମାନିଲେ କଡ଼ାକାର୍ଯ୍ୟାନୁଷ୍ଠାନ ନିଆଯିବ । କୋଭିଡ ନିୟମ ପାଳନ କରି ସେଲୁନ ଓ ସ୍ପା ଖୋଲାଯାଇପାରିବ । ବାହଘରରେ କୌଣସି ପ୍ରକାରରେ ୫୦ରୁ ଅଧିକ ଲୋକ ରହିପାରିବେ ନାହିଁ । ବର, କନ୍ୟା ପକ୍ଷ ସମସ୍ତଙ୍କୁ ମିଶାଇ ୫୦ ଜଣ ଲୋକ ଉପସ୍ଥିତ ରହିପାରିବେ । ଶୁଦ୍ଧିକ୍ରିୟା କାର୍ଯ୍ୟରେ ୨୦ରୁ ଅଧିକ ଲୋକଙ୍କୁ ଏକତ୍ର ହେବା ପାଇଁ ଅନୁମତି ମିଳିବ ନାହିଁ । ବାହାଘର ଓ ଶୁଦ୍ଧିକ୍ରିୟାରେ ନିୟମ ଉଲ୍ଲଂଘନ ହେଲେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ।
ସରକାରୀ ଓ ବେସରକାରୀ କାର୍ଯ୍ୟାଳୟ ପାଇଁ ମଧ୍ୟ ଗାଇଡଲାଇନ ଜାରି ହୋଇଛି । କାର୍ଯ୍ୟାଳୟରେ ମାସ୍କ ପିନ୍ଧି ଓ ସାମାଜିକ ଦୂରତା ପାଳନ କରି କାମ କରିବାକୁ ହେବ । ନିୟମ ବିରୋଧରେ ଗଲେ ଅଫିସର ମୁଖ୍ୟଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ । ସେହିଭଳି ଅଗଷ୍ଟ ମାସରେ ୫୦ ପ୍ରତିଶତ କର୍ମଚାରୀଙ୍କୁ ନେଇ କାମ କରାଯିବ । ଗ୍ରୁପ-ଏ ସହ ସମସ୍ତ କର୍ମଚାରୀଙ୍କୁ ମିଶାଇ ୫୦ ପ୍ରତିଶତ ହେବା ଦରକାର । କରୋନା ସଂକ୍ରମଣ ବଢୁଥିବାରୁ ରାଜ୍ୟ ସରକାର ଏଭଳି ପଦକ୍ଷେପ ନେଇଛନ୍ତି । ପ୍ରତି ସପ୍ତାହର ଶନିବାର ସମସ୍ତ ସରକାରୀ କାର୍ଯ୍ୟାଳୟ ବନ୍ଦ ରହିବ ।