ମା’ ମାଣିକେଶ୍ୱରୀଙ୍କ ଛତର ଯାତ୍ରାରେ ବଳି ବନ୍ଦ ମାମଲା : ହାଇକୋର୍ଟଙ୍କ ନିର୍ଦ୍ଦେଶ ସୁପ୍ରିମକୋର୍ଟରେ ଖାରଜ
ଭବାନୀପାଟଣା : କଳାହାଣ୍ଡିର ପ୍ରସିଦ୍ଧ ମା’ ମଣିକେଶ୍ୱରୀଙ୍କ ଛତରଯାତ୍ରାରେ ବଳି ବନ୍ଦ ନେଇ ହାଇକୋର୍ଟଙ୍କ ନିର୍ଦ୍ଦେଶକୁ ଆଜି ମାନ୍ୟବର ସୁପ୍ରିମକୋର୍ଟ ଖାରଜ କରିଥିବା ଘଟଣା ସାଧାରଣରେ ଚର୍ଚ୍ଚାର ବିଷୟ ହୋଇଛି ।
Sambad is now on WhatsApp
Join and get latest news updates delivered to you via WhatsApp
ପ୍ରାପ୍ତ ସୂଚନାରୁ ପ୍ରକାଶ ଯେ, କଳାହାଣ୍ଡି ଜିଲ୍ଲାର ମା’ ମଣିକେଶ୍ୱରୀଙ୍କ ଛତରଯାତ୍ରାରେ ବଳିପ୍ରଥା ବନ୍ଦ ପାଇଁ ଆବେଦନକାରୀ ଜୟନ୍ତୀ ଦାସଙ୍କ ରିଟ ପିଟିସନ ୧୯୮୨୭/୨୦୧୭ର ମାମଲା ଶୁଣାଣି କରି ମାନ୍ୟବର ହାଇକୋର୍ଟ ୨୦୨୦ ମସିହା ଜାନୁୟାରୀ ୬ ତାରିଖରେ ଛତରଯାତ୍ରାରେ ବଳିପ୍ରଥା ବନ୍ଦ ପାଇଁ ନିର୍ଦ୍ଦେଶ ଦେଇଥିଲେ । ଏହାକୁ ଚ୍ୟାଲେଞ୍ଜ କରି ଭବାନୀପାଟଣା ସହରର ଭବାନୀ ଶଙ୍କର ନିଆଲ ମାନ୍ୟବର ସୁପ୍ରିମକୋର୍ଟରେ ଏକ ରିଟ ପିଟିସନ ଦାୟର କରିଥିଲେ । ଏହି ମାମଲାକୁ ସୁପ୍ରିମକୋର୍ଟର ମୁଖ୍ୟ ବିଚାରପତିଙ୍କ ଅଧ୍ୟକ୍ଷତାରେ ଜଷ୍ଟିସ ଏ.ଏସ ବୋପାନ୍ନା, ଜଷ୍ଟିସ ଭି. ରାମ ସୁବ୍ରମଣ୍ୟମ ଆଜି ମାମଲାର ବିଚାର କରି ଓଡ଼ିଶା ହାଇକୋର୍ଟର ନିର୍ଦ୍ଦେଶକୁ ଅନ୍ତରୀଣ ସ୍ଥଗିତ ପାଇଁ ନିର୍ଦ୍ଦେଶ ଦେଇଛନ୍ତି । ଆବେଦନକାରୀଙ୍କ ପକ୍ଷରୁ ଆଇନଜୀବୀ କିରଣ କୁମାର ପାତ୍ର ମାମଲା ପରିଚାଳନା କରିଥିଲେ ।
ସୂଚନାଯୋଗ୍ୟ ଯେ ପ୍ରତିବର୍ଷ ଭବାନୀପାଟଣା ସହରସ୍ଥିତ ମା’ ମାଣିକେଶ୍ୱରୀଙ୍କ ଛତରଯାତ୍ରା ଜେନାଖାଲରୁ ରାଜ ପ୍ରାସାଦକୁ ଫେରିବା ବେଳେ ଭକ୍ତଙ୍କ ମାନସିକ ଅନୁଯାୟୀ ବଳି ଦିଆଯାଇଥାଏ । ବଳି ଯୋଗୁଁ ଯାତ୍ରା ରକ୍ତରଞ୍ଜିତ ହୋଇଥାଏ । ଦୀର୍ଘଦିନରୁ ଚଳି ଆସିଥିବା ଏହି ପରମ୍ପରାକୁ ବନ୍ଦ ପାଇଁ ହାଇକୋର୍ଟରେ ଜନସ୍ବାର୍ଥ ମାମଲା ଦାୟର ହୋଇଥିଲା । ଭକ୍ତଙ୍କ ଆବେଗକୁ ଦୃଷ୍ଟିରେ ରଖି ଆବେଦନକାରୀ ଭବାନୀ ଶଙ୍କର ନିଆଲ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଥିଲେ । ଆଜି ସୁପ୍ରିମକୋର୍ଟରେ ମାମଲା ସ୍ଥଗିତ ହେବା ପରେ ଭକ୍ତ ମାନଙ୍କ ମଧ୍ୟରେ ଆଶ୍ୱସ୍ଥି ପ୍ରକାଶ ପାଇଛି ।