ଭୁବନେଶ୍ୱର: କାଲି ଶେଷ ପର୍ଯ୍ୟାୟ ନିର୍ବାଚନ ସରିବା ପରେ ପରେ ଆରମ୍ଭ ହୋଇଯିବ ବୁଥ ବାହୁଡ଼ା ମତ ଆଧାରରେ ଚର୍ଚ୍ଚା । ୨୩ରେ ମତଗଣନା ହେବା ପୂର୍ବରୁ କିଏ ବାଜିମାତ କରିବ, କିଏ ସରକାର ଗଢ଼ିବ, କିଏ କିଙ୍ଗମେକର ସାଜିବ, ଆଞ୍ଚଳିକ ଦଳର ଭୂମିକା କ’ଣ ହେବ? ଏ ନେଇ ଗଣମାଧ୍ୟମରେ ଜୋରଦାର ଚର୍ଚ୍ଚା ଆରମ୍ଭ ହେବ। ତେବେ ନିଜ ନିଜ ହିସାବରେ ନେତା ରାଜନୈତିକ ଅଙ୍କ କଷା ଜାରି ରଖିଛନ୍ତି । ପ୍ରଧାନମନ୍ତ୍ରୀ ପଦ ପାଇଁ ନବୀନ ଯୋଗ୍ୟ ପ୍ରାର୍ଥୀ ବୋଲି ଗତକାଲି ସୂର୍ଯ୍ୟ ପାତ୍ର କହିବା ପରେ ଏହାକୁ ନେଇ ଚର୍ଚ୍ଚା ସରଗରମ ହୋଇଛି । ବିଜେଡିର ଦୁଇ ବରିଷ୍ଠ ନେତା ସୂର୍ଯ୍ୟ ପାତ୍ରଙ୍କ ସହ ସ୍ୱର ମିଳାଇଥିବା ବେଳେ ଦାମ ରାଉତ କଟାକ୍ଷ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ପ୍ରଧାନମନ୍ତ୍ରୀ ପଦ ପାଇଁ ନବୀନ ଯୋଗ୍ୟ ପ୍ରାର୍ଥୀ ବୋଲି ସୂର୍ଯ୍ୟ ପାତ୍ର କହିବା ପରେ ତାଙ୍କ ସହ ସ୍ୱର ମିଳାଇଛନ୍ତି ବିଜେଡିର ଦୁଇ ବରିଷ୍ଠ ନେତା ପ୍ରଫୁଲ୍ଲ ଘଡେଇ ଓ ପ୍ରସନ୍ନ ଆଚାର୍ଯ୍ୟ । ଚାର ଚାରି ଥର ଓଡ଼ିଶାର ମୁଖ୍ୟମନ୍ତ୍ରୀ ହୋଇ ନବୀନ ଭାରତବର୍ଷର ଜଣେ ଲୋକପ୍ରିୟ ନେତା ହୋଇପାରିଛନ୍ତି ବୋଲି କହିଛନ୍ତି ଦୁଇ ନେତା ।
ସେପଟେ ସୂର୍ଯ୍ୟ ପାତ୍ରଙ୍କ ମନ୍ତବ୍ୟକୁ ବିଜେପି ନେତା ଦାମ ରାଉତ କଟାକ୍ଷ କରିଛନ୍ତି । ସେ କଟାକ୍ଷ କରି କହିଛନ୍ତି ନବୀନ ପ୍ରଧାନମନ୍ତ୍ରୀ ହେଲେ ସୂର୍ଯ୍ୟ ପେଟ୍ରୋଲିୟମ ମନ୍ତ୍ରୀ ହେବେ ବୋଲି ଭାବୁଛନ୍ତି । ଅନ୍ୟପଟେ ୟୁପିଏ ସରକାର ଗଢ଼ିଲେ ନବୀନ ସମର୍ଥନ ଦେବେ ବୋଲି ଆଶା ବାନ୍ଧି ବସିଛନ୍ତି ରାଜ୍ୟର କଂଗ୍ରେସର ତୁଙ୍ଗ ନେତା । ତେବେ କେନ୍ଦ୍ରରେ କାହାକୁ ସଂଖ୍ୟା ଗରିଷ୍ଠତା ମିଳିବ ନାହିଁ, ଆଞ୍ଚଳିକ ଦଳଗୁଡିକ ସରକାର ଗଠନରେ ନିର୍ଣ୍ଣାୟକ ଭୂମିକା ଗ୍ରହଣ କରିବେ ବୋଲି ଆକଳନ ଚାଲିଛି । ଏପରି ସ୍ଥିତି ଉପୁଜିଲେ ଜାତୀୟ ଦୃଶ୍ୟପଟରେ ବିଜେଡିର ଗୁରୁତ୍ୱ ବୃଦ୍ଧି ପାଇବ ବୋଲି ନେତା ଅଙ୍କ କଷୁଛନ୍ତି ।