ମୁଣ୍ଡଳିରେ ବୃଦ୍ଧି ହେଲା ଜଳସ୍ତର, ବନ୍ୟା ଜଳରେ ଅଂଶୁପା ହ୍ରଦ ପାର୍କ ବୁଡ଼ିଲା
କଟକ: ମୁଣ୍ଡଳିରେ ହୀରାକୁଦ ଡ୍ୟାମ ୪୬ଟି ଗେଟ ଦେଇ ଛାଡ଼ୁଥିବା ପାଣି ପହଞ୍ଚିବା ପରେ ବୃଦ୍ଧି ହୋଇଛି ଜଳସ୍ତର । ହୀରାକୁଦ ଡ୍ୟାମରୁ ଶୁକ୍ରବାର ନିଷ୍କାସିତ ପ୍ରାୟ ୧୦ରୁ ସାଢ଼େ ୧୦ ଲକ୍ଷ କ୍ୟୁସେକ ଜଳ ମୁଣ୍ଡଳିରେ ପହଞ୍ଚିଛି । ଏହି ବନ୍ୟାଜଳ ଆଜି ରାତି ସୁଦ୍ଧା କଟକ, ଜଗତସିଂହପୁର ଓ ପୁରୀ ଆଦି ଜିଲ୍ଲା ଦେଇ ପ୍ରବାହିତ ହୋଇଥିବା ବିଭିନ୍ନ ନଦୀରେ ପଶିବ। ଏହାର ପ୍ରଭାବରେ ମହାନଦୀ ଓ ଏହାର ଶାଖା ନଦୀ ଗୁଡିକର ଜଳସ୍ତର ଅଧିକାଂଶ ସ୍ଥାନରେ ବିପଦ ସଂକେତ ଉପରେ ପ୍ରବାହିତ ହେଉଥିବା ଜଣାଯାଇଛି।
Sambad is now on WhatsApp
Join and get latest news updates delivered to you via WhatsApp
ନରାଜଠାରେ ମହାନଦୀରେ ବିପଦ ସଂକେତଠାରୁ ଉପରେ ବନ୍ୟାଜଳ ପ୍ରବାହିତ ହେଉଛି । ସେହିପରି ଆଳି ପିଙ୍ଗଳଠାରେ ଜଳସ୍ତର ବଢ଼ିବାରେ ଲାଗିଛି । ଦୟା, ଭାଗର୍ବି, କୁଶଭଦ୍ରା, ଚିତ୍ରୋତ୍ପଳା ସମେତ ଶାଖା ନଦୀଗୁଡିକ ଟଳମଟଳ ହେଲାଣି । ନଦୀ ଗୁଡିକର ଏପରି ରୂପ ଦେଖି ନଦୀ କୂଳିଆ ଅଞ୍ଚଳରେ ବସବାସ କରୁଥିବା ଲକ୍ଷ ଲକ୍ଷ ଲୋକ ଛାନିଆ ହୋଇ ଯାଇଛନ୍ତି । ଏବେଠାରୁ ବିଭିନ୍ନ ଜିଲ୍ଲାର କେତେକ ଗାଁରେ ପାଣି ପଶିବା ଆରମ୍ଭ ହୋଇଗଲାଣି ।
ଖାଲି ସେତିକି ନୁହେଁ, ମହାନଦୀର ବନ୍ୟା ଜଳରେ ଅଂଶୁପା ହ୍ରଦ ପାର୍କ ବୁଡ଼ିଯାଇଥିବାର ଖବର ମିଳିଛି। ପାର୍କରେ ୮ରୁ ୧୦ ଫୁଟ୍ର ବନ୍ୟାଜଳ ପ୍ରବାହିତ ହେଉଥିବା ଜଣାଯାଇଛି। ଏଣେ କଟକ ଜିଲ୍ଲାର ଉତ୍ତର ବାଙ୍କୀ ଓ ତିଗିରିଆ ବ୍ଲକର ୯ ପଞ୍ଚାୟତ ପାଣି ଘେରରେ ଥିବାର ସୂଚନା ମିଳିଛି।