ମହାନଦୀରେ ଜଳପ୍ରବାହ କମିଛି: ଜଳସମ୍ପଦ ମନ୍ତ୍ରୀ

ଭୁବନେଶ୍ବର: ମହାନଦୀରେ କମିଛି ଜଳପ୍ରବାହ। ଜଳପ୍ରବାହକୁ ରୋକିବା ପାଇଁ ଛତିଶଗଡ଼ ସରକାର କେତେଗୋଟି ଚେକ ଡ୍ୟାମ କରିଛନ୍ତି, ଏହା ଦ୍ୱାରା ଅଣମୌସୁମୀ ସମୟରେ ମହାନଦୀକୁ ଜଳ ପ୍ରବାହ କମୁଛି କି ? ମହାନଦୀରେ ଜଳ ପ୍ରବାହ ବିବାଦର ସମାଧାନ ପାଇଁ ସରକାର କି କି ଆଇନଗତ ପଦକ୍ଷେପ ନେଇଛନ୍ତି, କେନ୍ଦ୍ର ସରକାର ଏହି ପ୍ରସଙ୍ଗରେ ଓଡିଶାକୁ କି ପ୍ରକାର ବିରୋଧ କରୁଛନ୍ତି ? ଗୃହରେ ବିଧାୟକ ତାରା ପ୍ରସାଦ ବାହିନୀପତିଙ୍କ ପ୍ରଶ୍ନରେ ଏହି ଉତ୍ତର ରଖିଛନ୍ତି ଜଳସମ୍ପଦ ମନ୍ତ୍ରୀ ରଘୁନନ୍ଦନ ଦାସ।

ମହାନଦୀରେ ଜଳପ୍ରବାହ ରୋକିବାକୁ ଛତିଶଗଡ଼ ସରକାର ପାଖାପାଖି ୫୧୬ ଚେକ ଡ୍ୟାମ କରିଛନ୍ତି। ଏହି ଚେକ ଡ୍ୟାମ ନିର୍ମାଣ ଦ୍ୱାରା ବାସ୍ତବରେ ଅଣମୌସୁମୀ ସମୟରେ ହୀରାକୁଦଠାରେ ମହନଦୀକୁ ଜଳ ପ୍ରବାହ କମିଛି। ହୀରାକୁଦ ଜଳଭଣ୍ଡାରକୁ ୨ ମିଲିଅନ ଏକର ଫୁଟ ମୌସୁମୀ ଜଳ ପ୍ରବାହ ଆସିବାକୁ ଥିବା ବେଳେ ଗତ ୧୯୯୧-୯୨ ରୁ ୨୦୦୪-୦୫ ମଧ୍ୟରେ ହାରାହାରି ୪ ପ୍ରତିଶତ ଏବଂ ୨୦୦୫-୦୬ ରୁ ୨୦୧୫-୧୬ ମଧ୍ୟରେ ୩୭ ପ୍ରତିଶତ କମିଛି। ସେହିପରି ୨୦୧୬-୧୭ ରେ ୬୫ ପ୍ରତିଶତ, ୨୦୧୭-୧୮ ରେ ୬୧ ପ୍ରତିଶତ, ୨୦୧୮-୧୯ ରେ ୫୭ ପ୍ରତିଶତ ଏବଂ ୨୦୧୯-୨୦ ରେ ୩ ପ୍ରତିଶତ ଜଳପ୍ରବାହ କମିଛି।

ମହାନଦୀରେ ଜଳପ୍ରବାହ ବିବାଦର ମହାନଦୀ ଟ୍ରିବ୍ୟୁନାଲରେ ଅବବାହିକା ରାଜ୍ୟ ଯଥା ଓଡ଼ିଶା , ଛତିଶଗଡ଼, ମଧ୍ୟପ୍ରଦେଶ, ମହାରାଷ୍ଟ୍ର ଓ ଝାଡ଼ଖଣ୍ଡ ପକ୍ଷଭୁକ୍ତ ଅଛନ୍ତି, କିନ୍ତୁ କେନ୍ଦ୍ର ସରକାର ଏଥିରେ ପକ୍ଷଭୁକ୍ତ ନାହାନ୍ତି।