ମେକ୍ ଇନ୍ ଓଡ଼ିଶା କନ୍କ୍ଲେଭ୍ : ଟାଟା ୨୫ ହଜାର କୋଟି, ରିଲାଏନ୍ସ ୩ହଜାର କୋଟି, ବିର୍ଲା ୨ ବିଲିୟନ ଡଲାର ପୁଞ୍ଜିନିବେଶ ପାଇଁ କଲେ ଘୋଷଣା
ଆହୁରି ବହୁ ଭାରତୀୟ ଓ ବିଦେଶୀ ଶିଳ୍ପପତି ଓ କମ୍ପାନିମାନେ ମଧ୍ୟ ପୁଞ୍ଜିନିବେଶ ପାଇଁ ଆଗ୍ରହୀ
ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଗତ କାଲି ଠାରୁ ଭୁବନେଶ୍ୱର ଠାରେ ଆୟୋଜିତ ହୋଇଥିବା ‘ବିଜିନେସ୍ ଲିଡରସିପ୍ ସମିଟ୍’ ଓ ‘ମେକ୍ ଇନ୍ ଓଡ଼ିଶା’ କନ୍କ୍ଲେଭ୍’ ରାଜ୍ୟ ପାଇଁ ବେଶ ଫଳପ୍ରଦ ଓ ଲାଭଦାୟକ ସାବ୍ୟସ୍ତ ହୋଇଛି। ଏହି ଦୁଇ ଦିନଆ ସମିଟ୍ ଓ କନ୍କ୍ଲେଭ୍ରେ ଦେଶର ପ୍ରାୟ ସମସ୍ତ ବଡ଼ ବଡ଼ ଶିଳ୍ପଦ୍ୟୋଗୀ ଓ ଶିଳ୍ପପତିମାନେ ଯୋଗ ଦେବା ସହ ରାଜ୍ୟର ଶିଳ୍ପ ଅନୁକୂଳ ବାତାବରଣକୁ ଅନୁଧ୍ୟାନ କରିବା ପରେ ଆଗାମୀ ଦିନରେ ରାଜ୍ୟରେ ବିପୁଳ ପରିମାଣର ପୁଞ୍ଜିନିବେଶ କରିବେ ବୋଲି ଘୋଷଣା କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଏହି କ୍ରମରେ ଦେଶର ସବୁଠାରୁ ବଡ଼ ଓ ବିଶିଷ୍ଟ ଶିଳ୍ପପତି ରିଲାଏନ୍ସ ଗ୍ରୁପ୍ ଅଫ୍ ଇଣ୍ଡଷ୍ଟ୍ରିଜ୍ର ଅଧ୍ୟକ୍ଷ ମୁକେଶ ଅମ୍ବାନୀ ଏହି ଦୁଇ ଦିନଆ ସମିଟ୍ ଓ କନ୍କ୍ଲେଭ୍ରେ ଯୋଗଦେଇ ତାଙ୍କ କମ୍ପାନି ଆଗାମୀ ତିନି ବର୍ଷ ମଧ୍ୟରେ ଓଡ଼ିଶାରେ ୩ହଜାର କୋଟି ଟଙ୍କାର ପୁଞ୍ଜିନିବେଶ କରିବ ବୋଲି ଘୋଷଣା କରିଛନ୍ତି। ପୂର୍ବରୁ ରାଜ୍ୟରେ ୬ହଜାର କୋଟିର ପୁଞ୍ଜିନିବେଶ କରିଥିବା ରିଲାଏନ୍ସ କମ୍ପାନି ଏଥର ପୁଣି ୩ ହଜାର କୋଟି ଟଙ୍କାର ପୁଞ୍ଜିନେବେଶ କରିବା ସହ ରାଜ୍ୟରେ ୩୦ ହଜାର ପ୍ରତ୍ୟକ୍ଷ ଓ ପରୋକ୍ଷ ନିଯୁକ୍ତି ସୁଯୋଗ ସୃୃଷ୍ଟି କରିବେ ବୋଲି ମଧ୍ୟ ଘୋଷଣା କରିଛନ୍ତି।
ସେହିପରି ଟାଟା ସନସ୍ ଗ୍ରୁପ୍ର ଅଧ୍ୟକ୍ଷ ନଟରାଜନ୍ ଚନ୍ଦ୍ରଶେଖରନ୍ ତାଙ୍କ କମ୍ପାନି ଓଡ଼ିଶାରେ ୨୫ ହଜାର କୋଟିର ପୁଞ୍ଜି ନିବେଶ କରିବ ବୋଲି ଘୋଷଣା କରିଛନ୍ତି। ଏହା ପୂର୍ବରୁ ଟାଟା କମ୍ପାନି ଓଡ଼ିଶରେ ୭୫ ହଜାର କୋଟିର ପୁଞ୍ଜି ନିବେଶ କରି ସାରିଥିବା ବେଳେ ଏବେ ୨୫ ହଜାର କୋଟିର ନୂତନ ନିବେଶ ପରେ ସମୁଦାୟ ପୁଞ୍ଜିନିବେଶର ପରିମାଣ ୧ଲକ୍ଷ କୋଟି ହେବ ବୋଲି ସେ କହିଛନ୍ତି। ସେହିପରି ବିର୍ଲା ଗ୍ରୁପ୍ର ଅଧ୍ୟକ୍ଷ କୁମାର ମଙ୍ଗଲମ୍ ବିର୍ଲା ଆଗାମୀ ୨ ବର୍ଷ ମଧ୍ୟରେ ତାଙ୍କ କମ୍ପାନି ଓଡ଼ିଶାରେ ୨ ବିଲିୟନ ଡଲାରର ପୁଞ୍ଜି ଓଡ଼ିଶାରେ ନିବେଶ କରିବ ବୋଲି ସେ ଘୋଷଣା କରିଛନ୍ତି। ସେହିପରି ଏହି ଏହି ଦୁଇ ଦିନଆ ସମିଟ୍ ଓ କନ୍କ୍ଲେଭ୍ରେ ଯୋଗ ଦେଇଥିବା ଉଭୟ ଭାରତୀୟ ଓ ବିଦେଶୀ ଶିଳ୍ପପତି ଓ କମ୍ପାନିମାନେ ମଧ୍ୟ ଆଗାମୀ ଦିନରେ ରାଜ୍ୟରେ ବିପୁଳ ପରିମାଣର ପୁଞ୍ଜିନିବେଶ କରିବା ପାଇଁ ଘୋଷଣା କରିଛନ୍ତି।