କୋରାପୁଟ ଜିଲ୍ଲାରେ କୁପୋଷଣ ସ୍ଥିତିରେ ସୁଧାର ଆସୁଛି
କୋରାପୁଟ : ଆଦିବାସୀ ଅଧ୍ୟୁଷିତ କୋରାପୁଟ ଜିଲ୍ଲାରେ କୁପୋଷଣ ରୋକିବା ନିମନ୍ତେ ସରକାର ବିଭିନ୍ନ ପଦକ୍ଷେପ ନେଇଛନ୍ତି। ବିଭନ୍ନ ଗ୍ରାମରେ ତୃଣମୂଳ ସ୍ତରର ମା ମାନଙ୍କୁ ଖାଦ୍ୟପେୟ ସହ ଉପଯୁକ୍ତ ଚିକିତ୍ସା ନିମନ୍ତେ ତାଲିମ ଓ ପରାମର୍ଶ ଦିଆଯାଉଛି। ଫଳରେ କୁପୋଷଣର ମାତ୍ରା ବେଶ୍ କମୁଥିବା ଦେଖିବାକୁ ମିଳିଛି।
Sambad is now on WhatsApp
Join and get latest news updates delivered to you via WhatsApp
କୋରାପୁଟ ଜିଲ୍ଲା ସବୁବେଳେ ଏଠାକାର କଳା ଓ ସଂସ୍କୃତିକୁ ନେଇ ପରିଚିତ ହୋଇ ଆସିଛି। କିନ୍ତୁ ଏଠାକାର କୁପୋଷଣ ଜନିତ ଶିଶୁମୃତ୍ୟୁ ଏବଂ ପ୍ରସବ ଜନିତ ସମସ୍ୟା ଯୋଗୁଁ ମାତୃ ମୃତ୍ୟୁହାର ପ୍ରତିଶତ ଢେର ଅଧିକ ରହିଆସୁଥିଲା। ଏଥି ନିମନ୍ତେ ସରକାର ଯୋଜନା ମାନ ପ୍ରସ୍ତୁତ କରି ତୃଣମୂଳ ସ୍ତରରୁ କାର୍ଯ୍ୟକାରୀ କରିବାକୁ ଲାଗିଲେ। ଫଳରେ ଆଶା ଏବଂ ଅଙ୍ଗନବାଡି କର୍ମୀ ମାନେ ଗାଁ ଗାଁରେ ନବଜାତ ଶିଶୁ, ବଢ଼ିଲା ଶିଶୁ ଏବଂ ମା ମାନଙ୍କୁ ଖାଦ୍ୟାଭ୍ୟାସ ଓ ସ୍ୱାସ୍ଥ୍ୟ ସଚେତନ କରିବାକୁ ପ୍ରୟାସ ଜାରି ରଖିଛନ୍ତି। ଏହା ଛଡ଼ା ୟୁନିସେଫ ଓ ସାମାଜିକ ସଂଗଠନ ସିନି ତରଫରୁ କାର୍ଯ୍ୟକାରୀ ହେଉଥିବା ଅତିଶୟ ପୁଷ୍ଟିହୀନତା ପରିଚାଳନା ଏବଂ ନବଜାତ ଓ ବଢ଼ିଲା ଶିଶୁର ଉପଯୁକ୍ତ ଖାଦ୍ୟ ଅଭ୍ୟାସ ସମ୍ପର୍କିତ ଦୁଇଟି କାର୍ଯ୍ୟକ୍ରମ ବେଶ୍ ସଫଳ ହୋଇଛି। ଏହି କାର୍ଯ୍ୟକ୍ରମ ମାଧ୍ୟମରେ ପ୍ରଶିକ୍ଷଣ ନେଇ ବାଗରାଗୁଡ଼ା ଗ୍ରାମର ଦମାଇ ଖରା ନିଜର ୨ ବର୍ଷର ଶିଶୁକୁ କୁପୋଷଣରୁ ମୁକ୍ତ କରି ପାରିଥିବା କହିଛନ୍ତି।
ସେହିଭଳି ପଦ୍ମପୁର ଗ୍ରାମର ସରିତା ସିଂ ୩ଟି ଶିଶୁର ମା ହୋଇଥିବା ବେଳେ ଆଶା, ଅଙ୍ଗନବାଡି ଓ ଏଏନଏମଙ୍କ ପରାମର୍ଶ ମାନିବା ସହ ନିଜ ଶିଶୁ ମାନଙ୍କୁ ଠିକ୍ ଭାବେ ଖୁଆଇ ଅପୁଷ୍ଟିରୁ ଦୂରେଇ ରଖି ପାରିଛନ୍ତି। ପୂର୍ବରୁ ଏହି ଅଞ୍ଚଳରେ କୁପୋଷଣ ହାର ବେଶ୍ ଅଧିକ ରହିଥିଲା। ଏଥିପାଇଁ ଜିଲ୍ଲାର କୋଣ ଅନୁକୋଣରେ କିଭଳି ଶିଶୁ ଏବଂ ମାତୃ ମୃତ୍ୟୁହାର କମିବ ସେଥି ନେଇ ଉଦ୍ୟମ ଜାରି ରହିଛି। ପ୍ରସୂତି ମା ମାନେ କିପରି ପୁଷ୍ଟିକର ଖାଦ୍ୟ ଖାଇବେ, ଶିଶୁ ସ୍ତନ୍ୟପାନ ଓ ବୟସ ଅନୁଯାୟୀ ଶିଶୁଙ୍କ ଖାଦ୍ୟପେୟ ଉପରେ ଗୁରୁତ୍ୱ ଦିଆଯାଉଛି। ସ୍ଥାନୀୟ ଅଞ୍ଚଳରେ ମିଳୁଥିବା ମାଣ୍ଡିଆ ଓ ସୁଆଁ ବ୍ୟବହାର ଉପରେ ମଧ୍ୟ ଗୁରୁତ୍ୱ ଦିଆଯାଉଛି। ଏଏନ୍ଏମ୍ ପ୍ରତ୍ୟକ ମାସର ୨ଟି ଗୁରୁବାର ଦିନ ମା ମାନଙ୍କୁ ସ୍ୱାସ୍ଥ୍ୟ ପରୀକ୍ଷା କରିବା ସହ କୁପୋଷଣ ଶିଶୁଙ୍କୁ ପୁଷ୍ଟି ସାଧନ କେନ୍ଦ୍ରକୁ ନେଉଥିବା ଶିଶୁ ମଙ୍ଗଳ ଅଧିକାରୀ ପ୍ରଭାତୀ ରାଣୀ ତ୍ରିପାଠୀ କହିଛନ୍ତି।