ସଡ଼କ ଦୁର୍ଘଟଣାରେ ଯୁବକ ମୃତ, ବର୍ଷେ ତଳେ ସ୍ତ୍ରୀ ମରିଥିଲେ,ଏବେ ୪ ବର୍ଷର ଶିଶୁପୁତ୍ର ଅନାଥ
ସିନ୍ଧେକେଲା: ବଲାଙ୍ଗୀର ଜିଲ୍ଲା ସିନ୍ଧେକେଲା ଥାନା ଅନ୍ତର୍ଗତ ଜାମତରା ଗ୍ରାମର ବୈକୁଣ୍ଠ ବାଗଙ୍କ ପୁଅ ବେଣୁ ବାଗ (୨୯ବର୍ଷ)ଙ୍କ ସଡ଼କ ଦୁର୍ଘଟଣାରେ ମୃତ୍ୟୁ ହୋଇଛି। ବେଣୁ କୌଣସି କାମରେ ଯାଇ ଗୁରୁବାର ରାତିରେ ବାଇକ୍ (ଓଡି୨୬ – ୭୫୪୬)ରେ ଘରକୁ ଫେରୁଥିଲେ। ଏହି ସମୟରେ ଜାମତରା ଗ୍ରାମର ନର୍ସରି ନିକଟରେ କୌଣସି କାରଣରୁ ବିପରୀତ ଦିଗରୁ ଆସୁଥିବା ଆଉ ଏକ ବାଇକ ସହ ମୁହାମୁହିଁ ଧକ୍କା ହୋଇଥିଲା। ଘରଲୋକେ ଖବର ପାଇ ୧୦୮ଆମ୍ବୁଲାନ୍ସ ଯୋଗେ ଟିଟିଲାଗଡ଼ ଡାକ୍ତରଖାନାକୁ ନେଇଥିଲେ।
Sambad is now on WhatsApp
Join and get latest news updates delivered to you via WhatsApp
ଅବସ୍ଥା ସଙ୍କଟାପନ୍ନ ଥିବାରୁ ସେଠାରୁ ବଲାଙ୍ଗୀର ଭୀମଭୋଇ ମେଡିକାଲ କଲେଜ ଡାକ୍ତରଖାନାକୁ ସ୍ଥାନାନ୍ତର କରିଥିଲେ। ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କ ମୃତ୍ୟୁ ଘଟିଥିଲା। ଶବ ବ୍ୟବଚ୍ଛେଦ ପରେ ଶୁକ୍ରବାର ପରିବାର ଲୋକେ ଗାଁକୁ ମୃତଦେହ ଆଣି ଗାଁ ଶ୍ମଶାନରେ ଶେଷକୃତ୍ୟ ସମ୍ପନ୍ନ କରିଛନ୍ତି। ପ୍ରକାଶ ଥାଉକି ମୃତ ବେଣୁଙ୍କ ସ୍ତ୍ରୀ ଗତବର୍ଷ ପ୍ରାଣ ହରାଇଥିଲେ। ଏବେ ବେଣୁଙ୍କ ମୃତ୍ୟୁ ପରେ ତାଙ୍କ ୪ ବର୍ଷର ଶିଶୁପୁତ୍ର ଅନାଥ ହୋଇ ଯାଇଛି। ସେ ଏବେ ନିଜ ଜେଜେମା’ ଓ ଜେଜେବାପାଙ୍କ ପାଖରେ ରହିଛି।