ଏପ୍ରିଲରୁ ସ୍କୁଲ ପିଲାଙ୍କୁ ମାଣ୍ଡିଆ ଲଡ଼ୁ

ଭୁବନେଶ୍ବର: ପିଏମ୍‌ ପୋଷଣ ଯୋଜନା ମାଧ୍ୟମରେ ପ୍ରଥମରୁ ଦଶମ ଶ୍ରେଣୀ ଛାତ୍ରଛାତ୍ରୀଙ୍କୁ ପୋଷକ ତତ୍ତ୍ବ ଥିବା ମାଣ୍ଡିଆ ଲଡ଼ୁ ପ୍ରଦାନ କରାଯିବ। ଏପ୍ରିଲ ପହିଲାରୁ ସପ୍ତାହର ୩ ଦିନ ଅର୍ଥାତ୍‌ ସୋମବାର, ମଙ୍ଗଳବାର ଓ ଗୁରୁବାର ଏହି ପୁଷ୍ଟିକର ଲଡ଼ୁ ବଣ୍ଟନ ହେବ। ଗୋଟିଏ ଲଡ଼ୁ ପିଛା ୩ ଟଙ୍କା ୫୦ ପଇସା ଲେଖାଁଏ ଖର୍ଚ୍ଚ କରାଯିବ। ସେଥିରୁ ସାମଗ୍ରୀ ବାବଦରେ ୩ ଟଙ୍କା ୨୪ ଏବଂ ପ୍ରସ୍ତୁତି ପାଇଁ ୨୬ ପଇସା ଦିଆଯିବ। ମାଣ୍ଡିଆ ଚୂନା, ଗୁଡ଼, ଚିନାବାଦାମ, ଘିଅ, ଅଳେଇଚ, ରାଶି ଓ ଗୁଜୁରାତିରେ ଏହି ଲଡ଼ୁ ପ୍ରସ୍ତୁତ ହେବ। ପିଏମ୍‌ ଯୋଜନା ଅଧୀନରେ ଆସୁଥିବା ସମସ୍ତ ସରକାରୀ ଓ ଅନୁଦାନପ୍ରାପ୍ତ ବିଦ୍ୟାଳୟର ପିଲାମାନଙ୍କୁ ଏହା ମିଳିବ। ସକାଳ ସମୟରେ ପିଲାମାନେ ଏକାଠି ହେଉଥିବା ସ୍ଥାନରେ ଲଡ଼ୁ ବଣ୍ଟନ କରାଯିବ। ସ୍କୁଲ ଦ୍ବାରା ନିୟୋଜିତ ରୋଷେୟା ଓ ସହଯୋଗୀ ଏହି ଲଡ଼ୁଗୁଡ଼ିକ ପ୍ରସ୍ତୁତ କରିବେ। ଏ ଦିଗରେ ଆବଶ୍ୟକ ପଦକ୍ଷେପ ନେବାକୁ ପିଏମ୍‌ ପୋଷଣର ରାଜ୍ୟ ନୋଡାଲ୍‌ ଅଧିକାରୀ ଗିରିଶ ଚନ୍ଦ୍ର ସିଂ ଆଜି ସମସ୍ତ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦେଇଛନ୍ତି।