ଝରିଗାଁ-ଚନ୍ଦାହାଣ୍ଡି ରାସ୍ତାରେ ପୋଷ୍ଟର ଲଗାଇଲେ ମାଓବାଦୀ
ଝରିଗାଁ: ଝରିଗାଁ-ଚନ୍ଦାହାଣ୍ଡି ଘାଟି ରାସ୍ତାରେ ମାଓବାଦୀ ନିଜର ପୋଷ୍ଟର ଲଗାଇ ନିଜର ସ୍ଥିତି ଜାହିର କରିବାର ପ୍ରୟାସ କରିଛନ୍ତି। ଅନୁମାନ କରାଯାଉଛି ଯେ ଗତକାଲି ବିଳମ୍ବିତ ରାତ୍ରିରେ ମାଓବାଦୀମାନେ ସିଂଗାଡି ଘାଟି ନିକଟରେ ଗଛ ଓ ଲୁହା ତାର ପକାଇ ରାସ୍ତା ଅବରୋଧ କରି ଏକ ଲାଲ କପଡ଼ାରେ ଲେଖି ତେଲନଦୀରେ ପ୍ରସ୍ତାବିତ ବିଲେଇଲାଟି ପ୍ରକଳ୍ପକୁ ବିରୋଧ କରି ଏହି ପ୍ରକଳ୍ପ ଯୋଗୁଁ ଝରିଗାଁ, ଉମରକୋଟ ଏବଂ ରାଇଘର ବ୍ଲକର ପ୍ରାୟ ୧୦ହଜାର ପରିବାର ବିସ୍ଥାପିତ ହୋଇଯିବେ। ତେଣୁ ଏହି ପ୍ରକଳ୍ପକୁ ବିରୋଧ କରିବା ସହିତ ସାଧାରଣ ଲୋକଙ୍କୁ ଏଯାବତ ସ୍ୱାଧୀନତା ମିଳିନଥିବା ବେଳେ ମିଥ୍ୟା ସ୍ୱାଧୀନତା ଦିବସ ପାଳନ କରାଯାଉଛି ବୋଲି ଉଲ୍ଲେଖ କରିଛନ୍ତି।ଏପରିକି ସାଧାରଣ ଜନତା ଏହି ପୋଷ୍ଟରକୁ ନକାଢିବା ପାଇଁ ଏକ ଧଳା କାଗଜରେ ଓଡ଼ିଆ ଏବଂ ହିନ୍ଦୀ ଭାଷାରେ ଲେଖା ମଧ୍ୟ ରହିଥିବା ଦେଖିବାକୁ ମିଳିଥିଲା।
Sambad is now on WhatsApp
Join and get latest news updates delivered to you via WhatsApp
ମାଓବାଦୀମାନଙ୍କ ରାସ୍ତା ଅବରୋଧ ଯୋଗୁଁ ଦୀର୍ଘ ସମୟ ପର୍ଯ୍ୟନ୍ତ ଗାଡ଼ି ଚଳାଚଳ ସମ୍ପୂର୍ଣ୍ଣ ବନ୍ଦ ଥିଲା। ପରେ ଚନ୍ଦାହାଣ୍ଡି ପୁଲିସ ଘଟଣାସ୍ଥଳରେ ପହଞ୍ଚି ପୋଷ୍ଟର ଓ ଲେଖା କାଗଜ ଜବତ କରି ରାସ୍ତା ସଫା କରିବା ପରେ ଗାଡ଼ି ଚଳାଚଳ ସ୍ବାଭାବିକ ହୋଇଥିଲା। ତେବେ ଏହା ମାଓବାଦୀଙ୍କ କାର୍ଯ୍ୟ ନା କେହି ଦୁର୍ବୁତ୍ତ କାର୍ଯ୍ୟ ତାହା ଉପରେ ଚନ୍ଦାହାଣ୍ଡି ପୁଲିସ ତଦନ୍ତ କରୁଥିବା ସୂଚନା ମିଳିଛି। ମାଓବାଦୀଙ୍କ ବ୍ୟାନର ଲଗାଯାଇଥିବା ପ୍ରଚାର ପରେ ସାଧାରଣ ଯାତ୍ରୀ କିଛି ମାତ୍ରାରେ ଭୟଭୀତ ହୋଇପଡ଼ିଛନ୍ତି ।