ମାଓ ଆକ୍ରମଣ: ଓଡ଼ିଶା ସୀମାରେ ହାଇ ଆଲର୍ଟ

କୋରାପୁଟ: ଛତିଶଗଡ଼ର ଦାନ୍ତେୱାଡ଼ାରେ ମାଓବାଦୀଙ୍କ ଲ୍ୟାଣ୍ଡମାଇନ୍ ବିସ୍ଫୋରଣରେ ୧୧ ଯବାନ୍ ସହିଦ୍ ହେବା ପରେ କୋରାପୁଟରେ ହାଇଆଲର୍ଟ ଜାରି କରାଯାଇଛି। ପଡୋଶୀ ଜିଲ୍ଲା ନବରଙ୍ଗପୁର, ମାଲକାନଗିରିକୁ ମଧ୍ୟ ସତର୍କ ରହିବାକୁ ନିର୍ଦ୍ଦେଶ ହୋଇଛି। ଜିଲ୍ଲା ତଥା ପଡୋଶୀ ରାଜ୍ୟ ସୀମାନ୍ତ ଉପରେ ତୀକ୍ଷଣ୍ ନଜର ରଖି ସର୍ଚ୍ଚ ଓ କମ୍ବିଂ ଅପରେସନକୁ ଜୋରଦାର୍ କରାଯାଇଛି। ମାଓବାଦୀଙ୍କ ସମସ୍ତ ପ୍ରକାର ଅଘଟଣକୁ ଏଡାଇବା ପାଇଁ ଜିଲ୍ଲା ପୁଲିସ୍, ଏସଓଜି ଓ ଡିଭିଏଫ୍ ଯବାନ ପ୍ରସ୍ତୁତ ଥିବା କହିଛନ୍ତି କୋରାପୁଟ ଏସପି ଅଭିନଭ ସୋନକାର।

ଆନ୍ଧ୍ର-ଓଡ଼ିଶା-ଛତିଶଗଡ଼ ସୀମାକୁ ସିଲ୍ କରିଛି ପୁଲିସ୍। ରାଜ୍ୟ ସୀମାନ୍ତରେ ନାକା ଲଗାଇ ଯାଞ୍ଚକୁ କଡାକଡ଼ି କରିଛି ପୁଲିସ୍। ଗୁଇନ୍ଦା ସୂଚାନନୁଯାୟୀ, ମାଓବାଦୀଙ୍କ ଗତିବିଧି ଉପରେ ପୁଲିସ୍ ନଜର ରଖିବା ସହ କମ୍ବିଂ ଅପରେସନ୍ ଆରମ୍ଭ କରିଛି। ନବରଙ୍ଗପୁର-ଛତିଶଗଡ଼ ସୀମାରେ ମଧ୍ୟରେ ପୁଲିସ୍-ମାଓବାଦୀଙ୍କ ମଧ୍ୟରେ ଗୁଳି ବିନିମୟ ହୋଇଥିବାରୁ ପୁଲିସ୍ ମାଓ ମୁକାବିଲାକୁ ଜୋରଦାର୍ କରିଛି। ଆନ୍ଧ୍ର-ଛତିଶଗଡ଼ ପୁଲିସ୍ ମଧ୍ୟ କମ୍ବିଂ ଓ ସର୍ଚ୍ଚ ଅପରେସନ୍ ଆରମ୍ଭ କରିଥିବା ଜଣା ପଡିଛି।