ରାଉରକେଲା : ପରିବାର ସହ ଘରକୁ ଫେରୁଥିବା ବେଳେ ଟ୍ରକ ଧକ୍କାରେ ଚାଲିଗଲା ରାଜମିସ୍ତ୍ରୀଙ୍କର ଜୀବନ l ମୃତକ ଜଣକ ହେଲେ ଝାଡ଼ଖଣ୍ଡର ସେବକ ନାଗ (୪୫)l ଏମିତି ଦୁଃଖଦ ଘଟଣା ୧୪୩ ନମ୍ବର ଜାତୀୟ ରାଜପଥରେ ଥିବା ବୀରମିତ୍ରପୁର ମାଛ ମାର୍କେଟରେ ଘଟିଛି l ବୀରମିତ୍ରପୁର ପୁଲିସ ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇଛି l
ପୁଲିସ ଦୁର୍ଘଟଣା ଘଟାଇଥିବା ଟ୍ରକ (ଜେଏଚ ୧୦ବିଏଚ -୨୧୧୫) ଜବତ କରି ଘଟଣାର ତଦନ୍ତ ଚଳାଇଛି l ମିଳିଥିବା ସୂଚନା ମୁତାବକ ଲକଡାଉନ ପୂର୍ବରୁ ସେବକ, ପତ୍ନୀ,ଏକ ମାତ୍ର ପୁଅକୁ ଧରି ବୀରମିତ୍ରପୁରରେ ଥିବା ଶ୍ୱଶୁର ଘରକୁ ବୁଲି ଆସିଥିଲେl ଲକ ଡାଉନ କଟକଣା ପାଇଁ ଗାଡ଼ି ଚଳାଚଳ ବନ୍ଦ ଥୁବାରୁ ଘରକୁ ଫେରି ପାରି ନ ଥିଲେ l
Sambad is now on WhatsApp
Join and get latest news updates delivered to you via WhatsApp
ଆଜି ଝାଡ଼ଖଣ୍ଡକୁ ଗାଡି ଚାଲୁଥିବା ଜାଣିବା ପରେ ପରିବାର ସହ ଘରକୁ ଯିବାକୁ ବୀରମିତ୍ରପୁର ଅଟୋ ଷ୍ଟାଣ୍ଡ ନିକଟରେ ବସକୁ ସେ ସପରିବାର ଅପେକ୍ଷା କରିଥିଲେ l କିଛି ଜିନିଷ କିଣିବାକୁ ପତ୍ନୀ, ପୁଅକୁ ଅଟୋ ଷ୍ଟାଣ୍ଡ ନିକଟରେ ଛିଡ଼ା କରି ମାଛ ମାର୍କେଟ ଆଡ଼କୁ ଯାଉଥିଲେ l ହଠାତ୍ ରାଉରକେଲାରୁ ଝାଡ଼ଖଣ୍ଡ ଆଡକୁ ଦ୍ରୁତ ଗତିରେ ଯାଉଥିବା ଟ୍ରକ ପଛରୁ ଧକ୍କା ଦେଇଥିଲା l ଗୁରୁତର ଅବସ୍ଥାରେ ଆମ୍ବୁଲାନସରେ ରାଉରକେଲା ସରକାରୀ ହସ୍ପିଟାଲ ଅଣାଯାଉଥିବା ବେଳେ ବାଟରେ ସେବକଙ୍କର ମୃତ୍ୟୁ ହୋଇ ଯାଇଥିଲା l