ବିବାଦ ଭିତରେ ଆଜି ସରିବ ମାଟ୍ରିକ ପରୀକ୍ଷା: ‘ମାଗଣା ହେଉଥିବାରୁ ଫର୍ମପୂରଣ କରିଦେଲୁ’
ଯାଜପୁରସଦର/ଦଶରଥପୁର : ଏପ୍ରିଲ ୨୯ତାରିଖରୁ ଆରମ୍ଭ ହୋଇଥିବା ମାଟ୍ରିକ ପରୀକ୍ଷା ଆଜି ଶେଷ ହେବ। କିନ୍ତୁ ପରୀକ୍ଷା ସରିବାକୁ ବସିଥିବା ବେଳେ ଅନୁପସ୍ଥିତ ଛାତ୍ରଛାତ୍ରୀଙ୍କ ସଂପର୍କରେ ଶିକ୍ଷା ବିଭାଗ ପାଖରେ ସଠିକ ଖବର ନରହିବା ଶିକ୍ଷା ବିଭାଗର ବିଗିଡା ଚିତ୍ରକୁ ପଦାରେ ପକାଇଛି।
Sambad is now on WhatsApp
Join and get latest news updates delivered to you via WhatsApp
ଜିଲ୍ଲାରେ ମାଟ୍ରିକ ପରୀକ୍ଷା ପାଇଁ ୨୬୬୫୯ ଜଣ ଛାତ୍ରଛାତ୍ରୀ ପଞ୍ଜିକୃତ ହୋଇଥିଲେ। ସେମାନଙ୍କ ପାଇଁ ୧୬୧ଟି ପରୀକ୍ଷା କେନ୍ଦ୍ରର ବ୍ୟବସ୍ଥା ହୋଇଥିଲା। କିନ୍ତୁ ପରୀକ୍ଷା ଆରମ୍ଭ ପରେ ଏବେ ଅନୁପସ୍ଥିତ ଛାତ୍ରଛାତ୍ରୀଙ୍କ ସଂଖ୍ୟା ଶିକ୍ଷା ବିଭାଗର ଅକଲ ଗୁଡୁମ କରିଛି। ଜିଲ୍ଲାରେ ଆଜିର ପରୀକ୍ଷାରେ ୧୬୮୬ ଜଣ ଛାତ୍ରଛାତ୍ରୀ ଅନୁପସ୍ଥିତ ରହିଛନ୍ତି। ବଡଚଣାରେ ୨୩୮, ବରୀରେ ୭୭, ବିଂଝାରପୁରରେ ୧୭୫, ଦାନଗଦୀରେ ୧୧୮, ଦଶରଥପୁରରେ ୧୯୫, ଧର୍ମଶାଳାରେ ୧୭୬, ଯାଜପୁରରେ ୧୪୮, କୋରେଇରେ ୨୫୬ , ରସୁଲପୁରରେ ୮୦ ଓ ସୁକିନ୍ଦାରେ ୨୨୩ ଜଣ ଅନୁପସ୍ଥିତ ରହିଛନ୍ତି। ଏପ୍ରିଲ୨୯ ତାରିଖରେ ୧୬୫୫ଜଣ, ଏପ୍ରିଲ ୩୦ ତାରିଖରେ ୧୬୪୫ଜଣ, ମେ ୪ ତାରିଖରେ ୧୬୮୩ ଓ ମେ ୫ ତାରିଖରେ ୧୭୦୯ ଜଣ ଅନୁପସ୍ଥିତ ରହିଛନ୍ତି। ଏହି ଅନୁପସ୍ଥିତ ସଂଖ୍ୟା ପ୍ରତ୍ୟେକ ଦିନ ପରିବର୍ତ୍ତନ ହେଉଛି। ବାସ୍ତବରେ ଛାତ୍ରଛାତ୍ରୀ ଫର୍ମପୂରଣ କରିଥିଲେ ନା ସରକାରୀ ଯୋଜନାକୁ ହଡ଼ପ କରିବା ପାଇଁ ଏପରି କରାଯାଇଛି ସେ ନେଇ ତଦନ୍ତ ହେବା ଆବଶ୍ୟକ ବୋଲି ମତପ୍ରକାଶ ପାଉଛି। ପୂର୍ବ ବର୍ଷ ଗୁଡିକରେ ଜିଲ୍ଲାରେ ଅନୁପସ୍ଥିତ ଛାତ୍ରଛାତ୍ରୀ ସଂଖ୍ୟା ୫ଶହରେ ସୀମିତ ରହୁଥିବା ବେଳେ ଏବେ ଏହା ୧୭ଶହ ଡେଇଁଛି ।
ଦଶରଥପୁର ବ୍ଲକ୍ରେ ମୋଟ୍ ୨୭୯୮ ଜଣ ମାଟ୍ରିକ ପରୀକ୍ଷା ଦେବା ପାଇଁ ଫର୍ମ ପୂରଣ କରିଥିବା ବେଳେ ୨୬୦୩ ଜଣ ପରୀକ୍ଷା ଦେଉଛନ୍ତି ଏବଂ ୧୯୫ ଜଣ ଅନୁପସ୍ଥିତ ଅଛନ୍ତି । ଦଶରଥପୁର ଉଚ୍ଚବିଦ୍ୟାଳୟରେ ୧୪ ଜଣ ଅନୁପସ୍ଥିତ ଥିବା ପ୍ରଧାନଶିକ୍ଷକ ଡ. ଅକ୍ଷୟ ପଣ୍ଡା ସୂଚନା ଦେଇଛନ୍ତି । ‘ ପ୍ରାୟ ଏକ ବର୍ଷ ହେବ ଏହି ୧୪ ଜଣ ପିଲା ସ୍କୁଲକୁ ଆସିନାହାନ୍ତି । ମାଗଣାରେ ଫର୍ମ ପୂରଣ ହେଉଥିବାରୁ ଆମେ ସେମାନଙ୍କର ଫର୍ମ ପୂରଣ କରିଦେଇଥିଲୁ। ଏମାନଙ୍କ ମଧ୍ୟରୁ କିଛି ପିଲା ରାଜ୍ୟ ବାହାରେ କାର୍ଯ୍ୟ ପାଇଁ ପଳାଇଥିବା,’ ପ୍ରଧାନଶିକ୍ଷକ ଡ. ପଣ୍ଡା କହିଛନ୍ତି। ସେହିପରି ଜୟନ୍ତରାସ୍ଥ ସ୍ୱାମୀ ବିବେକାନନ୍ଦ ସରକାରୀ ଉଚ୍ଚବିଦ୍ୟାଳୟରେ ୨ ଜଣ ଅନୁପସ୍ଥିତ ଅଛନ୍ତି । ସେମାନଙ୍କ ମଧ୍ୟରେ ଜଣେ ଛାତ୍ର ଏବଂ ଅନ୍ୟଜଣେ ଛାତ୍ରୀ । ସବୁଠୁ ଗୁରୁତ୍ୱପୂର୍ଣ୍ଣ ବିଷୟ ହେଉଛି ଛାତ୍ରୀ ଜଣକର ବିବାହ ହୋଇଯାଇଥିବା ବେଳେ ଛାତ୍ର ଜଣକ ରାଜ୍ୟ ବାହାରେ ଶ୍ରମିକ ଭାବେ କାର୍ଯ୍ୟ କରୁଥିବା ଜଣାପଡିଛି। ମହତାବ ଉଚ୍ଚବିଦ୍ୟାଳୟ ମଂଗଳପୁରରେ ୩ ଜଣ ଅନୁପସ୍ଥିତ ଅଛନ୍ତି। ସେମାନଙ୍କ ସଂପର୍କରେ କୌଣସି ସୂଚନା ନଥିବା ବିଦ୍ୟାଳୟରୁ ସୂଚନା ମିଳିଛି । ଅନ୍ୟ ବିଦ୍ୟାଳୟରେ ମଧ୍ୟ ଏଭଳି ସମସ୍ୟା ରହିଥିବା ଜଣାପଡ଼ିଛି ।