ଭୁବନେଶ୍ବର: ଦିବ୍ୟାଙ୍ଗ ଛାତ୍ରଛାତ୍ରୀ ଓଡ଼ିଶାର ସରକାରୀ ଓ ବେସରକାରୀ ମେଡିକାଲ କଲେଜଗୁଡ଼ିକରେ ଏମ୍‌ବିବିଏସ୍‌ କିମ୍ବା ବିଡିଏସ୍‌ ପଢ଼ିବେ। ହେଲେ ମେଡିକାଲ ଟେଷ୍ଟ ଓଡ଼ିଶାରେ ହେବ ନାହିଁ। ସେମାନଙ୍କୁ ବାହାର ରାଜ୍ୟ ଯଥା ପଶ୍ଚିମବଙ୍ଗ, ନୂଆଦିଲ୍ଲୀ, ମହାରାଷ୍ଟ୍ର ଭଳି ରାଜ୍ୟକୁ ଯିବାକୁ ପଡ଼ିବ। ପୂର୍ବରୁ କଟକସ୍ଥିତ ଏସ୍‌ସିବି ମେଡିକାଲ କଲେଜରେ ଦିବ୍ୟାଙ୍ଗ ଛାତ୍ରଛାତ୍ରୀଙ୍କ ମେଡିକାଲ ଟେଷ୍ଟ ହେଉଥିବା ବେଳେ ଏଥର ମେଡିକାଲ କାଉନସିଲ୍‌ କମିଟି (ଏମ୍‌ସିସି) ପକ୍ଷରୁ ତାହାକୁ ବନ୍ଦ କରି ଦିଆଯାଇଛି। ଗତକାଲି ଏ ନେଇ ଏମ୍‌ସିସି ପକ୍ଷରୁ ବିଜ୍ଞପ୍ତି ପ୍ରକାଶ ପରେ ଆଶାୟୀ ଦିବ୍ୟାଙ୍ଗ ଛାତ୍ରଛାତ୍ରୀ ଚିନ୍ତାରେ। କେବଳ ଓଡ଼ିଶା ନୁହେଁ, ଦେଶର ଅର୍ଦ୍ଧାଧିକ ରାଜ୍ୟରେ ମେଡିକାଲ ଯାଞ୍ଚ ଲାଗି ସୁବିଧା କରାଯାଇ ନାହିଁ। ୧୦ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଚିହ୍ନଟ ହୋଇଥିବା ୧୬ଟି ମେଡିକାଲରେ ହିଁ ନିଟ୍‌-ୟୁଜି ରୢାଙ୍କ୍‌ଧାରୀ ଦିବ୍ୟାଙ୍ଗ ପିଲାଙ୍କ ସ୍ବାସ୍ଥ୍ୟ ଯାଞ୍ଚ କରାଯିବ।

Advertisment

ଏସ୍‌ସିବିରେ ହେଉଥିଲା, ଏଥର ହଠାତ୍‌ ବଦଳିଲା ନିୟମ
ଯାଞ୍ଚ ପାଇଁ ଦେଶର ୧୦ଟି ରାଜ୍ୟର ୧୬ ମେଡିକାଲ ଚିହ୍ନଟ
ଏମ୍‌ବିବିଏସ୍‌ ଓ ବିଡିଏସ୍‌ ପାଇଁ ନାମ ପଞ୍ଜୀକରଣ ଆରମ୍ଭ

ଏମ୍‌ସିସି ପକ୍ଷରୁ ଦର୍ଶାଯାଇଛି ଯେ ନୂଆଦିଲ୍ଲୀର ଏବିଭିଆଇଏମ୍‌ଏସ୍‌ ଆଣ୍ଡ ଆରଏମ୍‌ଏଲ୍‌ ‌ହସ୍ପିଟାଲ, ଏଲ୍‌ଏଚ୍‌ଏମ୍‌ସି, ଭିଏମ୍‌ଏମ୍‌ସି ଆଣ୍ଡ ସଫଦରଜଙ୍ଗ‌୍ ହସ୍ପିଟାଲ, ମୁମ୍ବାଇର ଏଆଇଆଇପିଏମ୍‌ଆର, ଗ୍ରାଣ୍ଟ ଗଭର୍ଣ୍ଣମେଣ୍ଟ ମେଡିକାଲ କଲେଜ, ଜେଜେ ହସ୍ପିଟାଲ କମ୍ପାଉଣ୍ଡ, ଅଲି ଜାଭର୍‌ ଜଙ୍ଗ ନ୍ୟାସ୍‌ନାଲ ଇନ୍‌ଷ୍ଟିଚ୍ୟୁଟ୍‌ ଅଫ୍‌ ସ୍ପିଚ୍‌ ଆଣ୍ଡ୍‌ ହିୟରିଂ ଡିଜାବିଲିଟିରେ ଯାଞ୍ଚ କରି ହେବ। ଏହାବ୍ୟତୀତ କର୍ଣ୍ଣାଟକର ଏଆଇଆଇଏସ୍‌ଏଚ୍‌, ଉତ୍ତର ପ୍ରଦେଶର ଇନ୍‌ଷ୍ଟିଚ୍ୟୁଟ୍‌ ଅଫ୍‌ ମେଡିକାଲ ସାଇନ୍ସ, ତ୍ରିପୁରା ସରକାରୀ ମେଡିକାଲ କଲେଜ ଅଗରତାଲା, ଚଣ୍ଡିଗଡ଼ ସେକ୍ଟର ୩୨ସ୍ଥିତ ସରକାରୀ ମେଡିକାଲ କଲେଜ ଆଣ୍ଡ୍‌ ହସ୍ପିଟାଲ, ରାଜସ୍ଥାନର ଏସ୍‌ଏମ୍‌ଏସ୍‌ ମେଡିକାଲ କଲେଜ, କେରଳର ଥିରୁଅନ୍ତପୁରମ୍‌ସ୍ଥିତ ସରକାରୀ ମେଡିକାଲ କଲେଜ, ଗୋଆ ମେଡିକାଲ କଲେଜ, ତାମିଲନାଡ଼ୁ ଚେନ୍ନାଇସ୍ଥିତ ମାଡ୍ରାସ ମେଡିକାଲ କଲେଜ, ପଶ୍ଚିମବଙ୍ଗ କୋଲକାତାସ୍ଥିତ ଆଇପିଜିଏମ୍‌ଇଆରରେ ଦିବ୍ୟାଙ୍ଗ ପିଲାମାନେ ମେଡିକାଲ ଟେଷ୍ଟ ଦେଇ ସାର୍ଟିଫିକେଟ୍‌ ପାଇପାରିବେ। କେତେକ ମେଡିକାଲରେ ସମସ୍ତପ୍ରକାର ଦିବ୍ୟାଙ୍ଗଙ୍କ ଟେଷ୍ଟ ହେବାକୁ ଥିବା ବେଳେ ଆଉ କିଛି ସ୍ଥାନରେ ଏକ ନିର୍ଦ୍ଦିଷ୍ଟ ବର୍ଗ ଦିବ୍ୟାଙ୍ଗଙ୍କ ଯାଞ୍ଚ ହେବ।

ଅନ୍ୟପକ୍ଷରେ ଏମ୍‌ବିବିଏସ୍‌ ଓ ବିଡିଏସ୍‌ ପାଠ୍ୟକ୍ରମରେ ନାମଲେଖା ପାଇଁ କାଉନ୍‌ସେଲିଂ ପ୍ରକ୍ରିୟା ଆରମ୍ଭ ହୋଇଛି। ନିଟ୍‌-ୟୁଜିରେ ଯୋଗ୍ୟ ପ୍ରାର୍ଥୀମାନେ ୨୦୨୫-୨୬ ଶିକ୍ଷାବର୍ଷରେ ଓଡ଼ିଶା ରାଜ୍ୟ ମେଡିକାଲ କାଉନ୍‌ସେଲିଂରେ ଭାଗ ନେବାକୁ ଆଜିଠାରୁ ନାମ ପଞ୍ଜୀକରଣ ଆରମ୍ଭ ହୋଇଛି। ଆସନ୍ତା ୨୬ ତାରିଖ ରାତି ୧୨ଟା ୫୯ ମିନିଟ୍‌ ମଧ୍ୟ‌ରେ ଅନ୍‌ଲାଇନ୍‌ରେ ପ୍ରାର୍ଥୀମାନେ ଆବେଦନ କରିପାରିବେ ଏବଂ ଡକ୍ୟୁମେଣ୍ଟ ଯାଞ୍ଚ କରାଯିବ। ଜୁଲାଇ ୨୭ ଓ ୨୮ ତାରିଖରେ ପ୍ରାର୍ଥୀଙ୍କ ତଥ୍ୟ ଯାଞ୍ଚ କରାଯିବ। ୨୯ ତାରିଖ ଅପରାହ୍ଣ ୫ଟାରେ ପ୍ରୋଭିଜନାଲ୍‌ ରାଜ୍ୟ ମେଧା ତାଲିକା ପ୍ରକାଶ ପାଇବ। ମେଧା ତାଲିକାକୁ ନେଇ ଯଦି କୌଣସି ପ୍ରାର୍ଥୀଙ୍କର କିଛି ବି ଦ୍ବନ୍ଦ୍ବ ରହିଥିବ ସେମାନେ ୩୦ ତାରିଖ ଅପରାହ୍ଣ ୫ଟା ସୁଦ୍ଧା ଆପତ୍ତି କରିପାରିବେ। ଅଗଷ୍ଟ ପହିଲାରେ ପଞ୍ଜୀକରଣ କରିଥିବା ପ୍ରାର୍ଥୀଙ୍କ ଚୂଡ଼ାନ୍ତ ରାଜ୍ୟ ମେଧା ତାଲିକା ପ୍ରକାଶ ପାଇବ ବୋଲି ଓଜେଇଇ ପକ୍ଷରୁ ଜାରି ବିଜ୍ଞପ୍ତିରେ କୁହାଯାଇଛି। ଓଜେଇଇ ଅଧ୍ୟକ୍ଷ ପ୍ରଫେସର ଡି ପି ଶତପଥୀ କହିଛନ୍ତି ଯେ ଏମ୍‌ସିସି ନିୟମ ଅନୁଯାୟୀ ଦିବ୍ୟାଙ୍ଗଙ୍କ ମେଡିକାଲ ଟେଷ୍ଟ ଅନୁଷ୍ଠିତ ହେବ। ଏଥର ଏମ୍‌ସିସି ପକ୍ଷରୁ ଧାର୍ଯ୍ୟ ୧୬ଟି ମେଡିକାଲରେ ଯାଞ୍ଚ କରିପାରିବେ। ପୂର୍ବରୁ ୧୫% ସର୍ବଭାରତୀୟ କୋଟାରେ ନାମଲେଖାଉଥିବା ପିଲାମାନେ ଏମ୍‌ସିସି ଦ୍ବାରା ଧାର୍ଯ୍ୟ ମେଡିକାଲରେ ଯାଞ୍ଚ କରାଉଥିଲେ। ଏବେ ସମସ୍ତ ପିଲା ସେଠାରେ ଯାଞ୍ଚ କରାଇ ରିପୋର୍ଟ ଆଣିବେ।