ମଧ୍ୟାହ୍ନ ଭୋଜନ ତାଲିକାରେ ଅଛି ଡାଲମା, ହେଲେ ସ୍କୁଲରେ ପିଲାଙ୍କୁ ଦିଆଯାଉଛି ଡାଲି ପାଣି ! ବାଧ୍ୟ ହୋଇ ଘରୁ ନେଉଛନ୍ତି ତରକାରୀ

ଭୁବନେଶ୍ୱର: ବିଦ୍ୟାଳୟର ମଧ୍ୟାହ୍ନ ଭୋଜନରେ ଛାତ୍ରଛାତ୍ରୀଙ୍କୁ ଭଲ ଖାଦ୍ୟ ଦେବା ପାଇଁ ରାଜ୍ୟ ସରକାର ବ୍ୟବସ୍ଥା କରିଥିବା ବେଳେ ଅନେକ ସ୍କୁଲରେ ଏଥିରେ ଅବ୍ୟବସ୍ଥା ଦେଖାଯାଇଛି। ପୁରୀ ଜିଲ୍ଲାର କୃଷ୍ଣପ୍ରସାଦ ବ୍ଲକ ଅନ୍ତର୍ଗତ ମୁରଲୀଧର ଉଚ୍ଚ ପ୍ରାଥମିକ ବିଦ୍ୟାଳୟ ହେଉଛି ଏହାର ଜ୍ୱଳନ୍ତ ଉଦାହରଣ। ସୋସିଆଲ ମିଡିଆରେ ଭାଇରାଲ ହୋଇଥିବା ଏକ ଟୁଇଟ୍‌ ଅନୁସାରେ ଏହି ସ୍କୁଲର ପିଲାମାନଙ୍କୁ ମଧ୍ୟାହ୍ନ ଭୋଜନରେ ଭାତ ଓ ଡାଲି ପାଣି ଦିଆଯାଉଛି। ମାତ୍ର ସ୍କୁଲର ମଧ୍ୟାହ୍ନ ଭୋଜନ ମେନୁରେ ଭାତ ସହିତ ଡାଲମା, ଭାତ ସହିତ ସୋୟାବିନ ତରକାରୀ ଓ ଭାତ ସହିତ ଅଣ୍ଡା ଦେବାର ବ୍ୟବସ୍ଥା ଅଛି।

 

ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଲକ ମୁରଲୀ ଧର ଉଚ୍ଚ ପ୍ରାଥମିକ ବିଦ୍ୟାଳୟ ରେ ମେନୁ ଚାଟ ରେ ଅଛି ଡାଲମା କିନ୍ତୁ ରୋଷେଇ ହଉଛି ଖାଲି ଡାଲି ପାଣି ମୋର @samirdash01 ମହୋଦୟ ଙ୍କୁ ଅନୁରୋଧ ତୁରନ୍ତ ଏଥିପ୍ରତି ଧ୍ୟାନ ଦେବାକୁ !!@Naveen_Odisha @balwantskalewa7 @Puri_Official @LalitenduBJP @SurjyaOfficial pic.twitter.com/pT64gPacIH

— Rasmi Ranjan Biswal (@RasmiRa82093885) November 2, 2019

ସରକାର ଡାଲମା ତିଆରି କରିବା ପାଇଁ  ଡାଲିରେ ପନିପରିବା ମିଶାଇବାକୁ ଆଦେଶ ଦେଇଛନ୍ତି। ଜଣେ ପ୍ରାଥମିକ ଶ୍ରେଣୀର ପିଲାପାଇଁ ୬୦ ଗ୍ରାମ ଓ ଉଚ୍ଚ ପ୍ରାଥମିକ ଶ୍ରେଣୀର ପିଲା ପାଇଁ ୧୦୦ ଗ୍ରାମ ପନିପରିବା ଦିଆଯିବା ଆବଶ୍ୟକ। ମାତ୍ର ମୁରଲୀଧର ଉଚ୍ଚ ପ୍ରାଥମିକ ବିଦ୍ୟାଳୟର ପିଲାମାନେ କୁହନ୍ତି ତାଙ୍କୁ ଡାଲମା ବଦଳରେ ଡାଲି ପାଣି ଦିଆଯାଏ। ଡାଲି ପାଣିରେ କେବଳ ପିଆଜ ପଡ଼ିଥାଏ। ସେଥିପାଇଁ ପିଲାମାନେ ଘରୁ ତରକାରୀ ନେଇକି ସ୍କୁଲ ଯାଇଥାନ୍ତି।

ମଧ୍ୟାହ୍ନ ଭୋଜନରେ ପିଲାମାନଙ୍କୁ ସୋମବାର ଓ ଗୁରୁବାର ଭାତ ସହ ଡାଲି ଦିଆଯିବାର ବ୍ୟବସ୍ଥା ଥିବା ବେଳେ ମଙ୍ଗଳବାର ଓ ଶୁକ୍ରବାର ଭାତ ସହ ସୋୟାବିନ ତରକାରୀ ଦିଆଯିବାର ବ୍ୟବସ୍ଥା ରହିଛି। ସେହିପରି ବୁଧବାର ଓ ଶନିବାର ଅଣ୍ଡା ତରକାରୀ ସହ ଭାତ ଦିଆଯିବାର ନିୟମ ରହିଛି। ଯେଉଁ ପିଲାମାନେ ଅଣ୍ଡା ଖାଉ ନ ଥିବେ ସେମାନଙ୍କୁ ଫଳ ଦିଆଯିବାର ବ୍ୟବସ୍ଥା ରହିଛି।

ସୋସିଆଲ ମିଡିଆରେ ଭାଇରାଲ ହୋଇଥିବା ଟୁଇଟ ଅନୁସାରେ ଏହି ବିଦ୍ୟାଳୟରେ ଶିକ୍ଷକମାନେ ପିଲାମାନଙ୍କ ଖାଦ୍ୟ ହଡ଼ପ କରିବାର ବି ଅଭିଯୋଗ କରିଥିଲେ ମଧ୍ୟ ପ୍ରଧାନ ଶିକ୍ଷକ ମୁହଁରୁ କିଛି ଉତ୍ତର ବାହାରୁନାହିଁ। ପ୍ରଧାନଶିକ୍ଷକ ଜଣକ କ୍ୟାମେରା ସମ୍ନାକୁ ଆସିବାକୁ ବି ଭୟ କରୁଛନ୍ତି। ଫଟୋ ଏବଂ ଭିଡ଼ିଓ ଭାଇରାଲ କରିଥିବା ଯୁବକମାନଙ୍କୁ ଭବିଷ୍ୟତ ଅନ୍ଧାର କରିଦେବି ବୋଲି ଧମକ ଦେଉଛନ୍ତି। ତେଣୁ ଟୁଇଟ୍ କରି ଘଟଣା ଉପରୁ ପରଦା ଉଠାଇଥିବା ସ୍ବେଚ୍ଛା‌ସେବୀମାନେ ରାଜ୍ୟ ଗଣଶିକ୍ଷାମନ୍ତ୍ରୀ ସମୀର ରଞ୍ଜନ ଦାଶଙ୍କୁ ଏହି ଅନିୟମିତତା ଉପରେ ଦୃଷ୍ଟି ଦେବାକୁ ଅନୁରୋଧ କରିଛନ୍ତି।