୩କିମି ଚାଲିଚାଲି ଯାଇ ଉପାନ୍ତ ଅଂଚଳରେ ସ୍ୱାସ୍ଥ୍ୟ ସେବା ଯୋଗାଇଲେ ମେଡିକାଲ୍‌ ଟିମ୍‌

ଝରିଗାଁ: ନବରଙ୍ଗପୁର ଜିଲ୍ଲା ଝରିଗାଁ ବ୍ଳକର ଉପାନ୍ତ ଗ୍ରାମ ଗୁଡିକରେ ଏଯାବତ ପ୍ରଶାସନ ପକ୍ଷରୁ ରାସ୍ତା ନିର୍ମାଣ ହୋଇନଥିବା ବେଳେ ଗ୍ରାମବାସୀ ଏକ ପ୍ରକାର ବିଛିନ୍ନ ଅଂଚଳରେ ରହୁଛନ୍ତି। ବିଶେଷ କରି ବର୍ଷା ଦିନ ମାନଙ୍କରେ ରାସ୍ତା ନଥିବା ଗ୍ରାମ ଗୁଡିକରେ ସ୍ୱାସ୍ଥ୍ୟ ସେବା ନକହିବା ଭଲ। ଝରିଗାଁ ବ୍ଳକରେ ଇନ୍ଦ୍ରଧନୁସ କାର୍ଯ୍ୟକ୍ରମ ଚାଲିଥିବା ବେଳେ ଗୁରୁବାର ଝରିଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ପକ୍ଷରୁ ଏକ ସ୍ୱାସ୍ଥ୍ୟ ଟିମ ଝରିଗାଁ ବ୍ଲକ ଚକଲାପଦର ପଂଚୟତ ଅନ୍ତର୍ଗତ ଜାମକୋଟ ଗ୍ରାମକୁ ସ୍ୱାସ୍ଥ୍ୟ ସେବା ଯୋଗାଇ ଦେବା ପାଇଁ ବାହାରିଥିଲେ।

ତେବେ ଜାମକୋଟ ଗ୍ରାମକୁ ଯିବା ପାଇଁ ରାସ୍ତା ନଥିବା ଯୋଗୁଁ ସ୍ବାସ୍ଥ୍ୟ ବିଭାଗର ଗାଡି ଭିତରକରମରି ଗ୍ରାମ ପର୍ଯ୍ୟନ୍ତ ଯାଇ ସେଠାରେ ରହିଯାଇଥିଲା। ଶେଷରେ ସ୍ୱାସ୍ଥ୍ୟ ବିଭାଗ ଟିମ ପକ୍ଷରୁ ଡାକ୍ତର ସନ୍ତୋଷ ପ୍ରଧାନ, ଜାନକୀ ଟାକିରୀ, ପ୍ରିୟଙ୍କା ପୂଜାରୀ ଏବଂ ସ୍ଥାନୀୟ ଅଙ୍ଗନବାଡ଼ି କର୍ମୀ ଭିତରକରମରି ଗ୍ରାମ ଠାରୁ ପ୍ରାୟ ୩ କିଲୋମିଟର ଦୂର ଔଷଧ ବହି ପାଦ ଚଲା ରାସ୍ତାରେ ପାହାଡ଼ ଏବଂ ଦୁଇଟି ନାଳ ଦେଇ ଜାମକୋଟ ଗ୍ରାମ ପହଁଚି ଗ୍ରାମବାସୀଙ୍କୁ ସ୍ୱାସ୍ଥ୍ୟ ସେବା ଯୋଗାଇ ଥିଲେ। ଗ୍ରାମର ୩୦ ଜଣ ଲୋକମାନଙ୍କୁ ରକ୍ତ ନମୁନା ପରୀକ୍ଷା କରିଥିଲେ।

ତେବେ କୌଣସି ଲୋକଙ୍କ ନିକଟରେ ମ୍ୟାଲେରିଆ ବାହାରି ନଥିଲା। ସେହିପରି ୪ ଜଣ ଗର୍ଭବତୀ ମହିଳାଙ୍କୁ ଦ୍ଵତୀୟ ଟୀକା ଦେବା ସହ ୩ ଜଣ ଶିଶୁ ଙ୍କୁ ଟୀକା କରଣ କରିଥିଲେ। ପରେ ପୁଣି ଥରେ ତିନି କିଲୋମିଟର ଦୂର ଚାଲି ଚାଲି ଭିତରକରମରି ଗ୍ରାମ ଆସିବା ପରେ ଝରିଗାଁ ଫେରିଥିଲେ। ଏଠାରେ ପ୍ରକାଶ ଯେ ଜାମକୋଟ ଗ୍ରାମ ସ୍ଥାପନ ହୋଇ ଦୀର୍ଘ ବର୍ଷ ହେବ। ଏହି ଗ୍ରାମରେ ୫୦ ପରିବାର ରହୁଥିବା ବେଳେ ଗୌଡ଼ ଏବଂ ଭତ୍ରା ସମ୍ପ୍ରଦାୟର ଲୋକ ମାନେ ବସବାସ କରନ୍ତି। ଗ୍ରାମରେ ବିଭିନ୍ନ କିସମର ଚାଷ କରି ପରିବାର ପୋଷଣ କରିଥାନ୍ତି। ଏହି ଗ୍ରାମକୁ ପକ୍କା ରାସ୍ତା ନଥିବା ଯୋଗୁଁ ବର୍ଷା ଦିନ ମାନଙ୍କରେ ସ୍ୱାସ୍ଥ୍ୟ ସେବା ଯୋଗାଇବା ସମ୍ଭବ ହେଉନାହିଁ।