ଶ୍ରୀମନ୍ଦିର ପରିଚାଳନା କମିଟି ବୈଠକ: ସ୍ନାନଯାତ୍ରା ନୀତିକାନ୍ତିରେ ମୋହର
ରଥଯାତ୍ରା ପାଇଁ ୨୫ରେ ବୈଠକ
ପୁରୀ: ଜୁନ୍ ୨୨ ତାରିଖରେ ପବିତ୍ର ଦେବସ୍ନାନ ପୂର୍ଣ୍ଣିମା। ଗଜବେଶରେ ଭକ୍ତଙ୍କୁ ଦର୍ଶନ ଦେବେ ମହାପ୍ରଭୁ। ଏଣୁ ଭକ୍ତଙ୍କ ଦର୍ଶନକୁ ଶୃଙ୍ଖଳିତ କରିବା ଉପରେ ଗୁରୁତ୍ବ ଦେଇଛନ୍ତି ଗଜପତି ମହାରାଜା ଦିବ୍ୟସିଂହ ଦେବ। ଭକ୍ତମାନେ ଯେଭଳି ନିର୍ବିଘ୍ନ ଓ ଅବରୋଧମୁକ୍ତ ଦର୍ଶନ କରିପାରିବେ, ସେ ଉପରେ ସେବକମାନେ ଦୃଷ୍ଟି ଦେବାକୁ କହିଛନ୍ତି। ଜଳଲାଗି ଓ ଗଜବେଶ ବେଳେ ମହାପ୍ରଭୁଙ୍କ ଆଗରେ କେହି ସେବକ ନ ରହିବାକୁ କୁହାଯାଇଛି। ଆଜି ନୀଳାଦ୍ରି ଭକ୍ତ ନିବାସଠାରେ ଗଜପତି ମହାରାଜାଙ୍କ ପୌରୋହିତ୍ୟରେ ଆୟୋଜିତ ଶ୍ରୀମନ୍ଦିର ପରିଚାଳନା କମିଟି ବୈଠକରେ ଛତିଶାନିଯୋଗ ଅନୁମୋଦିତ ନୀତିକାନ୍ତି ଓ ବ୍ୟବସ୍ଥାବଳିରେ ଚୂଡ଼ାନ୍ତ ମୋହର ମାରିଛି। ସ୍ନାନଯାତ୍ରାରେ ଭୋର୍ ୫ଟାରୁ ତିନି ଠାକୁରଙ୍କ ପହଣ୍ଡି ଆରମ୍ଭ ହେବ। ପହଣ୍ଡି ଶେଷ ଓ ତିନି ଠାକୁର ସ୍ନାନବେଦିରେ ବିଜେ ପରେ ଅନ୍ୟାନ୍ୟ ନୀତିକାନ୍ତି ଆରମ୍ଭ ହେବ। ଅପରାହ୍ନ ୩ଟା ୪୦ରେ ହାତୀବେଶ ଆରମ୍ଭ ହେବ। ସେହିଭଳି ଦେବସ୍ନାନ ପୂର୍ଣ୍ଣିମା ପାଇଁ ୨୦ ତାରିଖରେ ଦଇତାପତି ପ୍ରବେଶ ଓ ୨୧ ତାରିଖରେ ସେନାପଟା ଲାଗି ନୀତି ରହିଛି। ଏହାର ନୀତିକାନ୍ତିରେ ବି ଚୂଡ଼ାନ୍ତ ମୋହର ବାଜିଛି।
Sambad is now on WhatsApp
Join and get latest news updates delivered to you via WhatsApp
ଶ୍ରୀମନ୍ଦିର ମୁଖ୍ୟ ପ୍ରଶାସକ ବୀରବିକ୍ରମ ଯାଦବ କହିଛନ୍ତି, ଗତ ୧୪ ତାରିଖରେ ନୀତି ସବ୍-କମିଟି ଓ ଛତିଶାନିଯୋଗ ବୈଠକର ବିଭିନ୍ନ ପ୍ରସ୍ତାବ ଆଜି ଅନୁମୋଦନ କରାଯାଇଛି। ଦେବସ୍ନାନ ପୂର୍ଣ୍ଣିମା ନୀତିକାନ୍ତି ବି ଚୂଡ଼ାନ୍ତ ହୋଇଛି। ଚନ୍ଦନଯାତ୍ରା ପାଇଁ ନୀତି ସବ୍-କମିଟି ଓ ଛତିଶାନିଯୋଗ ପ୍ରସ୍ତାବକୁ ଅନୁମୋଦନ କରାଯାଇଛି। ଜୁନ୍ ୨୫ ତାରିଖରେ ପୁଣି ପରିଚାଳନା କମିଟି ବୈଠକ ବସିବ। ଏଥିରେ ରଥଯାତ୍ରା ନୀତିକାନ୍ତି ଉପରେ ଆଲୋଚନା ହେବ। ଏହି ବୈଠକରେ ନୀତିନିର୍ଘଣ୍ଟ ସହ ବ୍ୟବସ୍ଥାବଳି ଅନୁମୋଦିତ ହେବ।