ପୁରୀ: ମେଘନାଦ ପାଚେରି ଡେଇଁ କେତେକ ଯୁବକ ଗତକାଲି ଶ୍ରୀମନ୍ଦିର ପ୍ରବେଶ କରିବା ଘଟଣା ଢିଲା ସୁରକ୍ଷା ବ୍ୟବସ୍ଥାକୁ ପଦାରେ ପକାଇଛି। ଏହାର ତଦନ୍ତ ପାଇଁ ୪ ଜଣିଆ କମିଟି ଗଠନ କରାଯାଇଥିବା ବେଳେ ଶ୍ରୀମନ୍ଦିର ସୁରକ୍ଷା ସହ କୌଣସି ସାଲିସ କରାଯିବ ନାହିଁ ବୋଲି ପୁରୀ ଜିଲ୍ଲାପାଳ ଚଞ୍ଚଳ ରାଣା କହିଛନ୍ତି। ଗତକାଲି ସନ୍ଧ୍ୟାରେ ମହାପ୍ରଭୁଙ୍କ ନୀଳାଦ୍ରି ବିଜେ ପ୍ରସ୍ତୁତି ଚାଲିଥିବା ବେଳେ ପୁଲିସର କଡ଼ା ସୁରକ୍ଷା ବଳୟ ଭେଦ କରି ମେଘନାଦ ପାଚେରି କଡ଼ରେ ଗଦା ହୋଇଥିବା ପାହାଡ଼ ଭଳି ଆବର୍ଜନା ଉପରେ ଚଢ଼ି ୪ ଜଣ ଯୁବକ ଶ୍ରୀମନ୍ଦିର ଭିତରେ ପ୍ରବେଶ କରିଥିଲେ। ଶ୍ରୀମନ୍ଦିର ଉନ୍ନୟନ ପ୍ରଶାସକ ଦେବବ୍ରତ ସାହୁ, ସୁରକ୍ଷା ପ୍ରଶାସକ ହେମନ୍ତ ପାଢ଼ୀ, ସଫେଇ ସୁପର୍ଭାଇଜର ଓ ପୂର୍ତ୍ତ ବିଭାଗ ଅଧିକାରୀଙ୍କୁ ନେଇ ତଦନ୍ତ ଟିମ୍ ଗଠିତ ହୋଇଛି। ପ୍ରାଥମିକ ତଦନ୍ତରେ ଦକ୍ଷିଣଦ୍ବାର ମେଘନାଦ ପାଚେରିକୁ ଲାଗି ଏତେଦିନ ଧରି କାହିଁକି ଅଳିଆ ଗଦା ହୋଇ ରହିଥିଲା ତାହାକୁ ନେଇ ପ୍ରଶ୍ନ ଉଠିଛି। ଆବର୍ଜନା ସଫା କରିବାକୁ ଏକ ସଂସ୍ଥାକୁ ଦାୟିତ୍ବ ଦିଆଯାଇଛି। କିନ୍ତୁ କାହିଁକି ଏହି ସଂସ୍ଥା ଆବର୍ଜନା ଉଠାଇଲା ନାହିଁ, ସେ ନେଇ କୈଫିୟତ ତଲବ କରାଯାଇଛି। ମେଘନାଦ ପାଚେରି କଡ଼ରେ ରୋଷ ଘର ଅଳିଆ ପକାଇବାକୁ ଏକ ଫାଟକ ରହିଛି। ସେହି ଫାଟକ ଦେଇ ଆବର୍ଜନା ଫିଙ୍ଗାଯାଏ। ଆବର୍ଜନାକୁ ସମ୍ପୃକ୍ତ ସଂସ୍ଥା ଉଠାଇ ନିଏ। କିନ୍ତୁ ସଂସ୍ଥା ଉଠାଇ ନଥିବାରୁ ଆବର୍ଜନା ପାହାଡ଼ ଭଳି ଗଦା ହୋଇ ରହିଥିଲା। ଏହାର ସୁଯୋଗ ନେଇ ୪ ଜଣ ଯୁବକ ଚଢ଼ି ଯାଇଥିଲେ। ତେବେ ୪ ଜଣ ନୁହେଁ, ବରଂ ଅଧିକ ପ୍ରବେଶ କରିଛନ୍ତି ବୋଲି ଅଭିଯୋଗ ହୋଇଛି। ଆମ୍ ଆଦ୍ମୀ ପାର୍ଟି ଜିଲ୍ଲା ସଭାପତି ସଞ୍ଜୀବ ମହାନ୍ତି କହିଛନ୍ତି, କିଏ କହିବ ୪ ନା ୪୦ ଯାଇଛନ୍ତି। କେବଳ ଭକ୍ତ ଯାଇଛନ୍ତି ନା କେହି ଦୁର୍ବୃତ୍ତ ଯାଇଛନ୍ତି? ଏତେ ସୁରକ୍ଷା ବ୍ୟବସ୍ଥା ଥାଇ କିଭଳି ଲୋକମାନେ ମେଘନାଦ ପାଚେରି ଡେଇଁ ଗଲେ? କର୍ତ୍ତୃପକ୍ଷ କେତେ ଜଣ ହୋମ୍ଗାର୍ଡଙ୍କୁ ବିଦା କରି ବଡ଼ବଡ଼ିଆଙ୍କୁ ଖସାଇ ଦେବେ ନା କିଛି ବଡ଼ କାର୍ଯ୍ୟାନୁଷ୍ଠାନ ହେବ?
ଏ ନେଇ ଏସ୍ପି ପିନାକ ମିଶ୍ର କହିଛନ୍ତି, ଶ୍ରୀମନ୍ଦିର ସୁରକ୍ଷାରେ କୌଣସି ତ୍ରୁଟି ବା କମ୍ କରିବାର ଧୃଷ୍ଟତା ଆମେ କରିବୁ ନାହିଁ। ଅଳିଆସଫା ଗାଡ଼ି ପ୍ରବେଶ କରିବା ପାଇଁ ପୁଲିସ ବାରଣ କରିବା କଥା ସଫେଇ ଦାୟିତ୍ୱରେ ଥିବା କର୍ମଚାରୀ କହୁଛନ୍ତି। ଏହା ସମନ୍ୱୟ ଅଭାବରୁ ହୋଇଛି। ଶ୍ରୀମନ୍ଦିର ଉପମୁଖ୍ୟ ପ୍ରଶାସକ ଚଞ୍ଚଳ ରାଣା କହିଛନ୍ତି, ସିସିଟିଭି କ୍ୟାମେରା ଯାଞ୍ଚ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏଭଳି ଦାୟିତ୍ବହୀନତା ଅତ୍ୟନ୍ତ ଦୁଃଖଦାୟକ। ଏ ନେଇ ଏତଲା ଦିଆଯିବ। କୌଣସି ପରିସ୍ଥିତିରେ ଶ୍ରୀମନ୍ଦିର ସୁରକ୍ଷା ସହ ବୁଝାମଣା କରାଯିବ ନାହିଁ।
Advertisment

Sambad is now on WhatsApp
Join and get latest news updates delivered to you via WhatsApp