ଓଡ଼ିଶାକୁ ଆସୁଥିବା ବିଦେଶୀ ପୁଞ୍ଜିର ବଡ଼ଭାଗ ଖଣି ଓ ଧାତୁ କ୍ଷେତ୍ରକୁ ଆସୁଛି
ଅକ୍ଟୋବର ୨୦୧୯-ନଭେମ୍ବର ୨୦୨୦ ମଧ୍ୟରେ ରାଜ୍ୟକୁ ଆସିଛି ୨୧୭ କୋଟିର ଏଫଡିଆଇ
ଭୁବନେଶ୍ବର : ଗତ ୨୦୧୯ ଅକ୍ଟୋବର ମାସରୁ ୨୦୨୦ ନଭେମ୍ବର ମଧ୍ୟରେ ଓଡ଼ିଶାକୁ ପ୍ରାୟ ୨୯.୬୩ ନିୟୁତ ଡଲାର ବା ୨୧୭ କୋଟି ୧୨ ଲକ୍ଷ ଟଙ୍କାର ପ୍ରତ୍ୟକ୍ଷ ବିଦେଶୀ ପୁଞ୍ଜିନିବେଶ (ଏଫଡିଆଇ) ଆସିଛି । ଏହାର ଏକ ବଡ଼ଭାଗ ଖଣି ଓ ଧାତୁ କ୍ଷେତ୍ରକୁ ଆସିଛି ବୋଲି କେନ୍ଦ୍ର ଅର୍ଥ ମନ୍ତ୍ରାଳୟ ପକ୍ଷରୁ ଦିଆଯାଇଥିବା ତଥ୍ୟରୁ ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ଢେଙ୍କାନାଳ ସାଂସଦ ମହେଶ ସାହୁଙ୍କ ଏକ ପ୍ରଶ୍ନର ଉତ୍ତରଦେଇ କେନ୍ଦ୍ର ଅର୍ଥ ରାଷ୍ଟ୍ରମନ୍ତ୍ରୀ ଅନୁରାଗ ଠାକୁର ଏହି ତଥ୍ୟ ଦେଇଛନ୍ତି । ଏହି ତଥ୍ୟରେ କୁହାଯାଇଛି ଯେ, ୨୦୧୯ ଅକ୍ଟୋବର ମାସରୁ ୨୦୨୦ ନଭେମ୍ବର ମଧ୍ୟରେ ଓଡ଼ିଶାକୁ ପ୍ରାୟ ୨୯.୬୩ ନିୟୁତ ଡଲାର ବା ୨୧୭ କୋଟି ୧୨ ଲକ୍ଷ ଟଙ୍କାର ପ୍ରତ୍ୟକ୍ଷ ବିଦେଶୀ ପୁଞ୍ଜିନିବେଶ ଆସିଛି । ଏହାର ୮୬ ପ୍ରତିଶତ ଅର୍ଥାତ ୧୮୭ କୋଟି ଟଙ୍କା ଖଣି ଓ ଧାତୁ କ୍ଷେତ୍ରକୁ ଆସିଛି । ସେହିପରି ସେବା ଉଦ୍ୟୋଗକୁ ପ୍ରାୟ ୧୩ କୋଟି ଟଙ୍କାର ଏଫଡିଆଇ ଆସିଛି । ସଫ୍ଟଓ୍ବାର ଓ ହାର୍ଡଓ୍ବାର କ୍ଷେତ୍ରକୁ ୫୧ ଲକ୍ଷ ଟଙ୍କାର ଏଫଡିଆଇ ଆସିଛି । ଶକ୍ତି କ୍ଷେତ୍ରକୁ ୬ କୋଟି ୪୫ ଲକ୍ଷ ଟଙ୍କାର ଏଫଡିଆଇ ଆସିଛି ।
ଓଡ଼ିଶାର ପଡ଼ୋଶୀ ରାଜ୍ୟମାନଙ୍କ ମଧ୍ୟରୁ ପଶ୍ଚିମବଙ୍ଗକୁ ୪୨୬୧ କୋଟି ଟଙ୍କାର ଏଫଡିଆଇ ଆସିଥିବାବେଳେ ଆନ୍ଧ୍ରପ୍ରଦେଶକୁ ୧୯୪୨ କୋଟି ଟଙ୍କାର ଏଫଡିଆଇ ଆସିଛି ।