ଦୁର୍ନୀତିର ଗନ୍ଧ: ଏଥର କାଶୀପୁର ବ୍ଲକରେ ନରେଗା କାମ ନକରି ଟଙ୍କା ଚଳୁ

ରାୟଗଡା: ଜ଼ିଲ୍ଲାରେ ଏମଜିଏନଆରଜିଏ କାମ କିପରି ଚାଲିଛି ତାହା ଧୀରେ ଧୀରେ ପଦାକୁ ଆସୁଛି। ଗୋଟିଏ କାମକୁ ବାରମ୍ବାର କାଗଜ କଲମରେ ବିଭିନ୍ନ ନାମ ଦେଇ ସମାପ୍ତ ହୋଇଥିବା ଦର୍ଶାଇ ପଞ୍ଚାୟତ ଅଧିକାରୀ ଠାରୁ ବ୍ଲକ ଅଧିକାରୀ ମିଳିମିଶି ଟଂକା ଚଳୁ କରୁଛନ୍ତି। ଏମଜିଏନଆରଜିଏ କାମରେ ଦୁର୍ନୀତି ନେଇ ସମ୍ବାଦ ଗତ କିଛି ଦିନ ତଳେ ଚନ୍ଦ୍ରପୁର ଅଂଚଳରେ ହୋଇଥିବା ଖବର ପ୍ରକାଶ ପରେ ତନାଘନା  ଏକପ୍ରକାର ଆରମ୍ଭ ହୋଇଥିବା ବେଳେ ଏବେ ପୁଣି କାଶୀପୁର ବ୍ଲକରେ ଏଭଳି ଦୁର୍ନୀତିର ଗନ୍ଧ ବାରି ହୋଇପଡୁଛି। କାଶୀପୁର ବ୍ଲକର ମାନସୁଗାଁ ପଞ୍ଚାୟତର ବଡଚେକନା ଗ୍ରାମରେ ଆଠ ଆଠଟି କାମକୁ କିପରି ଅସମ୍ପୂର୍ଣ୍ଣ କରାଯାଇ ଟଂକା ଚଳୁ କରାଯାଇଛି ତାହା ସାମ୍ନାକୁ ଆସିଛି।

ବଡଚେକନା ଗ୍ରାମର ନରହରି ନାୟକ ସମେତ ଅନ୍ୟ ତିନି ଜଣ ବ୍ୟକ୍ତି ଗତ ୨୦୨୨ ମସିହା ମାର୍ଚ୍ଚ ୩୧ ତାରିଖରେ କିପରି ଏମଜିଏନଆରଜିଏ କାମରେ ଠକାମୀ କରାଯାଇଛି ସେନେଇ ଲୋକପାଳଙ୍କ ନିକଟରେ ଅଭିଯୋଗ ପରେ ଏହା ପଦାକୁ ଆସିଥିଲା। ଏନେଇ ଲୋକପାଳ ଲକ୍ଷ୍ମୀ ନାରାୟଣ ପାଢୀ ୧୪.୪.୨୦୨୨ ସୁଦ୍ଧା ସମସ୍ତ ନଥିପତ୍ର ଦେବା ପାଇଁ ବିଭଗୀୟ ଅଧିକାରୀଙ୍କୁ ନିର୍ଦେଶ ଦେଇଥିଲେ ମଧ୍ୟ କୌଣସି କାଗଜପତ୍ର ନଦେବାରୁ ବାଧ୍ୟ ହୋଇ ଲୋକପାଳ ଶ୍ରୀ ପାଢୀ ୨୦.୫.୨୦୨୨ରେ ଘଟଣାସ୍ଥଳକୁ ପରିଦର୍ଶନ କରି ଆଶ୍ଚର୍ଯ୍ୟ କଲାଭଳି ଦୃଶ୍ୟ ଦେଖିଥିଲେ।କାମ ନକରି କିପରି ଚଞ୍ଚକତା କରାଯାଇ ଟଂକା ଚଳୁ କରାଯାଇଛି ତାହା ଦେଖିବା ପରେ ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ଜିଲ୍ଲାପାଳଙ୍କୁ ଅବଗତ କରାଇଛନ୍ତି।

ବଡଚେକନା ଗ୍ରାମରେ ହୋଇଥିବା କାମ ମଧ୍ୟରୁ ପ୍ରଥମ କାମଟି ହେଲା ପାଲଭଙ୍ଗା ଝଲା ନିକଟରେ ଏକ କଲଭର୍ଟ ନିର୍ମାଣ। ଏହାର ଵାର୍କ କୋଡ ହେଲା ୨୪୨୯୦୦୬୦୧୨/ଏଫପି/୧୦୩୯୦୬୪୨ ଏବଂ ଏଷ୍ଟିମେଟ ହେଲା ୬,୦୫,୮୯୮ ଟଂକା।ଏହି କାମଟି‌ ୱେବସାଇଟରେ ଚାଲିଥିବା ଦର୍ଶାଯାଇଛି। କିନ୍ତୁ ସେଠାରେ କୌଣସି କାମ ନଥିବା ବେଳେ ଲୋକଙ୍କ ପାଇଁ ଥିବା ସୂଚନା ବୋର୍ଡ ମଧ୍ୟ ଗାଏବ ହୋଇଯାଇଛି। ଏସଟିମେଟ ଟଂକା ଖର୍ଚ୍ଚ ହୋଇସାରିଛି। ଦ୍ବିତୀୟ କାମଟି ହେଲା ଚଞ୍ଚଡାଗାଡ ଠାରୁ ଗୁମୁଡିସାହି ପର୍ଯ୍ୟନ୍ତ ପ୍ରୋଟେକ୍ସନ ୱାଲ ନିର୍ମାଣ। ଏହାର ୱାର୍କ କୋଡ ହେଲା ୨୪୨୯୦୦୬୦୧୨/ଏଫପି/୧୦୩୯୦୬୪୨ ଏବଂ ଏସଟିମେଟ କୋଷ୍ଟ ହେଲା ୧୦ ଲକ୍ଷ ଟଂକା।୨୦୧୯ ମସିହା ମାର୍ଚ୍ଚ ୩ରେ କାମ ଆରମ୍ଭ ହୋଇ ୨୦୨୦ ଜୁଲାଇ ୨୩ ତାରିଖରେ କାମ ସମାପ୍ତ ହେଲା ବୋଲି ଜିଆରଏସ ଏବଂ ପିଇଓ ସୂଚନା ଦେଇଥିଲେ। ତେବେ ଏହାର କୌଣସି ସୂଚନା ବୋର୍ଡ କାମ ନିକଟରେ ନଥିଲା।ତେବେ ଏହି କାମରେ ୮,୯୬,୫୪୯ ଟଂକା ଖର୍ଚ୍ଚ ହୋଇଥିବା ଦର୍ଶାଯାଇଥିବା ବେଳେ ମାଷ୍ଟର ରୋଲ, ଏମବି ବୁକ ଇତ୍ୟାଦିରେ ସଂପୂର୍ଣ୍ଣ ଭୁଲ ତଥ୍ୟ ରହିଥିବା ଦେଖିବାକୁ ମିଳିଥିଲା।

ସେହିପରି ତୃତୀୟ କାମଟି ହେଲା ଆଦିବାସୀ ସାହିରେ ପ୍ରୋଟେକ୍ସନ ୱାଲ ନିର୍ମାଣ। ଏହାର ୱାର୍କକୋଡ ହେଲା ୨୪୨୯୦୦୬୦୧୨/ଏଫପି/୧୦୩୯୦୩୬୨ ଏବଂ ଏସଟିମେଟ କୋଷ୍ଟ ହେଲା ୩ ଲକ୍ଷ।ଏହି କାମଟି ଚାଲିଥିବା ଦର୍ଶାଯାଇଥିବା ବେଳେ ପୁରୁଣା କାମରେ ନୂଆ ଲେପ ଦେଇ ୧,୦୨,୭୫୩ ଟଂକା ଖର୍ଚ୍ଚ ହୋଇଥିବା ଦର୍ଶାଯାଇଛି। ରେକର୍ଡରେ କାମ ଆରମ୍ଭ ହେବାର ସମୟ ଗୋଟିଏ ଥିବା ବେଳେ ବିଭାଗୀୟ ଅଧିକାରୀମାନେ ଆଉ ଏକ ତାରିଖ ଦର୍ଶାଉଥିବାରୁ ଏଥିର କିପରି ଚଞ୍ଚକତା କରାଯାଇଛି ତାହା ଧରାପଡିଥିଲା। ଚତୁର୍ଥ କାମଟି ହେଲା ଚାନ୍ଦଗଡଘାଟି ଠାରୁ ଜାଇଟି ସାହି ପର୍ଯ୍ୟନ୍ତ ରାସ୍ତା ନିର୍ମାଣ। ଏହାର ୱାର୍କକୋଡ ହେଲା ୨୪୨୯୦୦୬୦୧୨/ଏଫପି/୧୦୩୯୦୧୯୧ ଏବଂ ଏସଟିମେଟ କୋଷ୍ଟ ହେଲା ୪ ଲକ୍ଷ। ଏହି କାମ ମଧ୍ୟ ସରିନଥିା ଦର୍ଶାଯାଇଛି। କିନ୍ତୁ ୩,୮୯,୩୦୫ ଟଂକା ଖର୍ଚ୍ଚ ହୋଇଥିବା ରେକର୍ଡ କହୁଛି।ଏହି କାମଟି ଗତ ୨୦୧୯-୨୦ ମସିହାର।କିନ୍ତୁ ଵେବସାଇଟରେ ଏହାର ମାଷ୍ଟର ରୋଲ ନାହିଁ କି କୌଣସି କାଗଜପତ୍ର ନାହିଁ।କାମଟିକୁ ସଂପୂର୍ଣ୍ଣ ଚଞ୍ଚକତା କରାଯାଇ ଟକା ଚଳୁ କରାଯିବା ଜଳ ଜଳ ଦିଶୁଛି।

ପଞ୍ଚମ କାମଟି ହେଲା ବଡଚେକନା ଗ୍ରାମରେ କେନାଲ ସହ ପ୍ରୋଟେକ୍ସନ ୱାଲ ନିର୍ମାଣ। ଏହାର ୱାର୍କକୋଡ ହେଲା ୨୪୨୯୦୦୬୦୧୨/ଏଫପି/୧୦୩୯୦୬୪୩ ଏବଂ ଏସଟିମେଟ କୋଷ୍ଟ ହେଲା ୧୦ ଲକ୍ଷ। ଏହି କାମଟିକୁ କାଗଜ ପତ୍ରରେ ଚାଲୁଥିବା ଦର୍ଶାଯାଇ ପ୍ରାୟ ୭,୩୫,୪୩୩ ଟଂକା ଖର୍ଚ୍ଚ ହୋଇସାରିଥିବା କୁହାଯାଇଛି। ଏଠାରେ କିନ୍ତୁ କେନାଲ ନାମରେ ଏକ ପ୍ରୋଟେକ୍ସନ ଵାଲ ନିର୍ମାଣ କରାଯାଇଛି। ସମସ୍ତ କାମ ମେସିନ ଦ୍ବାରା କରାଯାଇଥିବା ଅଭିଯୋଗ ହୋଇଛି। ଷଷ୍ଟ କାମଟି ହେଲା ଘାସି ସାହି ଠାରୁ ଚଞ୍ଚଡାଗଡ ପର୍ଯ୍ୟନ୍ତ ପ୍ରୋଟେକ୍ସନ ଵାଲ ନିର୍ମାଣ। ଏହାର ୱାର୍କକୋଡ ହେଲା ୨୪୨୯୦୦୬୦୧୨/ଏଫପି/୧୦୩୯୩୭୦୧ ଏବଂ ଏସଟିମେଟ କୋଷ୍ଟ ହେଲା ୮ ଲକ୍ଷ ଟଂକା। ଏଠାରେ ମଧ୍ୟ ବିଭାଗୀୟ ଅଧିକାରୀ ଅର୍ଥାତ ଜିଆରଏସ, ପିଇଓ ଏବଂ ଏପିଓ ଚଞ୍ଚକତା କରି ୨,୩୭,୧୬୧ ଟଂକା ଖର୍ଚ୍ଚ ହୋଇଥିବା ଦର୍ଶାଇ କୌଣସି କାଗଜ ପତ୍ର ରଖିନାହାନ୍ତି। ଫେକ ବିଲ ଦର୍ଶାଇ ଖସିବାକୁ ଚେଷ୍ଟା କରାଯାଇଛି। କାମ ଚାଲିଥିବା ଦର୍ଶାଇ ଟଂକା ଚଳୁ କରାଯାଇଛି। ସପ୍ତମ କାମଟି ହେଲା ଲାଟକିମାସକା ଠାରୁ ବଡଚେକନା ଗ୍ରାମ ପର୍ଯ୍ୟନ୍ତ ରାସ୍ତା ସହ ପ୍ରୋଟେକ୍ସନ ୱାଲ ନିର୍ମାଣ କାର୍ଯ୍ୟ। ଏହାର ୱାର୍କକୋଡ ହେଲା ୨୪୨୯୦୦୬୦୧୨/ଏଫପି/୧୦୩୯୨୩୬୧ ଏବଂ ଏସଟିମେଟ କୋଷ୍ଟ ହେଲା ୫ ଲକ୍ଷ ଟଂକା। ଏହି କାମଟି ସରିଥିବା କୁହାଯାଉଥିବା ବେଳେ ଏହାର ସମସ୍ତ ନଥିପତ୍ର ଫେକ କରାଯାଇଛି।

୨୦୧୮-୧୯ ମସିହାର କାମ।କାମଟି ଆଦୌ ହୋଇନଥିବା ବେଳେ ସମସ୍ତେ ମିଳିମିଶି ଟଂକା ଚଳୁ କରାଯାଇଥିବା ସ୍ପଷ୍ଟ ବାରି ହୋଇପଡୁଛି। ଅଷ୍ଟମ କାମଟି ହେଲା ବାମନଝୋଲା ଗ୍ରାମରେ ପ୍ରୋଟେକ୍ସନ ୱାଲ ନିର୍ମାଣ କାର୍ୟ୍ୟ। ଏହାର ୱାର୍କକୋଡ ହେଲା ୨୪୨୯୦୦୬୦୧୨/ଏଫପି/୧୦୪୦୦୩୨୮ ଏବଂ ଏସଟିମେଟ କୋଷ୍ଟ ହେଲା ୫ ଲକ୍ଷ ୫୭ ହଜାର ଟଂକା।ଏହି କାମଟି ସଂପୂର୍ଣ୍ଣ ହୋଇଥିବା କୁହାଯାଉଥିବା ବେଳେ ବଡଚେକନା ଗ୍ରାମରେ ବାମନଝୋଲା ବୋଲି କୌଣସି ସ୍ଥାନ ହିଁ ନାହିଁ। ବିଭାଗୀୟ ଅଧିକାରମାନେ ଏହି ଜାଗାଟିକୁ ଲୋକପାଳଙ୍କୁ ଦେଖାଇପାରିନଥିଲେ। ଯାହାକୁ ନେଇ ସ୍ପଷ୍ଟହୋଇଥିଲା ଯେ କିପରି ଚଞ୍ଚକତା କରାଯାଇ ଟଂକା ହଡପ କରାଯାଇଛି। କୌଣସି ସ୍ଥାନରେ ସୂଚନା ଫଳକ ନଥିବା ବେଳେ ଫେକ କାଗଜ ପତ୍ର ତିଆରି କରିବା ସହ ୱେବସାଇଟରେ ମିଥ୍ୟା ରିପୋର୍ଟ ଦେଇ ପାର ହେବାକୁ ଚେଷ୍ଟା କରିଛନ୍ତି ବିଭାଗୀୟ ଅଧକାରୀମାନେ। ଏହାର ତୁରନ୍ତ ତଦନ୍ତ କରାଯାଇ ବିହିତ କାର୍ଯ୍ୟାନୁଷ୍ଠାନ ପାଇଁଦାବି ହୋଇଛି।ଏନେଇ ଜିଲ୍ଲାପାଳଙ୍କ ସହ ଯୋଗାଯୋଗ କରିବାକୁ ଚେଷ୍ଟା କରାଯାଇଥିଲେ ମଧ୍ୟ ତାଂକ ପ୍ରତିକ୍ରିୟା ମିଳିପାରିନାହିଁ।