ବନ୍ଧୁକ ମୁନରେ ବନ୍ଧକ ସ୍ମାର୍ଟସିଟିର ଦାଦନ : ବାରାଣସୀରେ ବନ୍ଧାପଡ଼ିଛନ୍ତି ୫ ଶ୍ରମିକ
ଯାଇଥିଲେ ୭, ଫେରିଲେ ୨, ଜଣେ ଶ୍ରମିକଙ୍କୁ ପିଟି ମାରିଦେଇଛନ୍ତି!
ରାଉରକେଲା : ଦାଦନ ଖଟିବାକୁ ବାରାଣସୀ ଯାଇଥିବା ସ୍ମାର୍ଟସିଟି ରାଉରକେଲାର ୫ ଜଣ ଶ୍ରମିକଙ୍କୁ ବନ୍ଧୁକମୁନରେ ଅଟକ ରଖାଯିବା ସହ ଶାରୀରିକ ଓ ମାନସିକ ନିର୍ଯାତନା ଦିଆଯାଉଛି। ଏମିତିକି ଅଟକ ଜଣେ ଶ୍ରମିକଙ୍କୁ କୁଆଡ଼େ ପିଟି ପିଟି ମାରିଦେଇଥିବା ଭଳି ସଙ୍ଗିନ ଅଭିଯୋଗ ଆଣିଛନ୍ତି ପରିବାରବର୍ଗ। ସେଠାରୁ ଲୁଚି ପଳାଇଆସିଥିବା ଦୁଇଜଣ ଶ୍ରମିକ ଏହି ଦୁଃଖଦ କାହାଣୀ ‘ସମ୍ବାଦ’କୁ କହିବା ସହ ନ୍ୟାୟ ଭିକ୍ଷା କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଗତ ଅକ୍ଟୋବର ଶେଷ ସପ୍ତାହରେ ଉତ୍ତରପ୍ରଦେଶର ଜଣେ ବ୍ୟକ୍ତି ନିଜକୁ ରାଉରକେଲାର ମୂଳ ନିବାସୀ ପରିଚୟ ଦେଇ ଗୋପବନ୍ଧୁପାଲିରେ ପହଞ୍ଚିଥିଲା। ସେଠାରେ ପ୍ରାୟ ୧୦/୧୨ ଜଣ ଦିନ ମଜୁରିଆଙ୍କୁ ଭେଟି ବାରାଣସୀରେ ଏକ ପ୍ରତିଷ୍ଠିତ କମ୍ପାାନିରେ ଭଲ ଦରମାରେ କାମ ଦେବାକୁ କହିଥିଲେ। ଉକ୍ତ ଦଲାଲର ମିଛ ପ୍ରତିଶ୍ରୁତିରେ ଗୋପବନ୍ଧୁପାଲି, ଲାଲ ବିଲ୍ଡିଂ, ଗାନ୍ଧୀ ରୋଡ୍ ଅଞ୍ଚଳର ୭ ଜଣ ଶ୍ରମିକ ଫସିଯାଇଥିଲେ। ଅଧିକ ରୋଜଗାର ଆଶାରେ ଗୋପବନ୍ଧୁପାଲିର ରବୀନ୍ଦ୍ର ନାଗ (୫୦), ରାଜକୁମାର ମୁଣ୍ଡା (୪୬), ଜିତୁ ଓରାମ (୨୯)ଙ୍କ ସମେତ ଲାଲବିଲ୍ଡିଂର ଜଣେ ଯୁବକ ଏବଂ ଗୋପବନ୍ଧୁପାଲିର ଜଣେ ଯୁବତୀଙ୍କ ସମେତ ଅନ୍ୟ ୨ ଜଣ ଯୁବକ; ମୋଟ୍ ୭ ଜଣ ଗତବର୍ଷ ନଭେମ୍ବର ପହିଲାରେ ବାରାଣସୀ ଅଭିମୁଖେ ବାହାରିଥିଲେ। ରାଉରକେଲା ଷ୍ଟେସନରୁ ଉକ୍ତ ଦଲାଲ ମଧ୍ୟ ଶ୍ରମିକମାନଙ୍କ ସହ ଯାଇଥିଲା। ସେଠାରେ ପହଞ୍ଚିବାପରେ ଦଲାଲ ସମସ୍ତ ୭ ଜଣ ଶ୍ରମିକଙ୍କୁ ଏକ ଇଟାଭାଟିରେ କାମ କରିବାକୁ କହିଥିଲା। ମାତ୍ର ଶ୍ରମିକମାନେ ମନା କରିବାରୁ ଦଲାଲ ଓ ସଂପୃକ୍ତ ଇଟାଭାଟି ମାଲିକ କିଛି ନ ଶୁଣି ଜୋରଜବରଦସ୍ତ ଇଟାଭାଟିରେ ସେମାନଙ୍କୁ କାମ କରିବାଲାଗି ବାଧ୍ୟ କରିଥିଲେ। ପ୍ରଥମ ଦିନରୁ ହିଁ ସେମାନଙ୍କ ଉପରେ ନିର୍ଯାତନା ଆରମ୍ଭ ହୋଇଥିଲା। ସାମାନ୍ୟ ଭୁଲ୍ ହେଲେ ମାରପିଟ କରିବା ସହ ଠିକ୍ଭାବେ ଖାଇବାକୁ ମଧ୍ୟ ଦିଆ ଯାଉ ନଥିଲା। ଏଣୁ ପ୍ରାୟ ୧୫/୨୦ ଦିନ ପରେ ଜଣେ ଯୁବତୀ ସେଠାରୁ ଲୁଚି ରାଉରକେଲାକୁ ପଳାଇ ଆସିଥିଲେ।
ଏହାପରେ ସେଠାରେ ବନ୍ଧା ହୋଇରହିଥିବା ୬ ଜଣ ଶ୍ରମିକଙ୍କ ଉପରେ ନିର୍ଯାତନା ବଢ଼ି ଯାଇଥିଲା। ନିର୍ଯାତନା ଅସମ୍ଭାଳ ହେବାରୁ ପ୍ରାୟ ମାସକ ପରେ ଆଉ ଜଣେ ଶ୍ରମିକ ଜିତୁ ଓରାମ ମଧ୍ୟ ସେଠାରୁ ଲୁଚି ପଳାଇ ଆସିଥିଲେ। ଜିତୁ ରାଉରକେଲାରେ ପହଞ୍ଚିବାପରେ ସେଠାକାର ଘଟଣା ବିଷୟରେ ବିସ୍ତୃତ କହିଥିଲେ। ଏହାପରେ ବାରାଣସୀରେ ବନ୍ଧକ ଥିବା ରବୀନ୍ଦ୍ରଙ୍କ ସ୍ତ୍ରୀ ଲକ୍ଷ୍ମୀ ନାଗ ଓ ରାଜକୁମାରଙ୍କ ସ୍ତ୍ରୀ ଗୁରୁବାରୀ ନାଏକ ପ୍ଲାଣ୍ଟ୍ସାଇଟ୍ ଥାନାରେ ମୌଖିକ ଅଭିଯୋଗ କରିଥିଲେ ବୋଲି ସେମାନଙ୍କଠାରୁ ପ୍ରକାଶ। ତାପରେ ସେମାନେ ଭାଗ୍ୟକୁ ଆଦରି ଚୁପ୍ ବସିଥିଲେ। ପ୍ରାୟ ଦେଢ଼ମାସ ପୂର୍ବେ ଅଟକ ଶ୍ରମିକ ରବୀନ୍ଦ୍ର ତାଙ୍କ ପତ୍ନୀ ଲକ୍ଷ୍ମୀଙ୍କୁ ଫୋନ୍ କରି ମାଡ଼ ମରା ଯାଉଥିବା ଜଣାଇଥିଲେ। ଏହାସହ କୌଣସିମତେ ଉଦ୍ଧାର କରିନେବାକୁ କୁଆଡ଼େ କାକୁତିମିନତି ହୋଇଥିଲେ। ଏହାପରଠାରୁ ଲକ୍ଷ୍ମୀ ଆଉ ସ୍ବାମୀଙ୍କ ସହ କଥାବାର୍ତ୍ତା ହୋଇପାରିନାହାନ୍ତି। ଉକ୍ତ ନମ୍ବରରେ ଫୋନ୍ କଲେ ରବୀନ୍ଦ୍ର ସେଠାରେ କାମ କରୁନଥିବା ପ୍ରତ୍ୟୁତ୍ତର ମିଳୁଛି। ରବୀନ୍ଦ୍ରଙ୍କ ଏବେ କୌଣସି ଖୋଜଖବର ନ ଥିବାରୁ ତାଙ୍କ ଜୀବନରୁ ମାରିଦେଇଥିବା ଆଶଙ୍କା ଭିତରେ ଅଛନ୍ତି ପରିବାର। ରବୀନ୍ଦ୍ରଙ୍କ ବ୍ୟତୀତ ଅନ୍ୟ ୪ ଜଣ ଶ୍ରମିକ ମଧ୍ୟ ସେଠାରେ ଏବେବ ବି ବନ୍ଧା ପଡ଼ିଛନ୍ତି। ବନ୍ଧୁକ ମୁନରେ ସେମାନଙ୍କୁ କାମ କରିବାକୁ ବାଧ୍ୟ କରାଯିବା ସହ ପରିବାର ସହ କଥାବାର୍ତ୍ତା କରିବାକୁ ମଧ୍ୟ ସୁଯୋଗ ଦିଆଯାଉନଥିବା ପରିବାରବର୍ଗ ଲୁହଭରା କଣ୍ଠରେ କହିଛନ୍ତି।