ଫୁଲବାଣୀରେ ସର୍ବନିମ୍ନ ତାପମାତ୍ରା ୭.୫ଡିଗ୍ରି: କୁହୁଡ଼ି ପାଇଁ ୪ ଜିଲ୍ଲାକୁ ସତର୍କ ସୂଚନା

ଭୁବନେଶ୍ୱର: ଆଗାମୀ ୨ ଦିନ ପର୍ଯ୍ୟନ୍ତ ତାପମାତ୍ରାରେ କୌଣସି ପରିବର୍ତ୍ତନ ହେବ ନାହିଁ। ଦୁଇ ଦିନ ପରେ ଦିନର ତାପମାତ୍ରା ୨ଡିଗ୍ରି ବୃଦ୍ଧି ପାଇବା ସମ୍ଭାବନା ରହିଛି। ଏଭଳି ସୂଚନା ଦେଇଛି ଭୁବନେଶ୍ବର ପାଣିପାଗ ବିଜ୍ଞାନ କେନ୍ଦ୍ର। ଫଳରେ ରାଜ୍ୟରେ ଜାରି ରହିଥିବା ଶୀତ ଆଉ ଦୁଇ ଦିନ ହେବା ନିଶ୍ଚିତ ହୋଇଛି। ତେବେ ଆସନ୍ତାକାଲି ଘନକୁହୁଡ଼ି ପାଇଁ ୪ଟି ଜିଲ୍ଲାକୁ ସତର୍କ ସୂଚନା ଦିଆଯାଇଛି। ସେଗୁଡ଼ିକ ହେଉଛି ସୁନ୍ଦରଗଡ଼, କନ୍ଧମାଳ, କୋରାପୁଟ ଓ ଅନୁଗୁଳ। ଏହି ଜିଲ୍ଲାର କେତେକ ସ୍ଥାନରେ ଘନ କୁହୁଡ଼ି ଯୋଗୁ ଦୃଶ୍ୟତା କମ୍‌ ରହିବାକୁ ଥିବାରୁ ୟେଲୋ ୱାର୍ଣ୍ଣିଂ ଦିଆଯାଇଥିବା ସୂଚନା ଦେଇଛନ୍ତି ବୈଜ୍ଞାନିକ ଡ. ସଞ୍ଜୀବ ଦ୍ବିବେଦୀ। ତା’ ଛଡ଼ା ଗଞ୍ଜାମ, ଗଜପତି, ଢେଙ୍କାନାଳ, କେନ୍ଦୁଝର, କଳାହାଣ୍ଡି, ଖୋର୍ଦ୍ଧା ଓ କଟକରେ ମଧ୍ୟ ହାଲୁକାରୁ ମଧ୍ୟମ ଧରଣର କୁହୁଡ଼ି ହେବା ପୂର୍ବାନୁମାନ କରାଯାଇଛି। 

ଗତ ୨୪ ଘଣ୍ଟା ମଧ୍ୟରେ ସର୍ବନିମ୍ନ ତାପମାତ୍ରା ଫୁଲବାଣୀରେ ୭.୫ଡିଗ୍ରି ରହିଥିଲା। ଏହି ସହର ସମେତ ୬ ସହରର ତାପମାତ୍ରା ୧୦ ଡିଗ୍ରି ତଳେ ରହିଛି। ରାଉରକେଲାରେ ୮.୭, ଝାରସୁଗୁଡ଼ା ଓ ଅନୁଗୁଳରେ‌ ୯, ଦାରିଙ୍ଗିବାଡ଼ିରେ ୯.୫ ଓ ଭବାନୀପାଟଣାରେ ୯.୯ ଡିଗ୍ରି ରହିଥିଲା। ସେହିଭଳି ୩ଟି ସହରର ତାପମାତ୍ରା ୩୦ ଡିଗ୍ରି ଉପରେ ରହିଥିଲା। ବଲାଙ୍ଗୀର ଓ ନୂଆପଡ଼ାରେ ୩୦ ଏବଂ ବରଗଡ଼ରେ ୩୧.୨ଡିଗ୍ରି ତାପମାତ୍ରା ରେକର୍ଡ କରାଯାଇଛି।