ରାଜରାସ୍ତାରେ ପ୍ରଶ୍ନବାଣର ସମ୍ମୁଖୀନ ହେଲେ ମନ୍ତ୍ରୀ ଦିବ୍ୟଶଙ୍କର, ଯୁବକ ପଚାରିଲେ- ‘ଆପଣ ଇସ୍ତଫା ଦେବେ କି?’
ଭବାନୀପାଟଣା : ମମିତା ମେହେର ହତ୍ୟାକାଣ୍ଡରେ ତାଙ୍କ ସଂପୃକ୍ତି ଅଭିଯୋଗ ଆଣି ଦୁଇ ବିରୋଧୀ ଦଳ ବିଜେପି ଓ କଂଗ୍ରେସ ଗୃହରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ଇସ୍ତଫା ଦାବି ଜୋରଦାର କରୁଥିବା ବେଳେ ମନ୍ତ୍ରୀ ନିଜ ନିର୍ବାଚନ ମଣ୍ଡଳୀରେ ଛୋଟ ଛୋଟ ସମାବେଶ କରି ନିଜ ପକ୍ଷ ରଖୁଛନ୍ତି। ଏସବୁ ଭିତରେ ଗତକାଲି ଭବାନୀପାଟଣାରେ ଏକ ଅଭାବନୀୟ ଘଟଣା ଦେଖିବାକୁ ମିଳିଥିଲା । ମନ୍ତ୍ରୀ ଦିବ୍ୟଶଙ୍କର ମିଶ୍ର ଚାଲି ଚାଲି ଯାଉଥିବା ବେଳେ ଜଣେ ବିଜେପି କର୍ମୀ ଆଗକୁ ଆସି ସେ କେବେ ଇସ୍ତଫା ଦେବେ ବୋଲି ପ୍ରଶ୍ନ କରିଥିଲେ ।
Sambad is now on WhatsApp
Join and get latest news updates delivered to you via WhatsApp
କଳାହାଣ୍ଡିର ଭବାନୀପାଟଣା ସହରରେ ମଙ୍ଗଳବାର ମନ୍ତ୍ରୀ ନିଜ ସୁରକ୍ଷା କର୍ମୀଙ୍କ ସହ ଚାଲି ଚାଲି ଯାଉଥିବା ବେଳେ ଏହି ଘଟଣା ଘଟିଲା । ଜଣେ ଯୁବକ ନମ୍ରତାର ସହ ମନ୍ତ୍ରୀଙ୍କ ପାଖକୁ ଚାଲିଆସିଲେ । କେହି କିଛି ଭାବିବା ପୂର୍ବରୁ ମନ୍ତ୍ରୀଙ୍କୁ ଗୋଟିଏ ପରେ ଗୋଟିଏ ପ୍ରଶ୍ନ ପଚାରିଥିଲେ। ଗଣମାଧ୍ୟମକୁ ଆସିଥିବା ଏହି ସମୟର ଏକ ଭିଡିଓରୁ ଏହା ସ୍ପଷ୍ଟ ହୋଇଥିଲା। ଯୁବକଙ୍କ ପ୍ରଶ୍ନଥିଲା- ‘ଆପଣ ଇସ୍ତଫା ଦେବେ କି?’ ସମସ୍ତଙ୍କ ସାମ୍ନାରେ ଏଭଳି ପ୍ରଶ୍ନ ଶୁଣି ଟିକିଏ ଅସହଜ ହୋଇପଡିଥିଲେ ମନ୍ତ୍ରୀ । ଏହାର ଉତ୍ତରରେ ସେ କିଛି କହିଥିଲେ ମଧ୍ୟ କିନ୍ତୁ କ’ଣ କହିଲେ ତାହା ସ୍ପଷ୍ଟ ଶୁଣାଯାଉ ନ ଥିଲା । ଏହାର ପ୍ରତି ଜବାବରେ ଯୁବକ କହିଥିଲେ- ‘ନା ଫାଶୀ ନୁହେଁ, ଆମର ଫାଶୀ ଦରକାର ନାହିଁ, ଇସ୍ତଫା ଦରକାର ।’ ଏହା ପରେ ତାଙ୍କ ପ୍ରଶ୍ନକୁ ଏଡାଇ ଦେଇ ଚାଲିଯାଇଥିଲେ ମନ୍ତ୍ରୀ । ଭବାନୀପାଟଣା ରାସ୍ତାରେ ମନ୍ତ୍ରୀଙ୍କୁ ଏଭଳି ପ୍ରଶ୍ନ କରାଯିବାର ଦୃଶ୍ୟକୁ କେହି ଜଣେ ମୋବାଇଲରେ ରେକର୍ଡ କରିଥିଲେ । ଆଉ କିଛି ସମୟ ପରେ ଏ ଦୃଶ୍ୟ ମୋବାଇଲକୁ ମୋବାଲଇ୍ ଘୁରିବୁଲିଥିଲା ଓ ଗଣମାଧ୍ୟମକୁ ଆସିଥିଲା।
ଅନ୍ୟପକ୍ଷରେ ଗୋଲାମୁଣ୍ଡା ବ୍ଲକ ନୂଆ ଗାଁ ପଞ୍ଚାୟତରେ ମହିଳାଙ୍କୁ ନେଇ ସମାବେଶ କରି ମନ୍ତ୍ରୀ ଅଜବ ଯୁକ୍ତି ବାଢିଛନ୍ତି । କହିଛନ୍ତି, ତାଙ୍କ ବିରୋଧରେ ଅଭିଯୋଗ ଆଣି, ଅଞ୍ଚଳକୁ ଅପମାନ କରାଯାଉଛି । ମମିତା ହତ୍ୟାକାଣ୍ଡରେ ତାଙ୍କ ନାଁକୁ ନେଇ ଅଭିଯୋଗ ଆସୁଥିବାରୁ ମନ୍ତ୍ରୀ ଏବେ ଯେଉଁଠି ଯାଉଛନ୍ତି, ସେଠାରେ ମହିଳାଙ୍କ ଉଦ୍ଦେଶ୍ୟରେ ସ୍ୱତନ୍ତ୍ର ଭାବେ କହୁଛନ୍ତି ।