ସରକାରୀ ବିଦ୍ୟାଳୟର ମୁଖ୍ୟ ଫାଟକ ପଡ଼ି ନାବାଳକର ମୃତ୍ୟୁ

ଆଠଗଡ଼: କଟକ ଜିଲ୍ଲା ଆଠଗଡ଼ ବ୍ଲକ ଆଙ୍କୁଲା ସତ୍ୟବାଦୀ ନୋଡାଲ ଉଚ୍ଚ ପ୍ରାଥମିକ ବିଦ୍ୟାଳୟର ମୁଖ୍ୟ ଫାଟକ ଭାଙ୍ଗି ପଡିବାରୁ ଜଣେ ନାବାଳକର ମୃତ୍ୟୁ ଘଟିଛି। ମୃତକ ହେଲେ ଚିକୁ ନାଏକ (୭)।

ସୂଚନା ଅନୁସାରେ ଆଙ୍କୁଲା ଗ୍ରାମର କାର୍ତ୍ତିକ ନାଏକ ନିଜର ବୃତ୍ତି ପାଇଁ ସପରିବାର କଟକରେ ରହନ୍ତି। ଆଜି ସେ ନିଜ ଗାଁ ଆଙ୍କୁଲାକୁ ଆସିଥିବା ବେଳେ ତାଙ୍କର ୭ ବର୍ଷ ପୁଅ ଚିକୁ ନାଏକ ନିଜର ଦୁଇ ଜଣ ସାଙ୍ଗଙ୍କ ସହ ଗ୍ରାମ ପ୍ରାଥମିକ ବିଦ୍ୟାଳୟକୁ ଖେଳିବାକୁ ଯାଇଥିଲେ। ଆଜି ବିଦ୍ୟାଳୟ ଛୁଟି ଥିବାରୁ ବିଦ୍ୟାଳୟ ବନ୍ଦ ରହିଥିଲା। ମାତ୍ର ବିଦ୍ୟାଳୟ ଗେଟ୍‌ଟି ଖୋଲା ରହିଥିଲା। ପିଲାମାନେ ଖେଳ ସାରି ଅପରାହ୍ନ ୫ ଟା ସମୟରେ ଘରକୁ ଫେରିବା ପାଇଁ ଆସୁଥିବା ବେଳେ ବିଦ୍ୟାଳୟର  ଗେଟ୍‌ର ଗୋଟିଏ ପାର୍ଶ୍ୱ ଲୁହା କବାଟ ସେମାନଙ୍କ ଉପରେ ମାଡିବସିଥିଲା। ଘଟଣାସ୍ଥଳରେ ମୃତ ଚିକୁ ନାଏକ ଉପରେ ଗେଟ୍ ଟି ମାଡିବସିଥିବା ବେଳେ ଅନ୍ୟ ଦୁଇ ଶିଶୁ ଅଳ୍ପକେ ରକ୍ଷା ପାଇଯାଇଥିଲେ।

ଗୁରୁତର ଅବସ୍ଥାରେ ତାଙ୍କୁ ବାଇକ୍‌ରେ ଆଠଗଡ଼ ଡ଼ାକ୍ତରଖାନାକୁ ନିଆ ଯାଇଥିଲା ବେଳେ ସେଠାରେ ଡ଼ାକ୍ତର ତାଙ୍କୁ ମୃତ ଘୋଷଣା କରିଥିଲେ। ଆଠଗଡ଼ ଥାନାରେ  ଅପମୃତ୍ୟୁ ମାମଲା ୯/୨୩ ଅନୁସାରେ ମାମଲା ରୁଜୁ କରି ତଦନ୍ତ ଆରମ୍ଭ କରାଯାଇଛି ବୋଲି ସବ ଇନିସପେକ୍ଟର ବିଶ୍ବଜିତ ଜେନା ପ୍ରକାଶ କରିଛନ୍ତି।