ମାଲକାନଗିରି: ମାଲକାନଗିରି ସହରରେ ଜଣେ ନାବାଳିକାଙ୍କ ସହ ହୋଇଛି ଗଣଦୁଷ୍କର୍ମ। ଗୋଟିଏ ରାତିରେ ପୃଥକ ପୃଥକ ସ୍ଥାନରେ ନାବାଳିକା ଜଣକ ପାଶବିକ ଅତ୍ୟାଚାରର ଶିକାର ହୋଇଛନ୍ତି। ଏହି ଘଟଣାରେ ପୁଲିସ ଜଣେ ଟ୍ରକ୍‌ ଡ୍ରାଇଭରଙ୍କ ସମେତ ୪ଜଣଙ୍କୁ ଗିରଫ କରିଛି। ଅନ୍ୟପଟେ ଏହି ଚାଞ୍ଚଲ୍ୟକର ଘଟଣାକୁ ନେଇ ମାଲକାନଗିରିରେ ରାଜନୈତିକ ବୟାନବାଜି ଆରମ୍ଭ ହୋଇଛି।
ମାଲକାନଗିରି ସହରସ୍ଥିତ ଗୋଟିଏ ଘରେ ପ୍ରଥମେ ନାବାଳିକା ଗଣଦୁଷ୍କର୍ମର ଶିକାର ହୋଇଥିଲେ। ତାଙ୍କ ସହ ମନୋଜ ହରିଜନ, ରୋହିତ କୁମାର ହିଆଲ ଏବଂ ବୀର ଭାର୍ତିଆ ଦୁଷ୍କର୍ମ କରିଥିବା ଅଭିଯୋଗ ହୋଇଛି। ଏହି ଘଟଣା ପରେ ନାବାଳିକା ଜଣକ ନିଜ ଘରକୁ ଫେରିବା ରାସ୍ତାରେ ଜଣେ ଟ୍ରକ୍‌ ଡ୍ରାଇଭର ହାବୁଡ଼ରେ ପଡ଼ିଥିଲେ। ଡ୍ରାଇଭର ଜଣକ ତାଙ୍କୁ ଉଠାଇ ନେଇ ମାଲକାନଗିରି ସହର ଠାରୁ ୧୫କିମି ଦୂର ତଥା ଜାତୀୟ ରାଜପଥ କଡ଼ ବିଜାଘାଟିରେ ଦୁଷ୍କର୍ମ କରିଥିଲା। ନାବାଳିକାଙ୍କ ଚିତ୍କାର ଶୁଣି ସ୍ଥାନୀୟ ଲୋକ ପହଞ୍ଚି ଯାଇଥିଲେ। ମଧ୍ୟପ୍ରଦେଶର ଟ୍ରକ୍‌ ଡ୍ରାଇଭର ସେଭମ ସିଂକୁ ଅଟକ ରଖି ପୁଲିସକୁ ଖବର ଦେଇଥିଲେ। ଘଟଣାସ୍ଥଳରେ ପୁଲିସ ପହଞ୍ଚି ନାବାଳିକାଙ୍କୁ ଉଦ୍ଧାର କରିବା ସହ ଡ୍ରାଇଭରକୁ ଗିରଫ କରିଥିଲା। ପରବର୍ତ୍ତୀ ସମୟରେ ପୀଡ଼ିତାଙ୍କ ବୟାନ ଆଧାରରେ ଅନ୍ୟ ୩ ଅଭିଯୁକ୍ତ ଗିରଫ ହୋଇଥିବା ସୂଚନା ମିଳିଛି। ପୀଡ଼ିତାଙ୍କ ଡାକ୍ତରୀ ମାଇନା ପରେ ଶକ୍ତି ସଦନ ସେଣ୍ଟରରେ ରଖାଯାଇଛି। ଆଜି ସକାଳେ ଏହି ଘଟଣା ପ୍ରଘଟ ହେବାପରେ କଂଗ୍ରେସ ଏବଂ ବିଜେଡି ନେତା ପୃଥକ ଭାବେ ମାଲକାନଗିରି ଥାନା ଅଧିକାରୀଙ୍କୁ ଭେଟିଥିଲେ। ସରକାରଙ୍କ ବିରୋଧରେ ନାରାବାଜି କରିଥିଲେ। ବିଜେପି ସରକାର ଆସିବା ପରେ ଦୁଷ୍କର୍ମ ଭଳି ଘଟଣା ବୃଦ୍ଧି ପାଇଛି। ତେଣୁ ତୁରନ୍ତ ମୁଖ୍ୟମନ୍ତ୍ରୀ ଇସ୍ତଫା ଦିଅନ୍ତୁ ଓ ପୀଡ଼ିତାଙ୍କୁ ତ୍ବରିତ ନ୍ୟାୟ ପ୍ରଦାନ କରାଯାଉ ବୋଲି ଦାବି କରିଥିଲେ। ସେହିପରି ବିଜେପି କର୍ମୀ ମଧ୍ୟ ଥାନା ଅଧିକାରୀଙ୍କୁ ଭେଟିବା ପରେ କହିଛନ୍ତି ଏହା ଦୁର୍ଭାଗ୍ୟଜନକ ଘଟଣା। ପୀଡ଼ିତାଙ୍କୁ ନିଶ୍ଚିତ ନ୍ୟାୟ ମିଳିବ।  ଘଟଣାର ତଦନ୍ତ ଚାଲିଛି, ଅଭିଯୁକ୍ତଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଏସ୍‌ପି ବିନୋଦ ପାଟିଲ ଗଣମାଧ୍ୟମକୁ କହିଛନ୍ତି।