ରାଉରକେଲା: ରାଉରକେଲାରୁ ଅପହୃତ ନାବାଳିକା କେନ୍ଦ୍ରାପଡ଼ା ଜିଲ୍ଲା ଓଳାଭର ହାଟରୁ ଉଦ୍ଧାର ହୋଇଛନ୍ତି। ନାବାଳିକାଙ୍କୁ ଜୋରଜବରଦସ୍ତ ଘରେ କାମ କରାଇବାକୁ ନେଇଥିବା ଶିକ୍ଷୟିତ୍ରୀ ଘଟଣାସ୍ଥଳରୁ ଫେରାର ହୋଇ ଯାଇଛନ୍ତି। ମିଳିଥିବା ସୂଚନା ମୁତାବକ ଆଜି କେନ୍ଦ୍ରାପଡ଼ା ଓଳାଭର ହାଟରେ ଜଣେ ୬ ବର୍ଷର ନାବାଳିକା ଏକାକୀ ଛିଡ଼ା ହୋଇ କାନ୍ଦୁଥିଲେ। ହାଟକୁ ଫେରି କରିବାକୁ ଯାଇଥିବା ଚାନ୍ଦବାଲି ରାମପାଲିର ଜଣେ ଫେରିବାଲା ଝିଅଟି କାନ୍ଦୁଥିବା‌ ଦେଖି ତା’ ପାଖକୁ ଯିବା ସହ ଘର କେଉଁଠି, ଏଠାକୁ କେମିତି ଆସିଲ ବୋଲି ପଚାରିଥିଲେ। ଶିକ୍ଷୟିତ୍ରୀ ମୋତେ ରାଉରକେଲାରୁ ଜୋରଜବରଦସ୍ତ ଏଠାକୁ ନେଇ ଆସିଛନ୍ତି। ଗାଡ଼ିରେ କିଛି ଯାତ୍ରୀ ପଚରାଉଚୁରା କଲା ପରେ ଶିକ୍ଷୟିତ୍ରୀ ମୋତେ ଏଠି ଛାଡ଼ି ଫେରାର ହୋଇଗଲେ ବୋଲି ନାବାଳିକା ଜଣକ କହିଥିଲେ। ଫେରିବାଲା ଜଣକ ଝିଅକୁ ଚାନ୍ଦବାଲି ଏନ୍‌ଏସି ରାମପାଲିସ୍ଥିତ ଘରକୁ ଆଣି ରଖିଛନ୍ତି। ନାବାଳିକାଙ୍କ ଘର ଠିକଣା ପୁଲିସ ପଚାରି ବୁଝିବା ସହ ଶିକ୍ଷୟିତ୍ରୀ ଜଣକ କାହିଁକି ତାଙ୍କୁ ଓଳାଭରରେ ଆଣି ଛାଡ଼ିଗଲେ, ସେ ନେଇ ତଦନ୍ତ ଚଳାଇଛି।