ଛାତ୍ରୀଙ୍କୁ ଅସଦାଚରଣ, ଯୁବକ ଗିରଫ

ବ୍ରହ୍ମବରଦା: ଯାଜପୁର ସଦର ଥାନା ରୁଦ୍ରପୁର ପଞ୍ଚାୟତ ବାଗସାହିର ଜନୈକ କଲେଜ ଛାତ୍ରୀଙ୍କୁ ଅସଦାଚରଣ କରିବା  ଅଭିଯୋଗରେ କାକୁଡ଼ିକୁଦ ଗ୍ରାମର ଆଶିଷ ଜେନାକୁ ପୁଲିସ ଗିରଫ କରିଛି। ସଂପୃକ୍ତ ଛାତ୍ରୀ କଲେଜରୁ ସାଇକେଲ ଯୋଗେ ଘରକୁ ଫେରୁଥିବାବେଳେ କାକୁଡ଼ିକୁଦ ଖେଳପଡ଼ିଆ ନିକଟରେ ଅଭିଯୁକ୍ତ ଅସଦାଚରଣ କରିଥିଲା।

ସ୍ଥାନୀୟ ଲୋକେ ଆସିଯିବାରୁ ସେଠାରୁ ପଳାଇ ଯାଇଥିଲା। ଏନେଇ ଛାତ୍ରୀ ଘରେ ଜଣାଇବାରୁ ତାଙ୍କ ବାପା ଯାଜପୁର ସଦର ଥାନାରେ ଲିଖିତ ଅଭିଯୋଗ କରିଥିଲେ। ପୁଲିସ ମାମଲା ରୁଜୁ କରି ଚଢ଼ଉ କରିଥିଲେ ମଧ୍ୟ ଅଭିଯୁକ୍ତ ଘରୁ ଚମ୍ପଟ ମାରିଥିଲା। ଗତ ବୁଧବାର ଅପରାହ୍‌ଣରେ ସୁଜନପୁରର ଏକ ଗ୍ୟାରେଜରେ ସେ ବାଇକ୍‌ ମରାମତି କରୁଥିବାବେଳେ ପୁଲିସ ପହଞ୍ଚି ତାକୁ ଗିରଫ କରିଥିଲା। ଆଜି ତାକୁ କୋର୍ଟଚାଲାଣ କରାଯାଇଛି।