ଦୁର୍ବୋଧ୍ୟ ଏମ୍ଏଲ୍ଏ ଲ୍ୟାଡ୍ : ଲ୍ୟାଡ୍ର ନିୟମାବଳୀ ନେଇ ସଭ୍ୟଙ୍କ ଅଧିକାଂଶ ପ୍ରଶ୍ନର ସିଧା ଉତ୍ତର ଦେଇପାରି ନ ଥିଲେ ମନ୍ତ୍ରୀ
ଭୁବନେଶ୍ବର : ପୂର୍ବତନ ବିଧାୟକଙ୍କ ଆଞ୍ଚଳିକ ଉନ୍ନୟନ ପାଣ୍ଠି(ଏମ୍ଏଲ୍ଏ ଲ୍ୟାଡ୍)ରୁ ମଞ୍ଜୁରି ହୋଇଥିବା ପ୍ରକଳ୍ପ ପରବର୍ତ୍ତୀ ସମୟରେ ବଦଳି ପାରିବ କି ନାହିଁ ? ଏମ୍ଏଲ୍ଏ ଲ୍ୟାଡ୍ରୁ ସ୍କୁଲ୍ ଘର ମରାମତି ଓ ନବୀନକରଣ ହୋଇପାରିବ କି ନାହିଁ ? ଏମ୍ଏଲ୍ଏ ଲ୍ୟାଡ୍ରୁ କିଏ ଅର୍ଥ ମଞ୍ଜୁରି କରିବ, ବିଧାୟକ ନା ଜିଲ୍ଲାପାଳ?
Sambad is now on WhatsApp
Join and get latest news updates delivered to you via WhatsApp
ଆଜି ଏମ୍ଏଲ୍ଏ ଲ୍ୟାଡ୍କୁ ନେଇ ଏମିତି ପ୍ରଶ୍ନ ଗଦା କରିଥିଲେ ଶାସକ ଓ ବିରୋଧୀ ଦଳ ବିଧାୟକ। ନବାଗତ ବିଧାୟକ ଲ୍ୟାଡ୍ର ନିୟମାବଳୀ ଜାଣିବାକୁ ଚାହିଁଥିଲେ, ବରିଷ୍ଠ ବି ପ୍ରଶ୍ନ କରିଥିଲେ। ଯୋଜନା ଓ ସଂଯୋଜନ ମନ୍ତ୍ରୀ ପଦ୍ମନାଭ ବେହେରା ଗୋଟିଏ ନିୟମ କଥା କହୁଥିଲା ବେଳେ ଜିଲ୍ଲା ପ୍ଲାନିଂ ଅଫିସର୍ ଅଲଗା ନିୟମ କହୁଛନ୍ତି ବୋଲି ବରିଷ୍ଠ ବିଧାୟକ ଅଭିଯୋଗ କରିଥିଲେ।
ଅଧିକାଂଶ ପ୍ରଶ୍ନର ସିଧା ଉତ୍ତର ମନ୍ତ୍ରୀ ଦେଇପାରି ନ ଥିଲେ। ବିଧାୟକମାନେ ଲ୍ୟାଡ୍ କିପରି ଖର୍ଚ୍ଚ ହେବ, ସବୁ ଜାଣିଛନ୍ତି ବୋଲି କହି ମନ୍ତ୍ରୀ ପ୍ରଶ୍ନଗୁଡ଼ିକୁ ଏଡ଼ାଇବାକୁ ଚେଷ୍ଟା କରିଥିଲେ। କିନ୍ତୁ ବାଚସ୍ପତି ବାରମ୍ବାର ସ୍ପଷ୍ଟ କରିବାକୁ ମନ୍ତ୍ରୀଙ୍କୁ କହିଲେ। ମନ୍ତ୍ରୀଙ୍କ ଉତ୍ତର ସନ୍ତୋଷଜନକ ହେଉ ନ ଥିବାରୁ ସେ ଗୋଳଉଛନ୍ତି ବୋଲି ସଭ୍ୟମାନେ କହିଥିଲେ।
ବିଜେପି ସଭ୍ୟ ଜୟନ୍ତୀ ଷଡ଼ଙ୍ଗୀ ପୂର୍ବତନ ସାଂସଦ ଓ ବିଧାୟକଙ୍କ ପାଣ୍ଠିରୁ କେତେ ପ୍ରତିଶତ ଅର୍ଥ ଖର୍ଚ୍ଚ ହୋଇଛି ବୋଲି ମୂଳ ପ୍ରଶ୍ନ କରିଥିଲେ। ଉତ୍ତରରେ ମନ୍ତ୍ରୀ କହିଥିଲେ, ପୂର୍ବତନ ସାଂସଦଙ୍କ ଆଞ୍ଚଳିକ ଉନ୍ନୟନ ପାଣ୍ଠିର ଅନୁମୋଦିତ ଅର୍ଥରୁ ୯୨.୭୩ ପ୍ରତିଶତ ଖର୍ଚ୍ଚ ହୋଇଛି ଓ ୧,୩୮,୪୧୧ଟି କାର୍ଯ୍ୟ ସମ୍ପୂର୍ଣ୍ଣ ହୋଇଛି। ପୂର୍ବତନ ବିଧାୟକଙ୍କ ଆଞ୍ଚଳିକ ଉନ୍ନୟନ ପାଣ୍ଠିର ଅନୁମୋଦିତ ଅର୍ଥରୁ ୮୪.୦୪ ପ୍ରତିଶତ ଖର୍ଚ୍ଚ ହୋଇଛି। ସାଂସଦ ପାଣ୍ଠି ଓ ବିଧାୟକ ପାଣ୍ଠିରେ ଯଥାକ୍ରମେ ୧୧୪୨ ଓ ୫୩୪୦ଟି ପ୍ରକଳ୍ପ ଆଦୌ ଆରମ୍ଭ ହୋଇ ନାହିଁ।
ମୂଳ ପ୍ରଶ୍ନକର୍ତ୍ତା ଶ୍ରୀ ଷଡ଼ଙ୍ଗୀ ପଚାରିଥିଲେ, ବିଧାୟକ ଆଞ୍ଚଳିକ ଉନ୍ନୟନ ପାଣ୍ଠିରେ ମଞ୍ଜୁରି ହୋଇ ଧାର୍ଯ୍ୟ ସମୟ ମଧ୍ୟରେ ଆରମ୍ଭ ହୋଇ ନ ଥିବା ପ୍ରକଳ୍ପକୁ ଏବେ ପରିବର୍ତ୍ତନ କରାଯାଇପାରିବ କି ନାହିଁ ? ମନ୍ତ୍ରୀ କହିଥିଲେ, ମଞ୍ଜୁରି ହେବାର ୬ ମାସ ଭିତରେ ଖର୍ଚ୍ଚ େହବା କଥା। ଯଦି ନ ହୋଇଛି, ପ୍ରକଳ୍ପ ପରିବର୍ତ୍ତନ ହୋଇପାରିବ।
କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ପଚାରିଥିଲେ, ଏମ୍ପି ଲ୍ୟାଡ୍ ଅର୍ଥରୁ ମନ୍ଦିର ତିଆରି, ମରାମତି ପାଇଁ ଖର୍ଚ୍ଚ ହୋଇପାରିବ କି ନାହିଁ ? ମନ୍ଦିର ପରିସର ଭିତରେ କୌଣସି କାମ ପାଇଁ ଖର୍ଚ୍ଚ ହୋଇପାରିବ କି ନାହିଁ ? ଲ୍ୟାଡ୍ରୁ ମଞ୍ଜୁରି ହୋଇଥିବା ପ୍ରକଳ୍ପର କାର୍ଯ୍ୟାଦେଶ ସରପଞ୍ଚ କିମ୍ବା ସମିତି ସଭ୍ୟଙ୍କ ନାଁରେ ଦିଆଯାଇପାରିବ କି ?
ମନ୍ତ୍ରୀ କହିଥିଲେ, ମନ୍ଦିର ପାଇଁ ଏମ୍ପି ଲ୍ୟାଡ୍ ଅର୍ଥ ଖର୍ଚ୍ଚ ହୋଇପାରିବ ନାହିଁ। କିନ୍ତୁ ମନ୍ଦିର ପରିସରରେ କମ୍ୟୁନିଟି ସେଣ୍ଟର୍ ପାଇଁ ସାଂସଦମାନେ ଟଙ୍କା ମଞ୍ଜୁରି କରୁଛନ୍ତି। ସରପଞ୍ଚ/ସମିତି ସଭ୍ୟଙ୍କ ନାଁରେ କାର୍ଯ୍ୟାଦେଶ ଦିଆଯାଇପାରିବ ନାହିଁ। ଏମିତି ଦୃଷ୍ଟାନ୍ତ ଆସିଲେ ତାହାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଗଣେଶ ରାମ ଖୁଣ୍ଟିଆ ଓ ଭାଗୀରଥି ସେଠୀ ସ୍କୁଲ୍ ମରାମତି ଓ ନବୀକରଣ ପାଇଁ ଟଙ୍କା ମଞ୍ଜୁରି କଲେ ବି ଜିଲ୍ଲା ପ୍ଲାନିଂ ମେମ୍ବର ତାହାକୁ ମନା କରିଦେଉଛନ୍ତି ବୋଲି ଅଭିଯୋଗ କରିଥିଲେ। ମନ୍ତ୍ରୀ କହିଥିଲେ, ସ୍କୁଲ୍ ମରାମତି ଓ ନବୀକରଣ ପାଇଁ ଅର୍ଥ ଦିଆଯାଇପାରିବ। ପ୍ଲାନିଂ ମେମ୍ବର ମନା କରିପାରିବେନି। ବିଧାୟକମାନେ ଏ ନେଇ ଲେଖିକି ଦିଅନ୍ତୁ, ପଦକ୍ଷେପ ନିଆଯିବ। ବିଜେଡି ସଭ୍ୟ ପ୍ରଦୀପ ଅମାତ କହିଥିଲେ, ଏମ୍ଏଲ୍ଏ ଲ୍ୟାଡ୍ରୁ ପ୍ରକଳ୍ପ ମଞ୍ଜୁରୀ କର୍ତ୍ତୃପକ୍ଷ କିଏ ଜିଲ୍ଲାପାଳ ନା ବିଧାୟକ ? ମନ୍ତ୍ରୀ କହିଥିଲେ, ବିଧାୟକମାନେ ପ୍ରସ୍ତାବ ଦେବେ, ଜିଲ୍ଲାପାଳ ମଞ୍ଜୁରି କରିବେ। ସୌଭିକ ବିଶ୍ବାଳ ଅତିରିକ୍ତ ପ୍ରଶ୍ନ କରିଥିଲେ।