ଖୋର୍ଦ୍ଧା : ଗତ ୮ ତାରିଖରେ ବାଲୁଗାଁ ଏନ୍ଏସିରେ ବିଜେପିର ନଗର ମଣ୍ତଳ ଅଧ୍ୟକ୍ଷ ଓ ଅନ୍ୟ ଜଣେ ଗଣମାଧ୍ୟମ ପ୍ରତିନିଧିଙ୍କୁ ଆକ୍ରମଣ କରିବା ଓ ଗାଳିଗୁଲଜ କରିବା ମାମଲାରେ ପୁଲିସ ଗତକାଲି ଚିଲିକା ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ଭୁବନେଶ୍ବରସ୍ଥ ସରକାରୀ ବାସଭବନକୁ ଖୋଜାଖୋଜି କରିଛି। ମାତ୍ର ବିଧାୟକ ଶ୍ରୀ ଜଗଦ୍ଦେବ ସେଠାରେ ନ ଥିବାରୁ ପୁଲିସ ଖାଲି ହାତରେ ଫେରିଛି। ତେବେ ଅନୁସୂଚିତ ଜାତି ଓ ଜନଜାତି ନିର୍ଯାତନା ନିରୋଧ ଆଇନରେ ବିଧାୟକ ଜଗଦ୍ଦେବଙ୍କ ଜେରା କରିବାର ଆବଶ୍ୟକତା ରହିଛି। ଯେହେତୁ ପୁଲିସ ତାଙ୍କୁ ତାଙ୍କର ଫୋନ୍ ନମ୍ବର କିମ୍ବା ସରକାରୀ ବାସଭବନରେ ଠାବ କରିପାରିନାହିଁ ଏଣୁ ତାଙ୍କୁ ଥାନାରେ ହାଜର ହେବାକୁ ନୋଟିସ ଜାରି କରିବ ବୋଲି ଜଣାଯାଇଛି।
Sambad is now on WhatsApp
Join and get latest news updates delivered to you via WhatsApp
ସୂଚନାନୁସାରେ, ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ବିରୋଧରେ ବାଲୁଗାଁ ଥାନାରେ ୧୫୬ ଓ ୧୫୭/୨୦୨୧ରେ ଦୁଇଟି ଏତଲା ରୁଜୁ ହୋଇଛି। ଉଭୟ ମାମଲାରେ ଏସ୍ସି/ଏସ୍ଟି ଆଟ୍ରୋସିଟି ପ୍ରିଭେନ୍ସନ ଆକ୍ଟର ଦଫା ୩(୧) ଆର୍–ଏସ୍ ଲାଗିଛି। ସିଆର୍ପିସି ନିୟମ ଅନୁସାରେ ଜଣେ ଏସ୍ଡିପିଓଙ୍କ ଅଧୀନରେ ଏହି ମାମଲାର ତଦନ୍ତ କରାଯିବ ଓ ବର୍ତ୍ତମାନ ବାଲୁଗାଁ ଏସ୍ଡିପିଓ ଏହି ମାମଲାର ତଦନ୍ତ ଦାୟିତ୍ବରେ ଅଛନ୍ତି। ଏହାସହ ଏହି ମାମଲାର ଦଣ୍ତ ଅବଧି ୭ ବର୍ଷ ହୋଇଥିବାରୁ ଅଭିଯୁକ୍ତଙ୍କୁ ଜେରା କରିବା ଆବଶ୍ୟକତା ରହିଛି। ଏହି ଦୃଷ୍ଟିରୁ ପୁଲିସ ପ୍ରଥମେ ବିଧାୟକ ଶ୍ରୀ ଜଗଦ୍ଦେବଙ୍କୁ ଫୋନ୍ରେ ଯୋଗାଯୋଗ କରି ବିଫଳ ହୋଇଥିଲା। ପରେ ଖୋର୍ଦ୍ଧା ଏସ୍ଡିପିଓ ସୁଶୀଲ କୁମାର ମିଶ୍ରଙ୍କ ନେତୃତ୍ବରେ ଏକ ଟିମ୍ ତାଙ୍କ ଭୁବନେଶ୍ବରସ୍ଥ ସରକାରୀ ବାସଭବନ ଆଇଭିଆରର-୩୦୫କୁ ପଚାରାଉଚୁରା କରିବାକୁ ଯାଇଥିଲା। ମାତ୍ର ସେଠାରେ ବିଧାୟକଙ୍କୁ ନପାଇ ଫେରିଆସିଥିଲା।
ଜେରା ପାଇଁ ବିଧାୟକଙ୍କୁ ଠାବ କରାଯାଇପାରୁନାହିଁ, ତାଙ୍କ ବିରୋଧରେ ଥାନାରେ ହାଜର ହେବା ପାଇଁ ପୁଲିସ ପକ୍ଷରୁ ନୋଟିସ୍ ଜାରି କରାଯିବ ବୋଲି ଜଣାଯାଇଛି। ଯେହେତୁ ଶନିବାର ଓ ରବିବାର ଛୁଟି ରହୁଛି, ସୋମବାର ଏନେଇ ଉପରିସ୍ଥ ଅଧିକାରୀଙ୍କ ସହ ଆଲୋଚନା କରି ବ୍ୟବସ୍ଥା କରାଯିବ ବୋଲି ମାମଲା ସହ ଜଡ଼ିତ ଥିବା ଜଣେ ପଦସ୍ଥ ପୁଲିସ ଅଧିକାରୀ କହିଛନ୍ତି। ଅପରପକ୍ଷରେ, ଏନେଇ ଖୋର୍ଦ୍ଧା ଜିଲ୍ଲା ବିଜେପି ସଭାପତି ରଶ୍ମିରଂଜନ ମହାପାତ୍ର କହିଛନ୍ତି ଯେ ଏହି ମାମଲାରେ ତାଙ୍କର ଗିରଫଦାରି ଯାଏ ବିଜେପି ଚୁପ ବସିବ ନାହିଁ। ସୋମବାର ପ୍ରଶାନ୍ତଙ୍କ ଗିରଫଦାରୀ ପାଇଁ ଖୋର୍ଦ୍ଧା ଗ୍ରାମାଞ୍ଚଳ ଏସ୍ପିଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯିବ। ସେହିଭଳି ଅଭିଯୋଗକାରୀ ନିରଂଜନ ସେଠୀ କହିଛନ୍ତି ଯେ ସେ ମାଡ଼ ଖାଇଛନ୍ତି ଓ ବିନାକାରଣରେ ଅପମାନିତ ହୋଇଛନ୍ତି। ଏଣୁ ତାଙ୍କୁ ନ୍ୟାୟ ମିଳିବା ଯାଏ ସେ ନିଜର ଆଇନଗତ ଲଢେ଼ଇ ଜାରି ରଖିବେ। ବିଧାୟକଙ୍କୁ ଗିରଫ କରାନଗଲେ ସେ ଥାନା ସମ୍ମୁଖରେ ଧାରଣାରେ ଦେବେ ବୋଲି ଶ୍ରୀ ସେଠୀ କହିଛନ୍ତି।