୨୬ରେ ସାରା ଦେଶରୁ ବିଦାୟ ନେବ ମୌସୁମୀ
ଭୁବନେଶ୍ୱର : ଚଳିତବର୍ଷ ମୌସୁମୀର ପ୍ରତ୍ୟାବର୍ତ୍ତନ ପ୍ରକ୍ରିୟା ୩୬ ଦିନ ବିଳମ୍ବରେ ଆରମ୍ଭ ହୋଇଥିଲେ ହେଁ ତ୍ବରିତ ବେଗରେ ଶେଷ ହୋଇଛି। ଆସନ୍ତା ୨୬ ତାରିଖରେ ସାରା ଭାରତରୁ ମୌସୁମୀ ସଂପୂର୍ଣ୍ଣ ଭାବେ ଅପସରି ଯିବ। ଅକ୍ଟୋବର ୬ ତାରିଖରେ ଉତ୍ତର-ପଶ୍ଚିମ ଭାରତରୁ ମୌସୁମୀ ପ୍ରତ୍ୟାବର୍ତ୍ତନ ପ୍ରକ୍ରିୟା ଆରମ୍ଭ ହୋଇଥିଲା। ମୌସୁମୀ ସମ୍ପୂର୍ଣ୍ଣ ଭାବେ ଭାରତରୁ ବିଦାୟ ନେବାକୁ ୨ ମାସରୁ ଅଧିକ ସମୟ ନେଇଥାଏ। କିନ୍ତୁ ଚଳିତବର୍ଷ ମାତ୍ର ୨୦ ଦିନରେ ଏହି ପ୍ରତ୍ୟାବର୍ତ୍ତନ ପ୍ରକ୍ରିୟା ଶେଷ ହେବ।
Sambad is now on WhatsApp
Join and get latest news updates delivered to you via WhatsApp
ଗୁୁରୁବାର ଦିନ ବାରିପଦା ଓ ମାଲକାନଗିରିରୁ ମୌସୁମୀ ପ୍ରତ୍ୟାବର୍ତ୍ତନ କରିଥିବା ବେଳେ ୨୩ ତାରିଖ ସୁଦ୍ଧା ପୂରା ଓଡ଼ିଶାରୁ ବିଦାୟ ନେବ। ଏଥିସହ ୨୬ତାରିଖ ସୁଦ୍ଧା ସାରା ଦେଶରୁ ମୌସୁମୀ ଫେରିଯିବ। ବଙ୍ଗୋପସାଗରର ବାୟୁମଣ୍ଡଳ ତଳସ୍ତରରେ ଉତ୍ତର-ପୂର୍ବ ପବନ ପ୍ରବାହିତ ଆରମ୍ଭ ହୋଇଯାଇଥିବାରୁ ଦେଶରୁ ଦକ୍ଷିଣ-ପଶ୍ଚିମ ମୌସୁମୀ ବାୟୁ ଅପସାରିତ ହେବାକୁ ଅନୁକୂଳ ବାତାବରଣ ସୃଷ୍ଟି ହୋଇଛି। ଏଥିସହ ଉତ୍ତର-ପୂର୍ବ ମୌସୁମୀ ଏବେ ଦକ୍ଷିଣ-ପୂର୍ବ ଭାରତରେ ସକ୍ରିୟ ହେବାକୁ ଅନୁକୂଳ ପରିବେଶ ରହିଛି। ଏଣୁ ଦେଶରେ ଆସନ୍ତା ୨୬ ତାରିଖ ଆଡ଼କୁ ଉତ୍ତର-ପୂର୍ବ ମୌସୁମୀ ସକ୍ରିୟ ହେବ ବୋଲି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ କୁହାଯାଇଛି। ଏହା ପ୍ରଭାବରେ ନଭେମ୍ବର ଓ ଡିସେମ୍ବରରେ ଦକ୍ଷିଣ ଭାରତର ରାଜ୍ୟଗୁଡ଼ିକରେ ବର୍ଷା ହେବ। ରାଜ୍ୟରେ ଏବେ ପାଗ ଶୁଖିଲା ରହିଥିବା ବେଳେ ଖରାର ପ୍ରକୋପ ବଢ଼ିଛି। ଓଡ଼ିଶାକୁ ଧୀରେଧୀରେ ଉତ୍ତରା ପବନ ପ୍ରବାହିତ ହେବା ଆରମ୍ଭ କରିବ। ଫଳରେ ରାଜ୍ୟର ତାପମାତ୍ରା କମିବ ଓ ଅକ୍ଟୋବର ଶେଷ ସୁଦ୍ଧା ଶୀତ ଅନୁଭୂତ ହେବ ବୋଲି ପାଣିପାଗ ବିଶେଷଜ୍ଞମାନେ ମତ ଦେଇଛନ୍ତି।