ଜୟପୁର : ଅବିଭକ୍ତ କୋରାପୁଟ ଜିଲ୍ଲାରେ ଭୟାବହ ପରିସ୍ଥିତି ସୃଷ୍ଟି କରିସାରିଲାଣି ମାରାତ୍ମକ ହଇଜା। ଦେଢ଼ମାସ ମଧ୍ୟରେ ୪୦ଜଣଙ୍କର ମୃତ୍ୟୁ ହୋଇସାରିଲାଣି। ରାୟଗଡ଼ା ଜିଲ୍ଲା କାଶୀପୁର ବ୍ଲକ୍ରେ ଥମିବା ପୂର୍ବରୁ କୋରାପୁଟ ଏବଂ ନବରଙ୍ଗପୁର ଜିଲ୍ଲାରେ ପ୍ରକୋପ ବଢ଼ିବାରେ ଲାଗିଛି। ଦେଢ଼ ମାସ ମଧ୍ୟରେ କେବଳ ରାୟଗଡ଼ା ଜିଲ୍ଲା କାଶୀପୁର ବ୍ଲକ୍ରେ ୩ଶହରୁ ଊର୍ଦ୍ଧ୍ବ ଜଣ ଆକ୍ରାନ୍ତ ହୋଇ ୧୯ଜଣଙ୍କ ମୃତ୍ୟୁ ହୋଇସାରିଲାଣି। ସ୍ଥିତି ଏବେ ବି ଉଦ୍ବେଗ ରହିଛି। ନୂଆ ଅଞ୍ଚଳରୁ ନୂଆ ଆକ୍ରାନ୍ତ ଚିହ୍ନଟ ହେଉଛନ୍ତି।
Sambad is now on WhatsApp
Join and get latest news updates delivered to you via WhatsApp
ପ୍ରଥମେ ରାୟଗଡ଼ା ଜିଲ୍ଲାରେ ହଇଜା ବ୍ୟାପିଥିଲା। ଏହି ଜିଲ୍ଲାରେ କାଶୀପୁରର ୧୯ଜଣଙ୍କର ମୃତ୍ୟୁ ହୋଇଥିବା ବେଳେ କଲ୍ୟାଣସିଂହପୁରରେ ଜଣଙ୍କର ମୃତ୍ୟୁ ହୋଇଛି। ଅର୍ଥାତ୍ ଦେଢ଼ମାସ ମଧ୍ୟରେ ୨୦ଜଣଙ୍କର ମୃତ୍ୟୁ ହୋଇସାରିଛି। ରାୟଗଡ଼ା ପରେ ସର୍ବାଧିକ ପ୍ରଭାବିତ ହୋଇଛି ନବରଙ୍ଗପୁର ଜିଲ୍ଲା। ମାସକ ମଧ୍ୟରେ ୧୧ଜଣଙ୍କ ମୃତ୍ୟୁ ହୋଇଥିବା ସୂଚନା ମିଳିଛି। ଦେଢ଼ ଶହରୁ ଊର୍ଦ୍ଧ୍ବ ଜଣ ଆକ୍ରାନ୍ତ ହୋଇ ସାରିଲେଣି। ସଦ୍ୟତମ ଘଟଣାରେ ବୁଧବାର ସକାଳେ ରାଇଘର ବ୍ଲକ୍ କଚରାପାରା-୩ ପଞ୍ଚାୟତ ଓଡିଣ୍ଡି ଗ୍ରାମର କିଶାନ ଗଣ୍ଡାଙ୍କ ଝାଡ଼ାବାନ୍ତିରେ ମୃତ୍ୟୁ ହୋଇଛି। କିଶାନଙ୍କ ପୂର୍ବରୁ ଏହି ବ୍ଲକ୍ର ଅଞ୍ଚଳାଡିହି ଗ୍ରାମର ଜଣେ ବୃଦ୍ଧାଙ୍କ ଗତ ୬ତାରିଖରେ ଏବଂ ୮ତାରିଖରେ ତରେଇଡିହି ଗ୍ରାମରେ ଜଣେ ଅଢ଼େଇ ବର୍ଷର ଶିଶୁ ଝାଡ଼ାବାନ୍ତିରେ ମୃତ୍ୟୁବରଣ କରିଥିବା ଜଣାପଡ଼ିଛି। ନବରଙ୍ଗପୁର ଜିଲ୍ଲାର ତେନ୍ତୁଳିଖୁଣ୍ଟି ବ୍ଲକ୍ ଝାଡ଼ାବାନ୍ତିରେ ସର୍ବାଧିକ ପ୍ରଭାବିତ ହୋଇଛି। ଖୁଣ୍ଟିପଦର ଓ ପଡ଼ାଆଉଁଳି ଗାଁରେ ଦୁଇ ସପ୍ତାହ ମଧ୍ୟରେ ୪ଜଣଙ୍କ ମୃତ୍ୟୁ ହୋଇ ସାରିଲାଣି। ଆଜି ବି ଉଭୟ ଗାଁର କିଛି ଜଣ ଆକ୍ରାନ୍ତଙ୍କ ଚିକିତ୍ସା ଜାରି ରହିଥିଲା। ଜଣେ ଗୁରୁତର ଆକ୍ରାନ୍ତଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। କିନ୍ତୁ, ଏଭଳି ପରିସ୍ଥିତିରେ ଗ୍ରାମବାସୀ ଏବଂ ଆକ୍ରାନ୍ତଙ୍କ ସଂପର୍କୀୟ ଯେଉଁ ଆଚରଣ ଦେଖାଉଛନ୍ତି ତାହା ଚକିତ କରୁଛି। ଛୁଇଁଲେ କାଳେ ଆକ୍ରାନ୍ତ ହେବେ ବୋଲି ଆଶଙ୍କା କରି ରୋଗୀଙ୍କ ନିକଟକୁ ଯାଉ ନଥିବା ଜଣାପଡ଼ିଛି। ସେହିପରି ଲୋକେ ବି ସ୍ବାସ୍ଥ୍ୟ ବିଭାଗକୁ ବିଶେଷ ସହଯୋଗ କରୁ ନଥିବା ଦେଖିବାକୁ ମଳିଛି।
ନବରଙ୍ଗପୁର ଜିଲ୍ଲା ଭଳି ସମାନ ଅବସ୍ଥା କୋରାପୁଟ ଜିଲ୍ଲାରେ ରହିଛି। ବୋରିଗୁମ୍ମା ବ୍ଲକ୍ରେ ଗତ ୧୦ଦିନ ମଧ୍ୟରେ ୨ଜଣ ଆକ୍ରାନ୍ତଙ୍କ ମୃତ୍ୟୁ ହୋଇସାରିଲାଣି। ଆଜି ସୁଦ୍ଧା ୧୨ଜଣ ଆକ୍ରାନ୍ତ ବିଭିନ୍ନ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି ହୋଇଛନ୍ତି। ସର୍ବାଧିକ ପ୍ରଭାବିତ ଡମ୍ବତୁରୁଞ୍ଜି ଗାଁରେ ସ୍ବାସ୍ଥ୍ୟ ବିଭାଗ ଅସ୍ଥାୟୀ କ୍ୟାମ୍ପ କରି ପରିସ୍ଥିତି ଉପରେ ନଜର ରଖିଛି।
ଯେଉଁ ବେଗରେ ହଇଜା ବ୍ୟାପୁଛି, ଗମ୍ଭୀର ପରିସ୍ଥିତିର ସଂକେତ ଦେଉଛି। ଖବର ମିଳିଲେ ସ୍ବାସ୍ଥ୍ୟ ବିଭାଗ ଆକ୍ରାନ୍ତଙ୍କ ଗାଁରେ ପହଞ୍ଚୁଛି ସତ। ତେବେ ସରକାରୀ ରିପୋର୍ଟରେ ବହୁ ଆକ୍ରାନ୍ତ ତଥା ମୃତକଙ୍କ ତଥ୍ୟ ମିଳୁନି। ସ୍ଥାନୀୟ ଜନପ୍ରତିନିଧି ଏବଂ ପ୍ରଭାବିତ ଗାଁ ମୁହଁ ଖୋଲିଲେ ସଂଗିନ୍ ସ୍ଥିତିର ବାସ୍ତବ ଚିତ୍ର ପଦାକୁ ଆସୁଛି। ବଡ଼ କଥା ହେଲା ଲୋକଙ୍କ ଅଭ୍ୟାସ ଏବଂ ଭୌଗୋଳିକ ସ୍ଥିତି ସହ ପାଣିପାଗକୁ ଯଥା ସମ୍ଭବ ଦୋଷ ଦେବାକୁ ଚେଷ୍ଟା କରାଯାଉଛି। ଅନ୍ୟପକ୍ଷରେ ଦୁର୍ବଳ ଭିତ୍ତିଭୂମି ଏବଂ ଠୋସ୍ ରଣନୀତିର ଅଭାବକୁ ସଂପୂର୍ଣ୍ଣ ଅଣଦେଖା କରାଯାଉଥିବା ଅଭିଯୋଗ କରାଯାଉଛି। ବର୍ଷା କମିବା ସତ୍ତ୍ବେ ଆକ୍ରାନ୍ତଙ୍କ ସଂଖ୍ୟା ବଢ଼ିବା ପଛର କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇପାରିନି।