ଘର ଭିତରୁ ମା’ ଓ ଶିଶୁପୁତ୍ରର ମୃତଦେହ ଉଦ୍ଧାର; ହତ୍ୟା ସନ୍ଦେହ, ତଦନ୍ତ ଜାରି
ବାଲୁଗାଁ : ବାଲୁଗାଁ ନିକଟସ୍ଥ ଆଙ୍କୁଲାଚଟି ଗ୍ରାମ ହରିଜନ ସାହିରେ ଏକ ଅଭାବନୀୟ ପରିସ୍ଥିତି ଦେଖାଯାଇଛି। ଘରର ଉପର ମହଲାର ଏକ କୋଠରିରୁ ମା’ ଓ ୨ ବର୍ଷର ଶିଶୁପୁତ୍ରଙ୍କ ମୃତଦେହ ମିଳିଥିବା ଦେଖିବାକୁ ମିଳିଛି। ଏ ସମ୍ପର୍କରେ ମୃତ ମହିଳାଙ୍କ ପରିବାର ପକ୍ଷରୁ ବାଲୁଗାଁ ଥାନାରେ ହତ୍ୟା ଅଭିଯୋଗ ହୋଇଛି। ପୁଲିସ ଘଟଣାସ୍ଥଳରେ ପହଞ୍ଚି ମୃତ ମହିଳାଙ୍କ ଶାଶୂ ଓ ଶ୍ବଶୁରଙ୍କୁ ଅଟକ ରଖି ସାଇଣ୍ଟିଫିକ୍ ଟିମ୍ ସହାୟତାରେ ବାଲୁଗାଁ ଏସ୍ଡିପିଓ ଓ ବାଲୁଗାଁ ଆଇଆଇସି ମିଳିତ ଭାବେ ତଦନ୍ତକୁ ଜୋର୍ଦାର୍ କରିଛନ୍ତି। ଅଭିଯୋଗକୁ ଭିତ୍ତିକରି ପୁଲିସ ଏକ ହତ୍ୟା ମାମଲା ରୁଜୁ କରି ଦୁଇ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି।
ଘଟଣାରୁ ପ୍ରକାଶ, ଆଙ୍କୁଲାଚଟି ଗ୍ରାମ ହରିଜନ ସାହିର ଭାଗୀରଥି ନାୟକଙ୍କ ପୁଅ ବିଭୁ ନାୟକ ନିକଟସ୍ଥ ନୂଆଗଡ଼ ଗ୍ରାମର ଧ୍ରୁବ ନାୟକଙ୍କ ଝିଅ ସସ୍ମିତାଙ୍କୁ ୩ ବର୍ଷ ତଳେ ବିବାହ କରିଥିଲେ ଏବଂ ୨ ବର୍ଷର ଶିଶୁପୁତ୍ର ଥିଲା। କିଛି ମାସ ତଳେ ବିଭୁ ସୁଦୂର ଦୁବାଇ ରୋଜଗାର କରିବା ପାଇଁ ଯାଇଥିବା ବେଳେ ସସ୍ମିତା ନିଜ ପୁଅ ସହ ଶାଶୂ-ଶ୍ବଶୁର, ନଣନ୍ଦ ଓ ଦିଅରଙ୍କ ସହ ମିଶିକି ରହୁଥିଲେ। ବିଭୁ ଦୁବାଇ ଯିବା ପରେ ପୁତୁରା ସହିତ ଏକ ପ୍ରକାର ସମ୍ପର୍କ ଗଢ଼ିଉଠିଥିଲା। ପରସ୍ପର ସର୍ବଦା ମୋବାଇଲ୍ରେ କଥା ହେଉଥିଲେ ବୋଲି ଶ୍ବଶୁର କହୁଥିବା ବେଳେ ଏ କଥା ବିଭୁ ଜାଣିବା ପରେ ସସ୍ମିତାଙ୍କୁ ଗାଳି କରିଥିଲେ। ଗତ ମଙ୍ଗଳବାର ସନ୍ଧ୍ୟାରେ ସସ୍ମିତା ଓ ପୁଅ ବହୁ ସମୟ ପର୍ଯ୍ୟନ୍ତ ତଳକୁ ନ ଆସିବାରୁ ଶ୍ବଶୁର ଭାଗୀରଥି ଉପର ମହଲାକୁ ଯାଇ ସସ୍ମିତା ଓ ଶିଶୁପୁତ୍ରର ମୃତଦେହ ଫ୍ୟାନରେ ଝୁଲୁଥିବା ଦେଖିବାକୁ ପାଇଥିଲେ। ଘଟଣା ସମ୍ପର୍କରେ ଭାଗୀରଥି ସେହି ରାତିରେ ବାଲୁଗାଁ ପୁଲିସକୁ ଖବର ଦେଇଥିଲେ। ପୋଲିସ ବୁଧବାର ସକାଳେ ଘଟଣାସ୍ଥଳରେ ପହଞ୍ଚି ସସ୍ମିତାର ବାପାଘରକୁ ଖବର ଦେଇଥିଲେ। ଅନ୍ୟ ପକ୍ଷରେ, ଶାଶୂ-ଶ୍ବଶୁର, ନଣନ୍ଦ ଓ ଦିଅର ମିଶି ସସ୍ମିତାଙ୍କୁ ମାରିଦେଇଥିବା ମା’ ସଜନୀ ନାୟକ ଥାନାରେ ଅଭିଯୋଗ କରିଛନ୍ତି। ପୋଲିସ ଅଭିଯୋଗକୁ ଭିତ୍ତିକରି ହତ୍ୟା ମାମଲା ରୁଜୁ କରି ମୃତଦେହ ଦୁଇଟିକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଥିବା ଜଣାପଡ଼ିଛି। ସାଇଣ୍ଟିଫିକ୍ ଟିମ୍ ଓ ବାଲୁଗାଁ ଏସ୍ଡିପିଓ ମାନସରଞ୍ଜନ ବାରିକ, ବାଲୁଗାଁ ଥାନା ଆଇଆଇସି ରମାକାନ୍ତ ମହାଳିକ ଘଟଣାର ତଦନ୍ତ ଆରମ୍ଭ କରି ଶାଶୂ ଓ ଶ୍ବଶୁରଙ୍କୁ ଅଟକ ରଖିଥିବା ଜଣାପଡ଼ିଛି। ଘଟଣାଟି ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି। ତେବେ ମୃତ୍ୟୁ ରହସ୍ୟ ଉପରୁ ଶୀଘ୍ର ପରଦା ଉଠିବ ବୋଲି ଏସ୍ଡିପିଓ ଶ୍ରୀ ବାରିକ ପ୍ରକାଶ କରିଛନ୍ତି।
