ରାଜନୈତିକ ଶତ୍ରୁତାରୁ ଯୁବକଙ୍କୁ ହତ୍ୟା ଅଭିଯୋଗ: ଫରେନସିକ୍ ଟିମ୍ ଓ ସନ୍ଧାନୀ କୁକୁରକୁ ନେଇ ପୁଲିସର ତଦନ୍ତ
ପୋଲସରା: ଗଞ୍ଜାମ ଜିଲ୍ଲା ପୋଲସରା ଅଞ୍ଚଳରେ ରାଜନୈତିକ ଶତ୍ରୁତାରୁ ଜଣେ ଯୁବକଙ୍କୁ ହତ୍ୟା କରାଯାଇଥିବା ଘଟଣା ଚାଞ୍ଚଲ୍ୟ ସୃଷ୍ଟି କରିଛି। ମୃତକ ହେଲେ ମୁକ୍ତାମାଳାଦେଇପୁର ଶାସନ ଗ୍ରାମର ଅମିତ କୁମାର ଆଚାର୍ଯ୍ୟ (୨୯)। ତାଙ୍କୁ ଗ୍ରାମର ୫ ଜଣ ହତ୍ୟା କରିଥିବା କୁହାଯାଉଛି।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁଯାୟୀ, ବନ୍ଥପାଲି ପଞ୍ଚାୟତର ପୁରୁଣା ପୋଖରୀ ନିକଟରେ ଗତକାଲି ରାତି ୧୧ଟା ସମୟରେ ଅମିତ କୁମାର ଆଚାର୍ଯ୍ୟ (୨୯)ଙ୍କୁ ବୀଭତ୍ସ ଭାବେ ହତ୍ୟା କରାଯାଇଛି। ତାଙ୍କ ବେକ କଟିଛି। ଏହାଛଡ଼ା ଅମିତଙ୍କ ପେଟ ଓ ଛାତିକୁ ମାରଣାସ୍ତ୍ରରେ ଭୁଷାଯାଇଥିବାର ଦେଖିବାକୁ ମିଳିଛି। ରାସ୍ତାକଡ଼ରେ ଅମିତଙ୍କ ବାଇକ୍ ପଡ଼ିଥିବା ବେଳେ ବିଲ ମଝିରୁ ତାଙ୍କ ମୃତଦେହ ଠାବ ହୋଇଥିଲା।
ରାଜନୈତିକ ଶତ୍ରୁତା ଯୋଗୁ ଅମିତଙ୍କୁ ହତ୍ୟା କରାଯାଇଥିବା ପରିବାର ଲୋକେ ଅଭିଯୋଗ କରିଛନ୍ତି । ଆଜି ସକାଳେ ପୋଲସରା ଥାନା ପୁଲିସ ଘଟଣାସ୍ଥଳରେ ପହଞ୍ଚି ଶବକୁ ଜବତ କରିଥିଲା। ଏହାସହ ଫରେନସିକ୍ ଟିମ୍ ଓ ସନ୍ଧାନୀ କୁକୁରକୁ ନେଇ ତଦନ୍ତ ଚଳାଇଛି ପୁଲିସ।