ଯୁବକଙ୍କୁ ପଥରରେ ଛେଚି ହତ୍ୟା

କପ୍ତିପଦା: କପ୍ତିପଦା ବ୍ଲକ୍‌ ଶରତ ଥାନା ଅନ୍ତର୍ଗତ କଳମଗଡ଼ିଆ ପଞ୍ଚାୟତର ଶ୍ରୀପଦମଞ୍ଜରୀପୁର ପ୍ରାଥମିକ ବିଦ୍ୟାଳୟ ନିକଟରେ ଜଣେ ଯୁବକଙ୍କୁ ଅତି ନୃଶଂସା ଭାବେ ହତ୍ୟା କରାଯାଇଛି। ମୃତକ ହେଲେ ସେହି ଗ୍ରାମର ଲେଣ୍ଡୁ ସିଂ। ତାଙ୍କ ମୁଣ୍ଡକୁ ପଥରରେ ଛେଚିବା ସହିତ ଏକ ଧାରୁଆ ଅସ୍ତ୍ରରେ ଭୁସି ହତ୍ୟା କରିଛନ୍ତି ଦୁର୍ବୃତ୍ତ।

ସୂଚନା ଅନୁଯାୟୀ ଶୁକୁଆପଟା ଗାଁ ପଡ଼ିଆରେ ଚକ୍ରିଖେଳ ଚାଲିଥିବା ବେଳେ ସେଠାରେ ରନ୍ଧା ଦେଶୀ କୁକୁଡ଼ା ମାଂସ ବିକ୍ରି କରିବା ପାଇଁ ସାଇକେଲ୍ ନେଇ ଯାଇଥିଲେ ଲେଣ୍ଡୁ। ତେବେ ବିକ୍ରିବଟା ସାରି ଘରକୁ ଫେରୁଥିବା ବେଳେ ଶ୍ରୀପଦମଞ୍ଜରୀପୁର ପ୍ରାଥମିକ ବିଦ୍ୟାଳୟ ନିକଟରେ କେହି ଅଜଣା ଦୁର୍ବୃତ୍ତ ଲେଣ୍ଡୁକୁ ହତ୍ୟା କରିଥିଲା।

ଗ୍ରାମବାସୀଙ୍କଠାରୁ ଖବର ପାଇ ଘରଲୋକେ ପହଞ୍ଚି ଲେଣ୍ଡୁଙ୍କୁ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ଉଦ୍ଧାର କରି ଉଦଳା ଡାକ୍ତରଖାନା ଆଣିଥିଲେ ହେଁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଶରତ ପୁଲିସ ଉଦଳା ଡାକ୍ତରଖାନାରେ ପହଞ୍ଚି ଶବ ବ୍ୟବଚ୍ଛେଦ କରାଇବା ସହିତ କେସ୍ ନଂ ୧୭ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଜାରି ରଖିଛି। ତେବେ ହତ୍ୟାକାଣ୍ଡର କାରଣ ଜଣାପଡ଼ିନି।