କେସିଙ୍ଗା: କଳାହାଣ୍ଡିଜିଲ୍ଲା କେସିଙ୍ଗା ଥାନା ୱାର୍ଡ ନମ୍ବର ୯ରେ ଏକ ଅଭାବନୀୟ ଘଟଣା ଘଟିଛି। ସ୍ବାମୀର ଗଳାକାଟି ହତ୍ୟା ଉଦ୍ୟମ କରିଛି ସ୍ତ୍ରୀ। ଏପଟେ ବାପାଙ୍କୁ ହତ୍ୟା କରାଯାଇଥିବା ଶୁଣି ବିଷ ପିଇ ଆତ୍ମହତ୍ୟା ଉଦ୍ୟମ କରିଛି ନାବାଳକ ପୁଅ। ଏହି ଘଟଣାରେ ବାପପୁଅ ଗୁରୁତର ଅଛନ୍ତି। ୱାର୍ଡ ନମ୍ବର ୯ରେ ରାମକୃଷ୍ଣ କୈବର୍ତ୍ତ (୪୦), ସ୍ତ୍ରୀ ସବିତା (୩୫), ପୁଅ (୧୨ ବର୍ଷ) ଓ ଝିଅ (୧୫ ବର୍ଷ) ସହ ରହନ୍ତି। ଜଣେ ସମ୍ପର୍କୀୟାଙ୍କ କହିବାନୁସାରେ, ସବିତା ଆଜି ତାଙ୍କ ସ୍ବାମୀଙ୍କୁ କବାଟ ବନ୍ଦ କରି ରଖିଥିଲେ। ଭିତରୁ ସେ କବାଟ ଖୋଲିବାକୁ କହିଥିଲେ ବି ସବିତା ରାଜି ହୋଇନଥିଲେ। 

Advertisment

ସ୍କୁଲରୁ ଫେରିବା ପରେ ତାଙ୍କ ନାବାଳକ ପୁଅ କବାଟ ଖୋଲିବାକୁ ମା’ ସବିତାଙ୍କୁ କହିଥିଲା। ଏହା ପରେ ମଧ୍ୟ ସବିତା ବନ୍ଦ କୋଠରିର କବାଟ ଖୋଲିନଥିଲେ। ବାପାଙ୍କୁ ମା’ ହତ୍ୟା କରିଥିବା ନେଇ ପୁଅ ସନ୍ଦେହ କରିଥିଲା। କେବଳ ସେତିକି ନୁହେଁ, ମୋ’ ବାପାଙ୍କୁ ଯଦି ତୁ ମାରିବୁ ମୁଁ ବି ମରିବି କହି ସେ ବିଷ ପିଇ ଦେଇଥିଲା। ପାଟିତୁଣ୍ଡ ଶୁଣି ପାଖ ପଡ଼ୋଶୀ ଜମା ହୋଇ କବାଟ ଖୋଲିଥିଲେ। ଘର ଭିତରେ ରାମକୃଷ୍ଣ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ପଡ଼ିଥିଲେ। ତାଙ୍କ ଗଳା କଟା ଯାଇଥିବା ଦେଖିବାକୁ ମିଳିଥିଲା। ଗୁରୁତର ବାପପୁଅଙ୍କୁ ଚିକିତ୍ସା ପାଇଁ ତୁରନ୍ତ କେସିଙ୍ଗା ଡାକ୍ତରଖାନାକୁ ନିଆଯାଇଥିଲା। ପରେ ଉଭୟଙ୍କୁ ଭବାନୀପାଟଣା ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ପୁଲିସ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି। ସବିତାଙ୍କୁ ଥାନାରେ ଅଟକ ରଖି ପୁଲିସ ପଚରାଉଚରା କରୁଛି। ଏଥିରେ ବ୍ୟବହୃତ ଛୁରି ଓ କିଛି କାଗଜପତ୍ର ଜବତ କରିଛି। ସେଥିରେ କିଛି ଟଙ୍କା କାରବାର ସଂକ୍ରାନ୍ତରେ ଉଲ୍ଲେଖ ରହିଛି। ଏହି ଘଟଣା ପଛରେ ପରକୀୟା ପ୍ରୀତି ରହିଥିବା ସନ୍ଦେହ କରାଯାଉଛି। ବାପାଙ୍କୁ ହିଁ ମା’ ହତ୍ୟା ଉଦ୍ୟମ କରିଥିବା ପୁଲିସ ଆଗରେ ପୁଅଝିଅ ବୟାନ ଦେଇଛନ୍ତି।