ସ୍ବାଧୀନତା ଦିବସ ଅବସରରେ ଓଡ଼ିଆ ଛାତ୍ରଛାତ୍ରୀଙ୍କ ମଧ୍ୟରେ ଜାତୀୟସ୍ତର ପ୍ରତିଯୋଗିତା
ଯୁବ ଅନୁଚିନ୍ତା ପ୍ରତିଯୋଗିତାର ଫଳାଫଳ ଘୋଷଣା
ନୂଆଦିଲ୍ଲୀ: ସ୍ବାଧୀନତା ଦିବସ ଅବସରରେ ନୂଆଦିଲ୍ଲୀସ୍ଥିତ ଓଡ଼ିଆ ବୁଦ୍ଧିଜୀବୀ ଫୋରମ୍ ‘ଦି ଇଣ୍ଟେଲେକ୍ଟସ’ ପକ୍ଷରୁ ଓଡ଼ିଆ ଛାତ୍ରଛାତ୍ରୀଙ୍କ ମଧ୍ୟରେ ଆୟୋଜିତ ‘‘ଅନୁଚିନ୍ତା: ମୋ ଦେଶ ପାଇଁ” ଶୀର୍ଷକ ପ୍ରତିଯୋଗିତା ଫଳାଫଳ ଘୋଷଣା ହୋଇଛି। ଏଥିରେ ଓଡ଼ିଆ ଭାଷାରେ ରେଭେନ୍ସା ବିଶ୍ବବିଦ୍ୟାଳୟର ଛାତ୍ରୀ ଶ୍ରୀସିକ୍ତା ଶୁଭଦର୍ଶିନୀ ନାୟକ ପ୍ରଥମ, ଉଦୟନାଥ ସ୍ଵୟଂଶାଶିତ ବିଜ୍ଞାନ ଓ ପ୍ରାଦ୍ୟୋଗିକ ମହାବିଦ୍ୟାଳୟର +୨ ଶ୍ରେଣୀର ଛାତ୍ରୀ ଅର୍ପିତା ପାତ୍ର ଦ୍ବିତୀୟ ଓ ବିପ୍ଳବୀ ବୀର ଚକ୍ରଧର ବିଦ୍ୟାପୀଠର ନବମ ଶ୍ରେଣୀ ଛାତ୍ର ଅନୁଜ କୁମାର ପଣ୍ଡା ତୃତୀୟ ସ୍ଥାନ ଅଧିକାର କରିଛନ୍ତି। ସେହିପରି ଇଂରାଜୀ ଭାଷାରେ ଗୁରୁ ଜାମ୍ବେଶ୍ବର ବିଜ୍ଞାନ ଓ ପ୍ରାଦ୍ୟୋଗିକ ବିଶ୍ବବିଦ୍ୟାଳୟ ଇସାର, ହରିୟାନାର ଅର୍ଥନୀତି ବିଭାଗର ଛାତ୍ର ନିତୀଶ ଶୁଭଙ୍କର, କାର୍ମେଲ ଇଂରାଜୀ ମିଡିୟମ ସ୍କୁଲ, ଜଟଣୀର ନବମ ଶ୍ରେଣୀ ଛାତ୍ରୀ ସୂର୍ଯ୍ୟସ୍ନାତା ଲେଙ୍କା ଓ ସ୍ବାମୀ ବିବେକାନନ୍ଦ ସ୍ମାରକୀ ସ୍ବୟଂଶାସିତ ମହାବିଦ୍ୟାଳୟ, ଜଗତସିଂହପୁରର କଳା ସମ୍ମାନର ଛାତ୍ରୀ ପଲ୍ଲବୀ ପଣ୍ଡା ଯଥାକ୍ରମେ ପ୍ରଥମ, ଦ୍ବିତୀୟ ଓ ତୃତୀୟ ସ୍ଥାନ ଅଧିକାର କରିଛନ୍ତି। କୃତୀ ଛାତ୍ରଛାତ୍ରୀଙ୍କୁ ପୁରସ୍କୃତ କରାଯିବ ବୋଲି ଅନୁଷ୍ଠାନ ପକ୍ଷରୁ କୁହାଯାଇଛି।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ, ଦେଶର ବିଭିନ୍ନ ସ୍ଥାନରେ ରହୁଥିବା ଛାତ୍ରଛାତ୍ରୀଙ୍କୁ ନେଇ ଉଭୟ ଓଡ଼ିଆ ଓ ଇଂରାଜୀ ଭାଷାରେ ଏହି କ୍ଷୁଦ୍ର ପ୍ରବନ୍ଧ ପ୍ରତିଯୋଗିତା ଆୟୋଜିତ ହୋଇଥିଲା। ଏଥିରେ ୧୦ରୁ ୨୨ବର୍ଷର ଶତାଧିକ ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ। ସ୍ବାଧୀନତାର ମୂଲ୍ୟବୋଧ ଓ ଗୁରୁତ୍ବକୁ ନେଇ ଯୁବ ସମାଜକୁ ଅଧିକ ଚିନ୍ତାଶୀଳ କରାଇବାର ଉଦ୍ଦେଶ୍ୟରେ ଏହି ପ୍ରତିଯୋଗିତାର ଆୟୋଜନ କରାଯାଇଥିଲା ବୋଲି ଦି ଇଣ୍ଟେଲେକ୍ଟସର ଅଧ୍ୟକ୍ଷ ଶିକ୍ଷାବିତ୍ ଦେବେନ୍ଦ୍ର ନାଥ ରାଉତ କହିଛନ୍ତି। ସେ ସମସ୍ତ ପ୍ରତିଯୋଗୀଙ୍କୁ ଧନ୍ୟବାଦ ଜଣାଇଛନ୍ତି।