ଦିଲ୍ଲୀରେ ଓଡ଼ିଶା ସାଂସ୍କୃତିକ କେନ୍ଦ୍ର ଓ ଲାଇବ୍ରେରି ପ୍ରତିଷ୍ଠା ପାଇଁ ଜମି ମାଗିଲେ, କେନ୍ଦ୍ର ଗୃହ ଓ ନଗର ଉନ୍ନୟନ ମନ୍ତ୍ରୀଙ୍କୁ ମୁଖ୍ୟମନ୍ତ୍ରୀଙ୍କ ଚିଠି
Ministry of
ଭୁବନେଶ୍ବର : ତାମିଲନାଡ଼ୁ, କର୍ଣ୍ଣାଟକ ଓ ଆନ୍ଧ୍ରପ୍ରଦେଶ ପରି ଦିଲ୍ଲୀରେ ଓଡ଼ିଶା ସାଂସ୍କୃତିକ କେନ୍ଦ୍ର ଓ ଲାଇବ୍ରେରି ପ୍ରତିଷ୍ଠା ପାଇଁ ଜମି ଯୋଗାଇ ଦିଆଯାଉ। ଫଳରେ ଓଡ଼ିଶାର ସମୃଦ୍ଧ ଐତିହ୍ୟ ଓ ସଂସ୍କୃତି ବିଷୟରେ ଅଧିକ ଲୋକ ଜାଣିପାରିବେ। ଆଜି ଏ ନେଇ କେନ୍ଦ୍ର ଗୃହ ଓ ନଗର ଉନ୍ନୟନ ରାଷ୍ଟ୍ରମନ୍ତ୍ରୀ ହରଦୀପ ସିଂହ ପୁରୀଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଚିଠି ଲେଖିଛନ୍ତି।
Sambad is now on WhatsApp
Join and get latest news updates delivered to you via WhatsApp
ମୁଖ୍ୟମନ୍ତ୍ରୀ ଦର୍ଶାଇଛନ୍ତି, ଦିଲ୍ଲୀରେ ଓଡ଼ିଶା ସାଂସ୍କୃତିକ କେନ୍ଦ୍ର ଖୋଲିବାକୁ ତାଙ୍କ ସରକାର ବିଭିନ୍ନ ସ୍ତରରେ ଆଲୋଚନା କରିଛନ୍ତି। ଏବେ ଖୋଦ୍ କେନ୍ଦ୍ର ଗୃହ ଓ ନଗର ଉନ୍ନୟନ ମନ୍ତ୍ରୀ ଭାବେ ଶ୍ରୀ ପୁରୀ ପ୍ରତ୍ୟେକ୍ଷ ହସ୍ତକ୍ଷେପ କଲେ ଦିଲ୍ଲୀରେ ବସବାସ କରୁଥିବା ଓଡ଼ିଆ ଲୋକଙ୍କ ବହୁ ଦିନର ଆଶା ପୂରଣ ହୋଇପାରିବ। ଓଡ଼ିଶାର ସମୃଦ୍ଧ ଐତିହ୍ୟ, କ୍ରୀୟାଶୀଳ ସଂସ୍କୃତି, ବହୁବିଧ ଜନଜାତି ସମ୍ପ୍ରଦାୟ ଓ ଗ୍ରାମୀଣ କୃଷି ଜୀବନ ଦେଶ ବିଦେଶର ବହୁ ପର୍ଯ୍ୟଟକଙ୍କୁ ଆକୃଷ୍ଟ କରିଆସିଛି। ଓଡ଼ିଆ ସଂସ୍କୃତିର ମୌଳିକତା ପ୍ରକୃତି ସହିତ ଜଡ଼ିତ। ଏ ମାଟିର କୃଷକ ତାର ମାଟି ମା’କୁ ଭଗବାନଙ୍କ ଭଳି ଭକ୍ତି କରିଥାଏ। ପଶ୍ଚିମ ହେଉ କି ଉପକୂଳ ଅଞ୍ଚଳ, ଦକ୍ଷିଣାଞ୍ଚଳ ହେଉ କି ଉତ୍ତରାଞ୍ଚଳ ଓଡ଼ିଶାର ପ୍ରତ୍ୟେକଟି ସ୍ଥାନର ସ୍ବତନ୍ତ୍ର ସାଂସ୍କୃତିକ ପରିଚୟ ରହିଛି। ଦେଶର ସମୃଦ୍ଧ ଐତିହ୍ୟ ଓ ସାଂସ୍କୃତିକ ବିବିଧତା ଭିତରେ ଓଡ଼ିଶାର ଅବଦାନ ଅତୁଳନୀୟ। ଓଡ଼ିଶୀ ନୃତ୍ୟ ବିଶ୍ବ ଦରବାରରେ ପରିଚୟ ସୃଷ୍ଟି କରିପାରିଛି। ଓଡ଼ିଆ ଭାଷା ଦେଶର ଷଷ୍ଠ ଶାସ୍ତ୍ରୀୟ ଭାଷା ଭାବେ ମାନ୍ୟତା ପାଇଛି। ଓଡ଼ିଆ ରୋଷେଇ, ବସ୍ତ୍ର, ହସ୍ତତନ୍ତ, ସମୃଦ୍ଧ ଆଦିବାସୀ କଳା ଓ ସଂସ୍କୃତି ବହୁ ଲୋକଙ୍କୁ ଆକୃଷ୍ଟ କରିଛି।
ଏସବୁ ଥାଇ ବି ରାଜ୍ୟବାସୀଙ୍କ ପାଇଁ ଦିଲ୍ଲୀରେ ସ୍ଥାୟୀ ଭାବେ ଗୋଟିଏ ଘର କିମ୍ବା ଜମି ନାହିଁ। ଯେଉଁଠି କି ଏସବୁ କଳାଦକ୍ଷତା ଓ କାରିଗରୀ କୌଶଳର ପ୍ରଦର୍ଶନ କରିହେବ। ଏହାଛଡ଼ା ଦିଲ୍ଲୀରେ ପ୍ରବାସୀ ଓଡ଼ିଆଙ୍କ ସଂଖ୍ୟା ବି କିଛି କମ୍ ନୁହଁ। ଓଡ଼ିଆ ସଂସ୍କୃତି ଓ କଳାର ପ୍ରଚାର ପ୍ରସାର ପାଇଁ ପ୍ରବାସୀ ଓଡ଼ିଆ ବେଶୀ ଆଗ୍ରହ ରଖିଛନ୍ତି। ସ୍ଥାୟୀ ସାଂସ୍କୃତିକ କେନ୍ଦ୍ର ପ୍ରତିଷ୍ଠା ହେଲେ ଘରୋଇ ଓ ବିଦେଶୀ ପର୍ଯ୍ୟଟକ ଅଧିକ ଆକୃଷ୍ଟ ହେବା ସହ ଏସବୁ କଳା କାରିଗରୀ ଉପରେ ନିର୍ଭର କରୁଥିବା ବ୍ୟକ୍ତିବିଶେଷଙ୍କ ପାଇଁ ରୋଜଗାରର ବାଟ ଫିଟିବ। ତାମିଲନାଡ଼ୁ, କର୍ଣ୍ଣାଟକ ଓ ଆନ୍ଧ୍ରପ୍ରଦେଶ ସରକାରଙ୍କର ଦିଲ୍ଲୀରେ ଭବନ ଥାଇ ବି ଯେପରି ସେମାନଙ୍କ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ ପାଇଁ ଜମି ଯୋଗାଇ ଦିଆଯାଇଛି। ସେହିପରି ଓଡ଼ିଶା ପାଇଁ କେନ୍ଦ୍ର ସରକାର ଦିଲ୍ଲୀରେ ଜମି ଯୋଗାଇ ଦେବାକୁ ମୁଖ୍ୟମନ୍ତ୍ରୀ ଚିଠିରେ ଅନୁରୋଧ କରିଛନ୍ତି।