ଭୁବନେଶ୍ବର: ବିରୋଧୀଦଳ ନେତା ନବୀନ ପଟ୍ଟନାୟକ ସୁସ୍ଥ ହୋଇ ମୁମ୍ବାଇରୁ ଓଡ଼ିଶା ଫେରିଛନ୍ତି। ଅପରାହ୍‌ଣ ୨ଟା ୧୫ ମିନିଟ୍‌ରେ ଭୁବନେଶ୍ୱର ବିମାନବନ୍ଦରରେ ପହଞ୍ଚିବା ପରେ ସମର୍ଥକମାନେ ତାଙ୍କୁ ଭବ୍ୟ ସ୍ବାଗତ କରିଥିଲେ। ବିମାନବନ୍ଦରରୁ ନବୀନ ନିବାସ ଯାଏଁ ହଜାର ହଜାର ସଂଖ୍ୟାରେ ଦଳୀୟ କର୍ମୀ, ନେତା, ବିଧାୟକ, ସାଂସଦମାନେ ରାସ୍ତାର ଦୁଇପାର୍ଶ୍ବରେ ରହି ତାଙ୍କୁ ସ୍ବାଗତ କରିଛନ୍ତି। ଗତ ଜୁନ୍ ୨୦ ତାରିଖରେ ଚିକିତ୍ସା ପାଇଁ ନବୀନ ମୁମ୍ବାଇ ଯାଇଥିଲେ। ସର୍ଭିକାଲ ଆର୍ଥ୍ରାଇଟିସ୍‌ ସମସ୍ୟା ନେଇ ମୁମ୍ବାଇର କୋକିଳାବେନ୍‌ ଧୀରୁଭାଇ ଅମ୍ବାନୀ ହସ୍‌ପିଟାଲ୍‌ରେ ଜୁନ୍  ୨୨ ତାରିଖରେ ନବୀନଙ୍କର ଅସ୍ତ୍ରୋପଚାର ହୋଇଥିଲା।

Advertisment

ନବୀନଙ୍କ ବ୍ୟକ୍ତିଗତ ଡାକ୍ତର ରମାକାନ୍ତ ପଣ୍ଡାଙ୍କ ତତ୍ତ୍ବାବଧାନରେ ଏହି ଚିକିତ୍ସା ସଫଳ ହେବା ପରେ ଜୁଲାଇ ୭ ତାରିଖରେ ସେ ହସ୍ପିଟାଲରୁ ଡିସ୍‌ଚାର୍ଜ ହୋଇଥିଲେ। କିଛିଦିନ ଡାକ୍ତରଙ୍କ ନିରୀକ୍ଷଣ ପାଇଁ ତାଙ୍କୁ ମୁମ୍ବାଇରେ ରହିବାକୁ ପଡ଼ିଥିଲା। ଦଳର ସାଂଗଠନିକ କାର୍ଯ୍ୟକର୍ତ୍ତାମାନେ ନୀବନଙ୍କୁ ମୁମ୍ବାଇରେ ଭେଟିଥିଲେ।ଗତକାଲି ନବୀନ ଫେରିବା ଖବର ପାଇ ଆଜି ସକାଳ ୧୧ଟାରୁ ଭୁବନେଶ୍ବର ବିମାନବନ୍ଦରରେ ଦଳୀୟ କର୍ମୀଙ୍କ ଭିଡ଼ ଜମିଥିଲା। ବିମାନବନ୍ଦରରୁ ନବୀନନିବାସ ଲୋକାରଣ୍ୟ ହୋଇଯାଇଥିଲା। ଦିନ ପ୍ରାୟ ସାଢ଼େ ୧୨ଟାରେ ନବୀନ ପହଞ୍ଚିବାର ଥିଲା। କିନ୍ତୁ କୌଣସି କାରଣରୁ ନିର୍ଦ୍ଧାରିତ ସମୟଠାରୁ ପ୍ରାୟ ୨ ଘଣ୍ଟା ବିଳମ୍ବରେ ସେ ପହଞ୍ଚିଥିଲେ। ନବୀନ ପହଞ୍ଚିବା ପରେ ଦଳର ମହିଳା ନେତ୍ରୀମାନେ ବନ୍ଦାପନା କରିବା ସହ ପୁଷ୍ପବୃଷ୍ଟି କରିଥିଲେ। ସ୍ବାସ୍ଥ୍ୟଗତ କାରଣରୁ ନବୀନ ଗାଡ଼ିରୁ ବାହାରିନଥିଲେ କିମ୍ବା ଗଣମାଧ୍ୟମକୁ ପ୍ରତିକ୍ରିୟା ଦେଇ ନଥିଲେ।