ଭୁବନେଶ୍ବର: ବିରୋଧୀ ଦଳ ନେତା ନବୀନ ପଟ୍ଟନାୟକ ଚିକିତ୍ସା ପାଇଁ ମୁମ୍ବାଇ ଯିବେ। ନିଜେ ଶ୍ରୀ ପଟ୍ଟନାୟକ ତାଙ୍କ ଏକ୍ସ ହ୍ୟାଣ୍ଡେଲ୍‌ରେ ଏହି ସୂଚନା ଦେଇଛନ୍ତି। ବିରୋଧୀ ଦଳ ନେତା ଦର୍ଶାଇଛନ୍ତି, ‘ସ୍ବାସ୍ଥ୍ୟ ବି‌ଶେଷଜ୍ଞଙ୍କ ପରାମର୍ଶ ଅନୁଯାୟୀ ୨୨ ତାରିଖରେ ମୁମ୍ବାଇର କୋକିଲାବେନ ଧୀରୁଭାଇ ଅମ୍ବା‌ନୀ ହସ୍ପିଟାଲରେ ମୁଁ ସର୍ଭିକାଲ୍‌ ଆର୍ଥ୍ରାଇଟିସ୍‌ ପାଇଁ ଚିକିତ୍ସା ପ୍ରକ୍ରିୟାରେ ରହିବି। ମୋର ବ୍ୟକ୍ତିଗତ ଚିକିତ୍ସକ ଡାକ୍ତର ରମାକାନ୍ତ ପଣ୍ଡା ଚିକିତ୍ସା ପାଇଁ ସମସ୍ତ ବ୍ୟବସ୍ଥା କରୁଛନ୍ତି। ମହାପ୍ରଭୁ ଶ୍ରୀଜଗନ୍ନାଥଙ୍କ ଆଶୀର୍ବାଦ ଏବଂ ଓଡ଼ିଶାବାସୀଙ୍କ ଶୁଭେଚ୍ଛା ସହ ମୁଁ ଖୁବ୍‌ଶୀଘ୍ର ସୁସ୍ଥ ହୋଇ ଲୋକଙ୍କ ସେବା କରିବାକୁ ଫେରି ଆସିବି।’ 

Advertisment

ନବୀନଙ୍କ ଅନୁପସ୍ଥିତିରେ ଦଳ କିପରି ପରିଚାଳନା ହେବ, ସେଥି ପାଇଁ ମଧ୍ୟ ଆବଶ୍ୟକ ବନ୍ଦୋବସ୍ତ କରାଯାଇଛି। ନିଜେ ନବୀନ ଏ ନେଇ ଏକ ନିର୍ଦ୍ଦେଶନାମା ଜାରି କରିଛନ୍ତି। ଏହି ନିର୍ଦ୍ଦେଶନାମା ଅନୁଯାୟୀ ସଭାପତିଙ୍କ ଅନୁପସ୍ଥିତିରେ ରାଜନୈତିକ ବ୍ୟାପାର କମିଟି  ଦଳର ଦୈନନ୍ଦିନ ବ୍ୟାପାର ବୁଝିବ। ବରିଷ୍ଠ ଉପସଭାପତି(ମୁଖ୍ୟାଳୟ) ଦେବୀ ପ୍ରସାଦ ମିଶ୍ର ଦଳର ବିଭିନ୍ନ ଶାଖାର କାର୍ଯ୍ୟକ୍ରମ ମଧ୍ୟରେ ସମନ୍ବୟ ରକ୍ଷା କରିବେ। ନବୀନ କେତେ ଦିନ ପାଇଁ ମୁମ୍ବାଇରେ ରହିବେ, ତାହା ସ୍ପଷ୍ଟ ହୋଇ ନାହିଁ। କିନ୍ତୁ ଆଜିର ନବୀନଙ୍କ ଘୋଷଣା ରାଜନୈତିକ ମହଲକୁ ଚର୍ଚ୍ଚାର ଖୋରାକ ଯୋଗାଇଛି। ନବୀନ ପୂର୍ବରୁ ଏକାଧିକ ଥର ସ୍ବାସ୍ଥ୍ୟଗତ କାରଣରେ ବାହାରକୁ ଯାଇଥିଲେ ବି କେବେ ନିଜଆଡ଼ୁ ଘୋଷଣା କରି ନଥିଲେ। ପ୍ରଥମ ଥର ପାଇଁ ସେ ଚିକିତ୍ସା ପାଇଁ ଯାଉଥିବା କଥା କହିଛନ୍ତି। ଆଉ ଏକ ଗୁରୁତ୍ବପୂର୍ଣ୍ଣ ପ୍ରସଙ୍ଗ ହେଲା ଯେ ପ୍ରଥମ ଥର ପାଇଁ ଓଡ଼ିଶା ବାହାରକୁ ଗଲା ବେଳେ ନବୀନ ଦଳର ପରିଚାଳନା ସଂକ୍ରାନ୍ତ ଦାୟିତ୍ବ ବାଣ୍ଟିଛନ୍ତି। ତେଣୁ ସେ ଲମ୍ବା ସମୟ ପାଇଁ ମୁମ୍ବାଇରେ ରହିପାରନ୍ତି ବୋଲି ଅନୁମାନ କରାଯାଉଛି। ଦେବୀ ମିଶ୍ରଙ୍କ ଉପରେ ନବୀନ ଭରସା କରି ସମନ୍ବୟ ଦାୟିତ୍ବ ଦେଇଥିବା ଘଟଣା ଦଳ ଭିତରେ ବି ଚର୍ଚ୍ଚାର ବିଷୟ ହୋଇଛି। କାରଣ ନିର୍ବାଚନ ପରାଜୟ ପରେ ଦଳର ବହୁ କାର୍ଯ୍ୟକ୍ରମକୁ ଶ୍ରୀ ମିଶ୍ର ସଂଯୋଜନା କରୁଥିଲେ। କିନ୍ତୁ ଆଶ୍ଚର୍ଯ୍ୟଜନକ ଭାବେ ରାଜନୈତିକ ବ୍ୟାପାର କମିଟିରେ ତାଙ୍କୁ ସ୍ଥାନ ମିଳି ନଥିଲା। ବରଂ ତାଙ୍କୁ ମୁଖ୍ୟାଳୟ ଦାୟିତ୍ବ ଦିଆଯାଇଥିଲା। ଏହାକୁ ନେଇ ଦେବୀ ଅସନ୍ତୁଷ୍ଟ ଥିବା କୁହାଯାଉଥିଲା। ଏବେ ନବୀନ ନିଜ ଅନୁପସ୍ଥିତିରେ ଦେବୀଙ୍କୁ ଦଳ ଭିତରେ ସମନ୍ବୟ ଦାୟିତ୍ବ ଦେବା ପରେ ପ୍ରସଙ୍ଗଟି ଭିନ୍ନ ମୋଡ଼ ନେଇଛି।  ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସମେତ ବହୁ ରାଜନେତା ନବୀନଙ୍କ ଆଶୁ ଆରୋଗ୍ୟ କାମନା କରିଛନ୍ତି।