ଗଞ୍ଜାମରେ ନୂଆ ସଂକଟ: ସଙ୍ଗରୋଧରେ ଗଲାଣି ୧୧ ପ୍ରବାସୀଙ୍କ ଜୀବନ, ଦୁଃଖ ଶୁଣିବାକୁ କେହି ନାହାନ୍ତି
ବ୍ରହ୍ମପୁର: କରୋନା ଏବଂ ଲକ୍ଡାଉନ୍ କଟକଣା ଯୋଗୁଁ ଗଞ୍ଜାମ ଜିଲ୍ଲାରେ ଦାଦନ ଫେରନ୍ତା ଶ୍ରମିକଙ୍କ ଦୁଃଖ ଦ୍ବିଗୁଣିତ ହୋଇଯାଇଛି। ଜୀବନଜୀବିକା ହରାଇ ସୁରକ୍ଷିତ ଭାବେ ନିଜ ଭିଟାମାଟିକୁ ଫେରିଛନ୍ତି ଜିଲ୍ଲାର ପ୍ରାୟ ୨ ଲକ୍ଷ ପ୍ରବାସୀ। ହେଲେ କେତୋଟି ଘଟଣାରେ ଅସୁସ୍ଥତାର ନିଦାନ କରା ନଯିବା ଏବଂ ସମୟୋଚିତ ଚିକିତ୍ସା ଅଭାବରୁ କିଏ ଆନୁଷଙ୍ଗିକ ସଙ୍ଗରୋଧ କେନ୍ଦ୍ରର ଚାରି କାନ୍ଥ ଭିତରେ ପ୍ରାଣ ହରାଇଛି ତ ଆଉ କାହାର ଜୀବନ ଘରୋଇ ସଙ୍ଗରୋଧରେ ଥିବା ସମୟରେ ଅକାଳରେ ଝଡ଼ି ପଡ଼ିଛି। ଗଞ୍ଜାମ ଜିଲ୍ଲାରେ ଆଜି ସୁଦ୍ଧା ସଙ୍ଗରୋଧ କେନ୍ଦ୍ରରେ ରହି ଏବଂ ସଙ୍ଗରୋଧ କେନ୍ଦ୍ରରୁ ଫେରିବା ପରେ ଘରୋଇ ସଙ୍ଗରୋଧରେ ଥିବା ସମୟରେ ବିଭିନ୍ନ କାରଣରୁ ୧୧ ଜଣଙ୍କ ମୃତ୍ୟୁ ଘଟିଲାଣି। ଏହି ସମସ୍ୟା ଏକ ସଙ୍କଟଜନକ ସ୍ଥିତି ସୃଷ୍ଟି କରିଛି। ପ୍ରବାସୀଙ୍କ ମୃତ୍ୟୁ ପରେ ବେସାହାରା ପାଲଟି ଯାଇଥିବା ପରିବାରର ଦୁଃଖ ଶୁଣିବାକୁ ପ୍ରଶାସନ କି ସରକାର କେହି ନାହାନ୍ତି। ସରକାରୀ ସହାୟତା ବି କିଛି ନାହିଁ। ଶେରଗଡ ବ୍ଲକ ନରେନ୍ଦ୍ର ପୁର କୁମ୍ଭାର ସାହିର ଭୀମସେନ ବେହେରା ସଙ୍ଗରୋଧ କେନ୍ଦ୍ରରୁ ଫେରି ଘରୋଇ ସଙ୍ଗରୋଧ ରହିଥିଲେ। ତାଙ୍କର ସ୍ବାବ୍ ନମୁନା ନେଗେଟିଭ୍ ଆସିଥିଲା। ଗତ ୫ଦିନ ତଳେ ହଠାତ୍ ଅସୁସ୍ଥ ହୋଇ ପଡ଼ିବାରୁ ଶୀତଳାପଲ୍ଲୀ କୋଭିଡ଼୍ -୧୯ ହସ୍ପିଟାଲକୁ ଅଣାଯାଇଥିଲା। ଗତକାଲି ତାଙ୍କର ମୃତ୍ୟୁ ଘଟିଛି। ଗଞ୍ଜାମ ଜିଲ୍ଲାର କେବଳ ଭୀମସେନ ନୁହନ୍ତି, ଗତ ମେ ମାସଠାରୁ ଇତି ମଧ୍ୟରେ ଆହୁରି ୧୦ଜଣଙ୍କ ଜୀବନ ଅକାଳରେ ଚାଲିଗଲାଣି।
Sambad is now on WhatsApp
Join and get latest news updates delivered to you via WhatsApp
ଗତ ମେ ମାସ ୮ ତାରିଖରେ ସଙ୍ଗରୋଧ କେନ୍ଦ୍ରରେ ଥାଇ ପୋଲସରା ବ୍ଲକ୍ ମଧୁପଲ୍ଲୀ ଗ୍ରାମର ପ୍ରଫୁଲ୍ଲ ବେହେରାଙ୍କ ମୃତ୍ୟୁ ହୋଇଥିଲା। ପୋଲସରା ବ୍ଲକ ଢୁଙ୍କାପଡ଼ା ସଙ୍ଗରୋଧ କେନ୍ଦ୍ରରେ ଅସୁସ୍ଥ ହୋଇ ତାଙ୍କର ମୃତ୍ୟୁ ଘଟିଥିଲା। ଉପଯୁକ୍ତ ଚିକିତ୍ସା ଅବହେଳାରୁ ପ୍ରଫୁଲ୍ଲଙ୍କ ମୃତ୍ୟୁ ଘଟିଥିବା ତାଙ୍କ ପରିବାର ଅଭିଯୋଗ କରିଥିଲେ। ଏହି ମାମଲା ଏବେ ଏନ୍ଏଚ୍ଆରସିରେ ବିଚାରଧୀନ। ସଙ୍ଗରୋଧ କେନ୍ଦ୍ରରେ ପ୍ରବାସୀଙ୍କ ମୃତ୍ୟୁ ହେବା ଏହା ରାଜ୍ୟରେ ପ୍ରଥମ ଘଟଣା ଥିଲା। ମେ ୧୬ ତାରିଖରେ ଜଗନ୍ନାଥପ୍ରସାଦ ବ୍ଲକ୍ ହରିପୁର ଗ୍ରାମର ସୁରତ ଫେରନ୍ତା ପୂର୍ଣ୍ଣଚନ୍ଦ୍ର ଗୌଡ଼ଙ୍କ ମୃତ୍ୟୁ ହୋଇଥିଲା। ସେ ଘରୋଇ ସଙ୍ଗରୋଧରେ ଥିଲେ। ଅସୁସ୍ଥ ହେବାରୁ କୋଭିଡ଼୍-୧୯ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। କିନ୍ତୁ ତାଙ୍କର ରିପୋର୍ଟ ନେଗେଟିଭ୍ ଆସିଥିଲା। ମେ ୧୭ରେ ଧରାକୋଟ ବ୍ଲକ୍ ଅଧୀନ ଝରପାରି ପଞ୍ଚାୟତର ମହୁଲପଲ୍ଲୀ ପ୍ରାଥମିକ ବିଦ୍ୟାଳୟ ସଙ୍ଗରୋଧ କେନ୍ଦ୍ରରେ ଥିବା ସୁରତ ଫେରନ୍ତା ଜାନିବିଲି ଗ୍ରାମର ନାରଶୁ ଗୌଡ଼ (୩୫) ଅସୁସ୍ଥତା ଯୋଗୁଁ ପ୍ରାଣ ହରାଇଥିଲେ। ମେ’ ୨୦ରେ କବିସୂର୍ଯ୍ୟନଗର ବ୍ଲକ୍ ଜରଡ଼ ପଞ୍ଚାୟତ ମୋହନାପଲ୍ଲୀ ସଙ୍ଗରୋଧ କେନ୍ଦ୍ରରେ ରହୁଥିବା ଉଲା ଡାକୁଆ (୮୫) ନାମକ ଜଣେ ବୃଦ୍ଧ ଅସୁସ୍ଥ ହୋଇଥିଲେ। ତାଙ୍କୁ ଉପଯୁକ୍ତ ଚିକିତ୍ସା କରାଯାଇ ନ ଥିବା ତାଙ୍କ ପୁ୍ଅ ଅଭିଯୋଗ କରିଥିଲେ। ତାଙ୍କ ସ୍ଥିତି ଗୁରତର ହେବାରୁ ଶୀତଳାପଲ୍ଲୀସ୍ଥିତ କୋଭିଡ୍ ହସ୍ପିଟାଲ୍କୁ ସ୍ଥାନାନ୍ତର କରା ଯାଇଥିଲା। ସେଠାରେ ତାଙ୍କର ମୃତ୍ୟୁ ହୋଇଥିଲା।
ସେହିପରି ୮ତାରିଖରେ ଗଞ୍ଜାମ ଜିଲ୍ଲା ଖଲ୍ଲିକୋଟ ବ୍ଲକ ବଧିନୂଆପଲ୍ଲୀ ପଞ୍ଚାୟତର କେନ୍ଦୁବାଡ଼ି ଗ୍ରାମର ସଞ୍ଜୟ ଭୂୟାଁ(୩୫) ନାମକ ଯୁବକଙ୍କର ଖଲ୍ଲିକୋଟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ମୃତ୍ୟୁ ଘଟିଥିଲା। ମଧୁସୂଦନ ଜେନାଙ୍କ ପୁଅ ସଞ୍ଜୟ ସୁରତରୁ ଫେରି ତୁଳସୀପର ପଞ୍ଚାୟତ କମଳାପଦର ସଙ୍ଗରୋଧ ଗୃହରେ ୧୪ଦିନିଆ ସଙ୍ଗରୋଧ ବିତାଇ ଘରକୁ ଫେରିଥିଲେ। ଏହାପରେ ଗତ ୧୦ ତାରିଖରେ ଦୁଇ ସୁରତ ଫେରନ୍ତା ପ୍ରବାସୀ ଓଡ଼ିଆଙ୍କ ମୃତ୍ୟୁ ହୋଇଥିଲା। ଧରାକୋଟ ବ୍ଲକ୍ ବରଡ଼ବାଲି ସଙ୍ଗରୋଧ କେନ୍ଦ୍ରରେ ରାତି ୯ଟାରେ ଶିବରାମ ପ୍ରଧାନ (୫୫) ନାମକ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥିଲା। ସେହିପରି ସାନଖେମୁଣ୍ଡି ବ୍ଲକ୍ ଆଡ଼ପଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ସଙ୍ଗରୋଧ କେନ୍ଦ୍ର ଫେରନ୍ତା କଉଡ଼ିଆ ପଞ୍ଚାୟତ ବଉଳଘାଇ ଗ୍ରାମର ସୁଦୁରୁ ମଲ୍ଲିକ (୪୭)ଙ୍କ ମୃତ୍ୟୁ ଘଟିଥିଲା। ସେ ସୁରତରୁ ଫେରି କଙ୍କୋରଡ଼ା ପଞ୍ଚାୟତର କରାଖଣ୍ଡି ପ୍ରାଥମିକ ବିଦ୍ୟାଳୟ ସରକାରୀ ସଙ୍ଗରୋଧ କେନ୍ଦ୍ରରେ ୧୪ ଦିନ ବିତାଇବା ପରେ ଘରେ ୭ଦିନିଆ ହୋମ୍ କ୍ବାରାଣ୍ଟିନ୍ ଅବଧି ମଧ୍ୟ ଶେଷ କରିଥିଲେ। ଅନ୍ୟପକ୍ଷରେ ଗତ ୧୨ ତାରିଖରେ ଗଞ୍ଜାମ ଜିଲ୍ଲାରେ ୩ ଜଣ ସଙ୍ଗରୋଧ କେନ୍ଦ୍ର ଫେରନ୍ତାଙ୍କ ଘରେ ଥିବା ସମୟରେ ମୃତ୍ୟୁ ଘଟିଥିଲା। ମୃତକ ମାନେ ବେଲଗୁଣ୍ଠା ବ୍ଲକ୍ ସାନସାଦରା ଗ୍ରାମର ସନ୍ତୋଷ ବରାଡ଼ (୫୨) ଓ ବୁଗୁଡ଼ା ବ୍ଲକ୍ ବଣପଲ୍ଲୀ ଗ୍ରାମର ପ୍ରଭାକର ଗୌଡ଼ (୪୦)। ଅନ୍ୟ ଜଣେ ହେଲେ ପୁରୁଷୋତ୍ତମପୁର ବ୍ଲକ ଦେଉଳିପଲ୍ଲୀ ଗାଁର। ଏମାନେ ସମସ୍ତେ ସୁରତରୁ ଫେରି ସଙ୍ଗରୋଧ କେନ୍ଦ୍ରରେ ରହି ଘରକୁ ଫେରିଥିଲେ।