ଭୁବନେଶ୍ୱର : ମେଳାଣି ନେଇଛି ୨୦୧୮, ଆସିଛି ବର୍ଷ ୨୦୧୯ । ବିଦାୟ ଓ ଆଗମନ ମଧ୍ୟରେ ବ୍ୟବଧାନର ଅନ୍ତ ଘଟିଛି । ସ୍ମୃତି ଛାଡିଯାଇଛି ୨୦୧୮, ଆଉ ନୂଆ ଆଶା ଓ ସମ୍ଭାବନା ନେଇ ଆସିଛି ୨୦୧୯ । ଭାରତରେ ପାଦ ଦେଇଛି ନୂଆବର୍ଷ ୨୦୧୯ । ଆଉ ନୂଆବର୍ଷକୁ ଦମଦାର ଷ୍ଟାଇଲରେ ସ୍ୱାଗତ କରିଛନ୍ତି ଦେଶବାସୀ । ପୂରା ଦେଶରେ ଉତ୍ସବର ମାହୋଲ ଖେଳିଯାଇଛି । ଚାରିଆଡେ ନାଚଗୀତରେ ମସଗୁଲ ହୋଇଯାଇଛନ୍ତି ଲୋକେ । ଆତଶବାଜିର ରଙ୍ଗୀନ ଆଲୁଅରେ ଆଲୋକିତ ହୋଇ ପଡିଛି ନୀଳ ଆକାଶ ।
Sambad is now on WhatsApp
Join and get latest news updates delivered to you via WhatsApp
୨୦୧୮କୁ ବିଦାୟ ଦେବା ଯେତିକି କଷ୍ଟକର ଥିଲା ତାହା ଠାରୁ ଅଧିକ ଖୁସି ୨୦୧୯ ଆଣିବ ବୋଲି ସମସ୍ତେ ଆଶା ବାନ୍ଧିଛନ୍ତି । ଆଉ ଏହି ନୂଆବର୍ଷକୁ ନାଚଗୀତ ସହ ସେଲିବ୍ରେସନ କରିବା ସହ ସ୍ୱାଗତ କରିଛନ୍ତି ଲୋକେ । କେବଳ ଭାରତ ନୁହେଁ ପୂରା ବିଶ୍ୱରେ ଭିନ୍ନ ଭିନ୍ନ ଅନ୍ଦାଜରେ ନୂଆ ବର୍ଷକୁ ସ୍ୱାଗତ କରାଯାଇଛି ।
ଭାରତ ସହ ନ୍ୟୁଜିଲାଣ୍ଡରେ ମଧ୍ୟ ଧୂମଧାମରେ ପାଳନ ହୋଇଛି ନୂଆବର୍ଷ । ନ୍ୟୁଜିଲାଣ୍ଡର ଅକଲାଣ୍ଡ ସହରରେ ବେଶ ଧୁମ୍ଧାମ୍ରେ ବର୍ଷ ୨୦୧୯କୁ ସ୍ୱାଗତ କରାଯାଇଛି । ନୂଆବର୍ଷର ଆଗମନ ସହ ଅକଲାଣ୍ଡ ସହରରେ ଥିବା ସ୍କାଏ ଟାୱାର ରଙ୍ଗୀନ ଆଲୋକମାଳାରେ ଝଲସି ଉଠିଛି । ଆଉ ସେଠି ଉପସ୍ଥିତ ଥିବା ହଜାର ହଜାର ଲୋକ ପରସ୍ପରକୁ ନୂଆବର୍ଷର ଶୁଭେଚ୍ଛା ଜଣାଇଛନ୍ତି । ସ୍ଥାନୀୟ ସମୟ ଠିକ୍ ରାତି ୧୨ଟାକୁ ଅପେକ୍ଷା କରି ଚାହିଁ ରଥିଲେ ସମସ୍ତେ । ସ୍କାଏ ଟାୱାର ନିକଟରେ ସମୟ ଅବଗଣନା କରୁଥିଲେ ହଜାର ହଜାର ଲୋକ । ଆଉ ଯେତେବେଳେ ରାତି ୧୨ଟା ହେଲା ଆତସବାଜୀ ଓ ଆଲୋକମାଳାରେ ଝଲସି ଉଠିଥିଲା ପୁରା ସହର । ସ୍କାଏ ଟାୱାର ସମେତ ନିକଟରେ ଥିବା ବ୍ରିଜ୍ ଏବଂ ବଡ ବଡ ବିଲ୍ଡିଂରୁ ଚିତ୍ର ସଂପୂର୍ଣ୍ଣ ବଦଳି ଯାଇଥିଲା ରଙ୍ଗାରଙ୍ଗ ଆଲୁଅ ଭିତରେ । ନ୍ୟୁଜିଲାଣ୍ଡ ହେଉଛି ବିଶ୍ୱର ପ୍ରଥମ ଦେଶ, ଯେଉଁଠି ପ୍ରଥମେ ଆସେ ନୂଆବର୍ଷ ।
ନ୍ୟୁଜିଲାଣ୍ଡ ଭଳି ଅଷ୍ଟ୍ରେଲିଆରେ ବି ବେଶ ଧୁମ୍ଧାମରେ ନୂଆବର୍ଷକୁ ସ୍ୱାଗତ କରାଯାଇଛି । ସିଡନୀ ସହରରେ ରଙ୍ଗାରଙ୍ଗ ଆତସବାଜୀ ଏବଂ ଆଲୋକମାଳା ଭିତରେ ନୂଆ ବର୍ଷ ସ୍ୱାଗତ ନେଇଛି । ସିଡନୀର ଅପେରା ହାଉସ୍ ନିକଟରେ ଜିରୋ ନାଇଟ୍ ସେଲିବ୍ରେସନର ଆୟୋଜନ ହୋଇଛି । ଯେଉଁଥିରେ ହଜାର ହଜାର ଲୋକ ଉପସ୍ଥିତ ରହି ନୂଆ ବର୍ଷକୁ ସ୍ୱାଗତ କରିଛନ୍ତି । ସ୍ଥାନୀୟ ସମୟ ଅନୁସାରେ ଠିକ୍ ୧୨ଟାରେ ବାଣ ଓ ଆଲୋକମାଳା ଭିତରେ ଅତି ମନୋରମ ଦୃଶ୍ୟ ଦେଖିବାକୁ ମିଳିଛି । ଆଜି ସକାଳେ ସେଠି ବର୍ଷା ହୋଇଥିଲେ ସୁଦ୍ଧା ନୂଆ ବର୍ଷ ପାଳନରେ କୌଣସି ଅସୁବିଧା ହୋଇନାହିଁ । ସିଡନୀର ଏହି ନୂଆବର୍ଷ ଉତ୍ସବ ପାଳନ ପାଇଁ ପ୍ରାୟ ୪୦ କୋଟି ଟଙ୍କାର ଆତସବାଜୀର ବ୍ୟବସ୍ଥା ହୋଇଥିଲା।